Hebrews 9:1-28
9 Átséédą́ą́ʼ bee ahaʼdeetʼáanii éí bikʼeh hoogáałii hólǫ́ǫgo Diyin God bichʼįʼ nahadláá nítʼééʼ, áádóó nahasdzáán bikáaʼgi Diyin God bichʼįʼ nahadláago bił hazʼą́ą́ nítʼééʼ.
2 Níbaal biiʼ hodílzinii niitʼą́, áłtsé góneʼ hazʼánígíí éí hodiyingo hazʼą́ hoolyé. Ákóneʼ bee hoolʼiní bá yadaaʼáhígíí, índa bikááʼ adání, áádóó Diyin God bichʼįʼ bááh nááhániihii bikáaʼgi sinil.
3 Naaki góneʼ dáádiníbaalígíí bineʼdę́ę́ʼ łaʼ nááházʼą́, éí tsʼídá aláahgo hodiyingo hazʼą́ hoolyé.
4 Ákóneʼ bikááʼ nááʼiiniihí óola bikʼéstiʼgo siʼą́, éí bikáaʼgi tsin bijeeh dilidgo łikání halchinii nídídliʼ, áádóó tsitsʼaaʼ dílzinii óola tʼáá átʼéé nítʼééʼ bikʼéstiʼgo ałdóʼ siʼą́, éí biyiʼ góneʼ óola ásaaʼ éí bááh mána wolyéii bee siką́ągo biiʼ siką́, áádóó Éran bigish chʼil nahalingo bílátah daʼiichiihii ałdóʼ biiʼ sitą́, índa bee ahaʼdeetʼáanii bee tsé bikʼeʼashchı̨́įgo ałdóʼ biiʼ sinil.
5 Tsitsʼaaʼ dílzinii bikáaʼgi diyingo naalʼaʼí beʼelyaii naakigo bitsʼádiʼnílíidii, chérabim wolyéii, éí Diyin God aa aʼááh nízinii bił hazʼání bikʼijįʼ bitʼaʼ dah yoołbałgo dah sizı̨́.* Nidi díí doo tʼáá átʼéegi baa hojólneʼ átʼée da.
6 Éidíígíí ákótʼéego hashtʼedaalyaago níbaal biiʼ hodílzinii átsé hazʼą́ą́ góneʼ náádaʼiiłniihii Diyin God yá nidaalnish yiniyé tʼáá ahą́ą́h yah anídaakah nítʼééʼ;
7 tsʼídá aláahgo hodiyingo hazʼą́ą́ góneʼ aláahgo nááʼiiłniihii tʼéí tʼááłáʼí nináháháahgo tʼááłáhídi yah anádááh nítʼééʼ. Éí dił ádá néidiyoołnihii índa diné doo ádaa ákodanidzingóó bąąhági átʼéii yaa nidaaskai yá néidiyoołnihii yah anéíkááh nítʼééʼ. Dił tʼáágééd doo yah anádáah da.
8 Éí ákódaatʼéhígíí bitsʼą́ą́dóó Níłchʼi Diyinii yee nanihinitingo níbaal biiʼ hodílzinii átséhígíí tʼahdii siʼą́ągo tsʼídá aláahgo hodiyingo hazʼánígíí tʼah doo ąą álnéeh da nítʼééʼ lá.
9 Díí hoolzhishígíí biyiʼ éí tʼóó bee ééʼdeetįįhii átʼé. Kótʼéego ááhyiłní: tʼáadoo leʼé náádahaniihii índa naatseedgo náádahaniihii náádahidoonihígíí éí nahojiłáii habąąhági átʼéii bee hatsʼą́ąjįʼ silı̨́įʼgo baa ákozdínóozįįłgi doo bízhneelʼą́ą da.
10 Háálá éí daadáanii índa daadláanii áádóó nahadláago tááʼágis ádaatʼéii tʼéiyá bídéétʼiʼ. Éí atsʼíís bá bikʼeh hoogáałii ádaatʼé. Éí Diyin God tʼáá ałtsoní hashtʼééyiidlaajįʼ tʼéiyá ílı̨́įgo nihoolzhiizh.
11 Nidi Christ éí yáʼádaatʼéehii hazlı̨́įʼii yiniyé aláahgo nááʼiiłniihii nilı̨́įgo níyáago hodiyingo hazʼáanii aláahgo átʼéii áádóó wózhǫ́ hadaałtʼéii biyiʼdi naalʼaʼ. Éí hazʼą́ągi doo yílá bee ályaa da, díí nahasdzáán ályaago siʼánígíí doo bídéétʼiʼ da.
12 Éí biyiʼdi náwóneʼédi tsʼídá aláahgo hodiyingo hazʼą́ąjįʼ Christ tʼáá bí tʼááłáhídiígíí ałtso łaʼyiyiilaago yah ííyá, tłʼízí índa béégashii yáázh bidił doo nááyiisniiʼ da, nidi tʼáá bí bidił nihá nááyiisniiʼgo hoolʼáágóó yisdánihíínil.
13 Diné éí nichxǫ́ʼíii yee ádąąh nidahwiilʼaahii dóola bidił, doodaiiʼ tłʼízí bidił, doodaiiʼ béégashii yáázh seesyı̨́įgo díílidgo bitʼeesh taah yiką́ągo akʼéltahgo éí bee nichxǫ́ʼíii hatsʼą́ąjįʼ kónáálnííł nítʼéeʼgo,
14 tʼah yówehígo átʼéego Christ tʼáá bí bidił yee łaʼyiyiilaago éí tsʼídá hadaałtʼéii nilı̨́įgo Níłchʼi Diyinii doo niitʼéehii biniitʼaa Diyin God yichʼįʼ nááʼádiisniiʼ. Áko Diyin God hináanii bá nidaałʼaʼ dooleeł biniyé tʼáadoo biniyéhígóó baa naahkai nítʼéeʼii bitsʼąą tʼáá bí bidił yee nihíniʼ hashtʼééyoodlíił doo.
15 Éí bąą Christ tʼáá hó bee ahaʼdeetʼą́ ániidíii binjiyáii jílı̨́. Áko Diyin God bííʼ dazhdooleełgo háká ádííniidígíí éí hoolʼáágóó akʼidahojidlíi dooleełii Diyin God yee nihoníʼáanii bee hakʼidahojidlíi doo. Háálá átséédą́ą́ʼ bee ahaʼdeetʼáanii* bidaʼjiłʼı̨́ı̨́ nítʼéeʼii doo bidaʼjiłʼı̨́ı̨́góó bąą Christ daaztsánígíí yee yisdáhóónil.
16 Tʼáadoo leʼé bąąh áhodoodįįłii háí bííʼ dooleełii bá bééhózingo álʼįįhgo dadziztsánígíí bééhoozįįhgo índa łaʼda baa ditʼááh.
17 Jó, tʼahdii jiináago éí tʼah doo łaʼda baa deetʼaah da łeh, dadziztsą́ą́dóó bikʼijįʼ índa łaʼda baa ditʼááh.
18 Tʼáá éigi átʼéego átséédą́ą́ʼ bee ahaʼdeetʼáanii bikʼehgo dił bee hahóóyá.
19 Mózes éí bee hazʼáanii áníinii tʼáá átʼé diné tʼáá ałtso yee yił hoolneʼdóó bikʼijįʼ béégashii yáázh bidił índa tłʼízí bidił tó yił ałtah yiníziidgo néidiiką́, aghaałchxíʼí índa chʼil hísap wolyéhígíí ałdóʼ néidiiłjoolgo Diyin God yee hasʼáanii bee akʼeʼashchínígíí índa diné tʼáá ałtso éí yee yikʼíístah
20 kóníigo, Díidí dił bee ahaʼdeetʼáanii átʼéego bidaʼołʼı̨́į dooleełgo Diyin God nihá haadzííʼ.
21 Tʼáá ákótʼéego ałdóʼ níbaal biiʼ hodílzinii índa nahadláago chodaoʼíinii tʼáá ałtso dił yikʼíístah.
22 Tʼáá aaníí átʼé, bee hazʼáanii bikʼehgo kʼasdą́ą́ʼ tʼáá ałtsoní dił bee doo yáʼátʼéehii nahgóó ádąąh kwíilʼı̨́, áko dił tʼáadoo deeznaʼgi bąąhági átʼéii tsʼídá doo há yóóʼadidootʼáał da.
Christ nááʼádiisniiʼígíí bee bąąhági átʼéii nahjįʼ nideetʼą́
23 Jó, áko nahasdzáán bikáaʼgi dahólóonii díí náádahaniihii bee doo yáʼátʼéehii ąąh ádingo óolzingo tʼáá ákónéehee bee hazʼą́ą́ nítʼééʼ, éí yáʼąąshdi dahólóonii tʼóó bééʼályaii átʼé, nidi yáʼąąshdi dahólóonii éí tʼah aláhídi yáʼátʼéehgo náádahaniihii átʼéego óolzin.
24 Háálá hodiyingo hazʼą́ yílá bee ályaii, éí tʼáá aaníinii tʼóó bééʼályaago hazʼą́ą́ góneʼ, Christ doo yah ííyáa da. Nidi Diyin God yidááhdóó nihá yidoozįįł biniyé Christ yáʼąąshjįʼ yah ííyá.
25 Tʼáá nináháhááh bikʼeh aláahgo nááʼiiłniihii éí hodiyingo hazʼą́ą́ góneʼ doo tʼáá bí bidił néidiyoołnih biniyé yah anádáah da nítʼééʼ, nidi Christ éí doo łą́ądi nááʼádiisniiʼ da.
26 Łą́ądi nááʼádiisniiʼgo éí nahasdzáán ályaadóó wóshdę́ę́ʼ łą́ądi tiʼnáhoosniiʼ doo nítʼééʼ. Nidi kʼad, nihoogháahjįʼ hoolzhishgo tsʼídá tʼááłáhídiígíí bąąhági átʼéii tʼáá átʼé nahjįʼ nididootʼááł biniyé tʼáá bí nááʼádiisniiʼ.
27 Áko nihokááʼ dineʼé tʼááłáhídi dazdootsaałgo bee há hazʼą́, áádóó bikʼijįʼ Diyin God há nihodooʼááł.
28 Tʼáá ákótʼéego ałdóʼ tʼóó ahojíyóí Diyin God bichʼįʼ ádił nidaʼjiiszíiʼii há yóóʼiididooʼááł biniyé tʼááłáhídi Christ nááʼádiisniiʼ. Áádóó naakidi aleeh góneʼ náádoodááł. Éí diné ádił nidaʼiisíiʼii doo yiniyé náánádáah da, nidi tʼáá íiyisí nidabólíigo bibaʼ ádaatʼéii yisdáʼiildééh ałtso yá łaʼyidoolííł yiniyé náádoodááł.
Footnotes
^ Ákweʼé diné bibąąhági átʼéii bá dił bikʼínáltahgo hazʼą́. Ex. 25:18-22.
^ Gríik bizaad kʼehjígo saad bee ahaʼdeetʼáanii áádóó bííʼ dooleełii éí tʼááłáʼígíí átʼé.
