Hebrews 7:1-28
7 Melkízedek, éí Séílemgi aláahgo naatʼáanii jílı̨́įgo, Diyin God Aláahgo Ayóóʼátʼéii binááʼiiłniihii jílı̨́. Éíbraham aláahgo naatʼáanii danilíinii neistseedę́ę́ʼ náádáałgo Melkízedek bidááh níyá áádóó bá sodoolzingo bikʼijisdliʼ.
2 Áko Éíbraham biʼanaʼí danilı̨́ı̨́ nítʼéeʼii binaalyeʼé tʼáá ałtso neeznáá daníjaaʼígíí éí tʼááłáʼígo shijaaʼ Melkízedek yeinínil. Melkízedek éí átséhé góneʼ bízhiʼ bikʼehgo tsʼídá tʼáá ákogi éʼétʼééjí aláahgo naatʼáanii nilı̨́ jiníigo ájíní, áádóó Séílem aláahgo yinanitʼaʼí nilı̨́įgo éí hózhǫ́ǫ́jí naatʼáanii jiníigo ájíní.
3 Bizhéʼé áádóó bimá éí tʼáadoo łaʼ yééhósiní da, dabizhéʼé yę́ę nidi tʼáadoo łaʼ yééhósiní da, áádóó hojideezlı̨́įʼgi índa nááhoʼdiilyáhígíí nidi doo bééhózin da. Diyin God biYeʼ hoolʼáágóó nááʼiiłniihii nahojílin.
4 Jó áko, dooládóʼ ayóó átʼéii jílı̨́į da lágo baa nitsídaahkees! Éíbraham nihizhéʼé nítʼéeʼii éí biʼanaʼí danilı̨́ı̨́ nítʼéeʼii binaalyeʼé neeznáá daníjaaʼígíí éí tʼááłáʼígo shijaaʼ Melkízedek baazhdiníʼą́.
5 Líívai dineʼé ahoolchíiłii, nááʼiiłniihii danilíinii éí diné bee dahólónígíí neeznáá daníjaaʼígíí éí tʼááłáʼígo shijaaʼ baa dahajáah doogo bee bá nahazʼą́, éí bidineʼé danilíinii ákódaadzaa, Éíbraham bitsʼą́ą́dóó ahoolchíiłii nidi ákódaadzaa.
6 Azhą́ Melkízedek éí Líívai daʼahílchíhígíí doo bitsʼą́ą́dóó jílı̨́į da nidi, Éíbraham éí tʼáadoo leʼé neeznáá daníjaaʼígíí éí tʼááłáʼígo shijaaʼ haidiníʼą́, áko Éíbraham éí Diyin God bichʼįʼ haadzíiʼgo ádee hadoodzíiʼii bikʼijisdliʼ.
7 Tʼáadoo naaki nilíní aláahgo átʼéii éí aʼohgo átʼéii yikʼijidlíigo bééhózin.
8 Líívai dineʼé ahoolchíiłii, éí tʼáadoo leʼé neeznáá daníjaaʼígíí éí tʼááłáʼígo shijaaʼ bichʼįʼ nidahalyéhígíí éí danoonééł, nidi tʼáá Diyin God bizaad bee akʼeʼashchíinii ánínígi átʼéego Melkízedek éí hináanii nilı̨́įgo bichʼįʼ naʼiilyé.
9 Łaʼda nidi kódidooniiłgo hazʼą́, éí tʼáadoo leʼé neeznáá daníjaaʼígíí éí tʼááłáʼígo shijaaʼ Líívai bichʼįʼ nahalyéé nítʼééʼ. Azhą́ ákótʼée nidi Éíbraham biniitʼaa Melkízedek yichʼįʼ naʼnílá.
10 Háálá Éíbraham éí Melkízedek bidááh níyáádą́ą́ʼ Líívai tʼah doo hojileeh da nidi Éíbraham bitsʼą́ą́dóó hozhdooleeł.
11 Líívai dineʼé náádaʼiiłniihii danilı̨́įgo Diyin God yee hasʼáanii Ízrel dineʼé yeidiníʼą́. Líívai dineʼé náádaʼiiłniihii bee hadaałtʼé yiidleełgo haʼátʼíísh biniyé nááʼiiłniihii łaʼ doo Éran átʼéé nítʼéʼígi átʼéii, nidi Melkízedek átʼéé nítʼéʼígi átʼéii hánáádeiitʼı̨́į doo?
12 Háálá náádaʼiiłniihii łaʼ nináháʼníiłgo bee hazʼáanii ałdóʼ łahgo ádoonííł.
13 Jesus, baa yádeiiltiʼígíí, doo Líívai dineʼé bitahdóó jílı̨́į da, nidi náánáłaʼ dineʼé bitahdóó jílı̨́, áko éí dineʼé bitahdóó łaʼ bikááʼ nááʼiiniihí siʼą́ągi tʼáadoo nááʼdziisniiʼ da.
