Hosea 10:1-15
10 Ízrel éí chʼil naʼatłʼoʼii bitʼąąʼ tʼóó ahayóígíí nahojílin. Tʼáá hó honeestʼąʼ ádá nishójíyoołtʼeehígíí kʼeeʼąą deeshzhiizhgo bikááʼ nááʼiiniihí ałdóʼ bilááh yileehgo áyiilaa, áko hakéyahgi yáʼátʼéehgo hazʼánígíí bikʼehgo eʼelyaii bichʼįʼ nidahadláii danizhónígo áyiilaa.
2 Tʼáá naaki nahwiiláago nitsídaakees. Kʼad lą́ą baʼátʼeʼ bikááʼ habidoonił. Bikááʼ náádaʼjiiłniihii Bóhólníihii éí naaʼiidiyoołtłʼił, áádóó edaʼalyaii ałtso íidoołdįįł.
3 Áko ádadidooniił, Bóhólníihii doo dadíníilzingóó biniinaa aláahgo naatʼáanii nihee ádin; aláahgo naatʼáaniishąʼ, haʼátʼíí nihá baa nizhdoogáałgo bízhneelʼą́?
4 Tʼóó ádaaníigo ahadaʼdeetʼaahgo dabiyoochʼíidgo ádee hadahididziih. Éí bąągo nihwiisdládígóó chʼil aghánii hááhinootʼı̨́łígi átʼéego ándahwiitʼaah doo.
5 Samériya kéyahgi kéédahatʼínígíí éí Beth-éíven kin shijaaʼgi béégashii yáázh beʼelyaii yaa nitsinákah doo. Diné índa náádaʼiiłniihii éí yaa bił dahoneeni yę́ę yaa yínííł danilı̨́įgo daacha doo, háálá ayóó átʼé dayóʼní yę́ę bił ahóóyáa doo.
6 Béégashii yáázh beʼelyaii ałdóʼ aláahgo naatʼáanii ayóó átʼéii baa dooltééł biniyé Asíriya kéyahgóó eeltı̨́į doo, áko Íífreiyim tʼóó ádaa yánídzin doo, índa Ízrel tʼáá bí kótʼéego daaníinii bił baa yáhodoosįįł?
7 Tó bitáláwosh yóóʼahiʼeełígi átʼéego Samériyadóó aláahgo naatʼáanii ábidiʼdooldįįł.
8 Éíven hoolyéegi* ninádahałaah doo biniyé wódah nahazʼą́ągo ádaalyaaígíí bee Ízrel dineʼé ádił nidaʼdziiszíʼígíí ádooldįįł. Bikááʼ náádaʼiiniihí bikáaʼgi chʼil biwosh hólóonii índa chʼil deeníní hadahidínóosééł, áko diné éí dził ádeididooniił, Nihikʼi dadoołkǫǫh, áádóó dah daaskʼidígíí ádeididooniił, Nihikʼi daołdaas.
9 Ízrel nílíinii, Gíbiyah kin haalʼáagi ádił asínílziih yę́ędóó wóshdę́ę́ʼ tʼahdii tʼáá ákónítʼı̨́; Gíbiyahgi tsʼídá doo ákwii ádáátʼįįdii tʼáadoo ałtso anaaʼ bił anoodaaʼ da.
10 Tʼáá shí íiniizı̨́įʼgo atíhodeeshłííł áádóó naakidi ahą́ą́h nániiláago ádihodiiltʼiʼígíí hániʼ dadineesdlı̨́įʼgo biniinaa atíhodeeshłíiłgo ałʼąą dineʼé hakʼijįʼ danilı̨́į doo.
11 Íífreiyim éí béégashiitsaʼii yízhǫǫdígíí nahojílingo oolchʼííh hoł ayóó áhootʼéego bąą hazéédíʼdéeshtı̨́ı̨́ł. Íífreiyim azaatłʼóól bee nahashłoʼ doo; Júdah éí nihozhdiyoołdlał; Jéíkab tʼáá bí ádá akʼi niʼdooshoł.
12 Tʼáá ákogi átʼéii álástsiiʼ nilíinii tʼáá nihí kʼidadohłé áádóó aa aʼááh hasin áłah áńdadoohdlííł; nihił nídahóótłʼisgo nidahwiyołdlaad, háálá Bóhólníihii hádaahtʼı̨́į dooleełjįʼ ahoolzhiizh, áko honíleʼgo tʼáá ákogi átʼéii nihikʼijįʼ neidoołtı̨́ı̨́ł.
13 Doo yáʼáshóonii bił nidahoyoołdláadgo doo ákwii ádaatʼéii áłah áńdaohdlaa índa woochʼííd bee nídanoochaad, háálá tʼáá nihí ádanohtʼéii éí diné ayóó ádaatʼéii tʼóó ahayóígíí baa dadzíínóhłíí nítʼééʼ.
14 Éí bąą tʼáá Shálman joolyéii Beth-árbel kin shijaaʼgi anaaʼ hasłı̨́įʼgo éʼésdįįdgo amá danilíinii badaʼáłchíní tʼáá yił nihídeideestsis yę́ęgi átʼéego nidineʼé bitahgóó anaaʼ bikʼee tʼóó daʼayóii dahodooleełgo bineʼ nidaahdziʼii ałtso ádeidoołdįįł.
15 Béthel kin haalʼáagi tsʼídá doo yáʼáshónígi ádaahtʼínígíí bąą nihichʼįʼ ákódahodoonííł, Tʼah abínígo Ízrel dineʼé aláahgo binanitʼaʼí tsʼídá ałtso ábiʼdidooldįįł.
Footnotes
^ Hííbrew kʼehjí Éíven jiníigo tsʼídá doo yáʼáshǫʼ jiníigo óolyé.
