Hebrews 8:1-13
8 Ádadiiʼnínígíí díí ááhyiłní: aláahgo nááʼiiłniihii ákótʼéii, yáʼąąshdi Ayóóʼájítʼéii bikááʼdóó hojooʼáałii honishʼnáájí dah sidáii nihá aláahgo nááʼiiłniihii nilı̨́.
2 Tsʼídá aláahgo hodiyingo hazʼą́ągi éí níbaal biiʼ hodílzinii tʼáá aaníinii, éí diné doo niiníʼáanii nidi Bóhólníihii niiníʼánígíí biyiʼ góneʼ naalʼaʼí nilı̨́.
3 Aláahgo náádaʼiiłniihii tʼááłáʼí nítínígo tʼáadoo leʼé náádahaniihii índa naatseedgo náádahaniihii náádayiiłniih doo biniyé nidabidiiʼnííł nítʼééʼ; tʼáá éigi átʼéego Jesus, nihá aláahgo nááʼiiłniihii, néidiyoołnihii ałdóʼ bee hólǫ́.
4 Nahasdzáán bikáaʼgi tʼah naagháago doo nááʼiiłniihii nilı̨́į da doo, háálá bee hazʼáanii bikʼehgo náádaʼiiłniihii aa dahalyéii náádayiiłniihii dahólǫ́.
5 Éí yindaalʼaʼgo yáʼąąshdi hodiyingo hazʼą́ągi naʼalʼaʼígíí bidaʼjiłʼı̨́ índa bichahaʼoh dajílı̨́ nahalingo bindajilʼaʼ. Mózes níbaal biiʼ hodílzinii áyiʼniilaa yę́ędą́ą́ʼ Diyin God kóníigo nabineeztą́ą́ʼ, Díí tʼáá ałtso bikʼehgo ádadíílíłígíí dziłghą́ąʼdi nichʼįʼ ííshjání áshłaaígíí tsʼídá tʼáá éí bikʼehgo baa honíyą́ągo ádadíílííł.
6 Nidi naanish Christ baa deetʼánígíí éí ałkʼidą́ą́ʼ nidajilʼaʼii hanaanish biláahgo yáʼátʼéehii átʼé, éí bił ałkʼehgo Christ biniitʼaa Diyin God éí diné yił yee ahaʼdeetʼáanii éí ałkʼidą́ą́ʼ bee ahaʼdeetʼáanii biláahgo yáʼátʼéehii átʼé, háálá éí Diyin God tʼah aláhígo yáʼátʼéehgo yee nihwiizʼáanii bee hadilyaa.
7 Átséédą́ą́ʼ bee ahaʼdeetʼáanii tʼáadoo bee bikʼíhótʼahígóogo doo bee ahaʼnáádeetʼą́ą da doo nítʼééʼ.
8 Nidi Diyin God éí diné baʼátʼeʼ yikʼee doo bił hóózhǫǫdgóó ání:
Jóʼakon, Ízrel dineʼé índa Júdah dineʼé bee ahaʼdeetʼą́ ániidíígííbee bił ahadadiʼdeeshtʼáałii baa hodoolzhishígíí bichʼįʼ yoołkááł, ní Bóhólníihii.
9 Ííjip kéyahdóó dah hodiiʼeezh bijı̨́ı̨́dą́ą́ʼdahazhéʼé yę́ę bił ahadadiʼnishtʼáanii doo bił aheełtʼée da dooleeł.Háálá éí shibee ahaʼdeetʼáanii doo bidaʼjiilaa da,éí bąą tʼóó hatsʼą́ąjįʼ kósdzaa, ní Bóhólníihii.
10 Éí yoołkáłígíí adayiiską́ą́dóó bikʼijįʼ
díí bee ahaʼdeetʼą́ nilíinii Ízrel dineʼé bee bił ahadadiʼdeeshtʼááł, ní Bóhólníihii:Bee hoséłʼáanii bintsíkees biih dadeeshłééłáádóó dabijéí biyiʼdi bee bikʼedaʼdeeshchííł.BiDiyin God nishłı̨́į doo, áádóó bí shidineʼé danilı̨́į doo.
11 Áko diné tʼááłáʼí nítínígo yił kéédahatʼíinii,
áádóó bikʼis danilíinii éí, Bóhólníihii bééhonísįįh, doo deiłníi da doo.Háálá aʼohgo ádaatʼéédóó ayóó ádaatʼéejįʼtʼáá ałtso shéédahósin doo.
12 Doo ákwii ádáátʼįįdii baa aʼááh dínéesįįł,
áádóó bibąąhági ádaatʼéii índa bee hazʼáanii doo yikʼeh ádáátʼįįdiitsʼídá doo bénáshniih da doo.
13 Diyin God, Bee ahaʼdeetʼą́ ániidíígíí, níigo átsé nítʼéʼígíí doo ílı̨́į da silı̨́ı̨́ʼ, níigo ání. Jó, haʼátʼíhída doo ílı̨́į da silı̨́įʼgo yíighah ałeehii éí kʼadę́ę doo bééhoozįįh da łeh.
