Hosea 1:1-11
1 Azáíyah, Jótham, Éíhaz índa Heziikáíyah éí Júdah dineʼé aláahgo binanitʼaʼí danilı̨́įgo yoołkááłdą́ą́ʼ áádóó Jóʼash biyeʼ Jerobówam éí Ízrel dineʼé aláahgo binanitʼaʼí jílı̨́įgo yoołkááłdą́ą́ʼ Bóhólníihii éí Biyérai biyeʼ Hozéíya yichʼįʼ haadzííʼ.
2 Bóhólníihii tsʼídá átsé Hozéíya yichʼįʼ haadzííʼ yę́ędą́ą́ʼ Bóhólníihii éí Hozéíya áyidííniid, Nílááh, ałjiłnii asdzání łaʼ báʼiiyehgo éí nidiʼyoołchíiłgo naʼáłchíní ádíílííł, háálá díí kéyahgi naʼageh ayóó átʼéego yee tsiʼnaakaigo Bóhólníihii yóóʼadeideezʼą́.
3 Ákohgo Hozéíya dah diiyáago Dibléíyim bitsiʼ Gómer wolyéii yáʼázyeh áádóó iʼniiltsąądgo ashkii yishchı̨́.
4 Áko Bóhólníihii áhodííniid, Jézriyel* bee yídíízhiił, háálá Jézriyelgi kéédahatʼíinii nidabiʼdiztseedgo bidił dadeeznaʼ yę́ę biniinaa tʼóó hodíínaʼígo Jííhu bikindóóígíí atíhodeeshłííł áádóó bee óhólníihgo bił hazʼáanii Ízrel bee wójíhígíí áádeesįįł.
5 Áko éí bijı̨́ áhodooníiłgo Jézriyel honíteel góyaa dineʼé Ízrel bee wójíii beʼałtı̨́ı̨́ʼ kʼídeeshtih.
6 Gómer anááʼniiltsąądgo bichʼéʼé yishchı̨́. Áko Bóhólníihii éí Hozéíya áyidííniid, Loruhámah bee yídíízhiił, háálá dineʼé Ízrel bee wójíii doo haa aʼááh náádínéesįįł da índa ádił nidaʼdziisíʼígíí tsʼídá doo hatsʼánídideeshʼáał da.
7 Nidi Júdah dineʼé baa aʼááh dínéesįįł. Éí Bóhólníihii biDiyin God ádayósingo biniitʼaa yisdádeeshnił. Ałtı̨́ı̨́ʼ, doodaiiʼ diltłish, doodaiiʼ anaaʼ, doodaiiʼ łı̨́ı̨́ʼ, doodaiiʼ łı̨́ı̨́ʼ nidabiyéii doo bee yisdáhodeeshnił da.
8 Gómer éí Loruhámah hoʼdíítʼóodgo anááʼniiltsąądgo biyáázh łaʼ náánéíshchı̨́.
9 Áko Diyin God ádííniid, Loʼámai bee yídíízhiił, háálá doo shidineʼé danohłı̨́į da áádóó doo nihiDiyin God nishłı̨́į da doo.
10 Azhą́ ákótʼée nidi, Ízrel baʼáłchíní éí tónteel bibąąhjįʼ séí táłtsʼáyiiłʼeełígíí tsʼídá doo jóołtaʼ ánéelą́ąʼ daígi átʼée doo. Doo shidineʼé danohłı̨́į da, biʼdooʼniidígi tsʼídá tʼáá éí hazʼą́ągi Diyin God hináanii biyeʼké danohłı̨́, biʼdiʼníi dooleeł.
11 Ákohgo Júdah dineʼé áádóó Ízrel dineʼé tʼáá áłah ahiih nídookahgo binanitʼaʼí tʼááłáʼí ádá nideidoołtééł índa éí kéyahgi háádínóotʼı̨́ı̨́ł, háálá éí bijínídóó Jézriyel dineʼé ayóó átʼéego bíyoołkáał doo.
Footnotes
^ Hííbrew kʼehjí Jézriyel jiníigo éí Diyin God kʼéédídlééh jiníigo óolyé.
