Hosea 13:1-16
13 Íífreiyim yájíłtiʼgo diné bitah dahoditłid nítʼééʼ; Ízrel dineʼé bitahgi tʼáá bí ayóó átʼéii íʼdílʼı̨́, nidi Béíyal bichʼįʼ nahojiłáago ádił adzisiihgo dadziztsą́.
2 Áko kʼad tʼóó tséʼédin ádił náádaʼílzíihgo béésh łigaii deidiłhı̨́įʼgo edaʼalyaii ádá ádayiilaa. Tʼáá bí yikʼidaʼdiitáanii bikʼehgo diné daʼiichįįhii edaʼalyaii tʼáá ałtso ádayiilaa. Áko ádaaní, Diné náádaʼiiłniihii éí béégashii yáázh bidaʼalyaii nídeintsʼǫs doo.
3 Éí bąą áhí ałtso ádįįhígi átʼéego, doodaiiʼ dahtooʼ ádįįhígi átʼéego, doodaiiʼ azhool bił yóóʼahiyółígi átʼéego índa chʼíláyiʼdóó łid bił yóóʼahiyółígi átʼéego ádazhdoodįįł.
4 Nidi tʼáá Ííjip kéyahgi kééhohtʼı̨́ yę́ędóó wóshdę́ę́ʼ nihiDiyin God Bóhólníihii nishłı̨́. Tʼááká náánáłaʼ diyin ánádaohdleʼ lágo, háálá yisdáʼiiníiłii doo łaʼ nááhódlǫ́ǫ da.
5 Honoojíidi tʼáá íiyisí hóółtseiigi kééhohtʼı̨́įgo nihééhasin nítʼééʼ.
6 Bikéyah hootsoígíí bikʼehgo hwiih daazlı̨́ı̨́ʼ áádóó bijéí yee ayóó átʼéego ádaa dadzoosdliʼ; éí bąą tʼóó shaa dayooznah.
7 Áko bichʼįʼ náshdóítsoh bitsiijįʼ ditłʼooígíí nahonishłin doo; náshdóítsoh łikizhii nahonishłingo atiin bąąhgi baa hííníshtı̨́į doo.
8 Shash biyázhí bee jiniʼįįh nahonishłingo hakʼi hwiideeshłeeł; náshdóítsoh nahonishłingo hajéítsʼiin ałkʼídadínéesǫ́ǫ́s; naaldlooshii báhádzidii niʼiiníshígi átʼéego ałtso dahodeeshdił.
9 Ízrel nílíinii, níká anáshwoʼgo shikʼijįʼ nílı̨́įgo tʼáá ni ádiniʼnildįįdgo átʼé.
10 Aláahgo ninanitʼaʼí yisdánídoołtéełiishąʼ háájí? Áádóó nikin hadaasʼáágóó ná dahwéeʼaahiishąʼ tʼáá ałtso háájí adahaaskai? Shą́ą́ʼ, Aláahgo naatʼáanii áádóó naatʼáanii danilíinii shá ninínííł, dííníniid.
11 Sháhóóchįįdgo aláahgo naatʼáanii ná niníłtı̨́ índa hashké niisdzı̨́įʼgo nahjįʼ kóshłaa.
12 Íífreiyim doo ákwii áátