Hosea 12:1-14
12 Íífreiyim éí bizááyol; haʼaʼaahdę́ę́ʼ níyolígíí yikééʼ naaghá; tʼáá ákwíí jı̨́ tʼóó báhádzidgo biyoochʼííd áádóó tʼáá naʼníleʼdii naagháago niʼiiłchxǫǫh. Asíriya dineʼé yił ahaʼdeetʼą́ índa Ííjip kéyahgóó akʼah ayiiyeeh.
2 Diyin God éí Júdah yił ałghaʼditʼááh. Jéíkab ájítʼéii bikʼehgo atíhodiʼdoolnííł; baa nijigháii bikʼehgo kʼééhodiʼdoolnííł.
3 Tʼah iishchʼid biiʼ hojílǫ́ǫgo hánaaí bikétal dziiłtsood áádóó hastiin dzizlı̨́įʼgo Diyin God bichʼįʼ nidzisdzil.
4 Tʼáá aaníí, diyingo naalʼaʼí hoł naʼahíneeztą́ąʼgo bikʼeshdidlı̨́įgo ahoolzhiizh; jichago yee akʼijidlíii baa níjooskan. Béthelgi Diyin God baazhníyáago áadi Diyin God nihichʼįʼ hahaasdzííʼ.
5 Tʼáá ałtsoní bee Bóhólníihii Diyin God bízhiʼ bee bééhániihii éí Bóhólníihii wolyé.
6 Éí bąą niDiyin God bichʼįʼ dah nídoohkááh; tʼáá áłahjįʼ jiinohbaʼgo tʼáá ákóneʼ ádaahtʼı̨́ índa tʼáá áłahjįʼ nihiDiyin God bibaʼ ádanohtʼé.
7 Naʼiiłniihii bee iʼdoodlohii dah yoojih nahalingo diné yide áhósingo bił ayóó áhootʼé.
8 Íífreiyim ání, Tʼáá aaníí, atʼíinii sélı̨́ı̨́ʼ, tʼáá aaníí, aséstʼįįd. Yishtʼíinii tʼáá ałtso binaashnishgo tʼáadoo doo ákwii áátʼįįdí da.
9 Nidi Ííjip kéyahgi kééhohtʼı̨́ yę́ędóó wóshdę́ę́ʼ shí Bóhólníihii nihiDiyin God nishłı̨́. Hodílzingo áłah náʼádleeh bá hooʼaʼ góneʼ níbaal biiʼ kééhohtʼı̨́ yę́ęgi átʼéego ánáánihideeshdlííł.
10 Diyin God yá dahalneʼii bichʼįʼ hahásdzííʼ áádóó ląʼígóó bił ádahooníiłgo íishłaa índa Diyin God yá dahalneʼii biniitʼaa haneʼ bee akʼidiʼdootı̨́įłii bee hashneʼ nítʼééʼ.
11 Gíliyad kéyahgi doo ákwii éʼétʼéiísh hólǫ́? Tʼáá aaníí, ákwii kéédahojitʼíinii tʼáadoo dajílíní da. Gílgal* kin shijaaʼgi dóola náádayiiłniihgo bibikááʼ náádaʼiiniihí éí dáʼákʼeh nihwiisdládígóó tsé yáádaaʼáhígíí nidahalin.
12 Áko Jéíkab éí Síriya kéyahgóó yóóʼanííchą́ą́ʼ índa Ízrel beʼasdzą́ą́ dooleełii yikʼé naalnishgo beʼasdzą́ą́ dooleełii yikʼé naʼneeskaad.
13 Diyin God yá halneʼii biniitʼaa Ííjip kéyahdę́ę́ʼ Ízrel dineʼé yił chʼíiníʼeezh,* áko halneʼii biniitʼaa dadzoodzííʼ.
14 Íífreiyim éí ayóó átʼéego Diyin God bá hojííłchįįd; éí bąą haBóhólníihii éí niʼdzistseedgo dił deeznaʼii bee hohodiitʼiʼgo áhodoolííł áádóó haʼátʼeʼ hakʼijįʼ nídoodleełgo yá nináhodoołtʼeeł.