14 Háálá nihiBóhólníihii tʼáadoo bahatʼaadí Júdah bitsʼą́ą́dóó oochíiłii nilı̨́įgo bééhózin, áko éí dineʼé danilínígíí bitahdóó nááʼiiłniihii danilı̨́į dooleełgi Mózes tʼáadoo yeinístʼįįd da.
15 Áko díidíígíí tsʼídá wózhǫ́ tʼáadoo bahatʼaadí nihileeh: Melkízedek nááʼiiłniihii átʼéé nítʼéʼígi átʼéii dzizlı̨́ı̨́ʼ.
16 Éí doo diné bibee hazʼáanii bikʼehgo nááʼiiłniihii dzizlı̨́įʼ da, nidi iiná doo óodįįh átʼéii bibee adziilii bikʼehgo nááʼiiłniihii dzizlı̨́ı̨́ʼ.
17 Háálá kótʼéego baa hóóneʼ, Melkízedek nááʼiiłniihii nilíinii bikʼehgo hoolʼáágóó nááʼiiłniihii nílı̨́.
18 Jó, átséédą́ą́ʼ bee hazʼáanii doo bidziil da áádóó doo chooʼínígíí biniinaa nahjįʼ kólyaa.
19 Bee hazʼáanii tʼáadoo haʼátʼíhída hadaałtʼéego áyiilaa da. Áko kʼad bee hazʼáanii biláahgo átʼéii bíká nihił chohooʼíinii yee nihá haadzííʼ. Éí bee Diyin God baa hiikááh.
20 Diyin God ádee hadoodzíiʼii bee Jesus nááʼiiłniihii nilı̨́įgo baa ákohwiiniidzı̨́ı̨́ʼ.
21 Nahdę́ę́ʼ nááʼiiłniihii danilı̨́ı̨́ nítʼéeʼii éí doo Diyin God yee ádee hadoodzíiʼii bee nááʼiiłniihii dadzizlı̨́įʼ da. Nidi Diyin God éí ádee hadoodzíʼę́ę biniitʼaa Jesus nááʼiiłniihii dzizlı̨́ı̨́ʼ. Háálá áháłní,
Bóhólníihii ádee hadoodzííʼ, áádóó doo łahgo átʼéego tsíńdookos da,Melkízedek nááʼiiłniihii nilı̨́ı̨́ nítʼéeʼii bikʼehgohoolʼáágóó nááʼiiłniihii nílı̨́, biʼdooʼniid.
22 Áko éí biniyé Jesus biniitʼaa bee ahaʼdeetʼáanii aláahgo átʼéii nihá ályaa.
23 Nahdę́ę́ʼ náádaʼiiłniihii tʼáá aaníí tʼóó adahayóí nítʼééʼ, háálá daninéego biniinaa binaanish doo tʼáá náás deítʼéeh da nítʼééʼ.
24 Nidi Jesus tʼéiyá tʼáá áłahjįʼ nááʼiiłniihii jílı̨́, háálá tʼáadoo łaʼ hatsáskʼehjįʼ ooyaʼígóó jiináago ahoolʼá.
25 Éí bąą hó hwee Diyin God yaa hakáhígíí tʼáá nihonítʼiʼjįʼ yisdájiiníiłgo bízhneelʼą́, háálá bá naʼakʼíyájíłtiʼ doo biniyé tʼáá áłahjįʼ jiiná.
26 Jesus éí aláahgo nááʼiiłniihii nilı̨́įgo nihá yáʼátʼééh. Éí diyin, áádóó doo bikʼíhátʼáah da, bąąhági átʼéii bąąh ádin, bąąhági ádaaníiłii bitsʼáltı̨́, áádóó aghánáhóóʼáadi dah bidiʼneesdá.*
27 Jesus éí nahdę́ę́ʼ aláahgo náádaʼiiłniihii ádaatʼı̨́ yę́ęgi átʼéego tʼáadoo ádzaa da. Nahdę́ę́ʼ aláahgo náádaʼiiłniihii tʼáá ákwíí jı̨́ bibąąhági ádaatʼéii biniyé náádaʼiiłniih nítʼééʼ, áádóó índa diné ałdóʼ bibąąhági ádaatʼéii biniyé náádaʼiiłniih nítʼééʼ. Nidi Jesus tʼáá bí nááʼádiisniiʼ yę́ędą́ą́ʼ tʼááłáhídiígíí ałtso nááʼádiisniiʼ.
28 Aláahgo náádaʼiiłniihii doo tʼáá ákwii ádaatʼéii bee hazʼáanii bikʼehgo ninábidiʼnił nítʼééʼ, nidi éí bee hazʼáanii bikééʼdóó Diyin God saad yee ádee hadoodzíiʼii bikʼehgo biYeʼ aláahgo nááʼiiłniihii nilı̨́į doogo niiníłtı̨́. Éí hoolʼáágóó tʼáá sahdii atsʼáyiiníłtı̨́.
Footnotes
^ Diyin God Ayóóʼátʼéii tʼáá bí hólónídi Jesus dah bidiʼneesdá.
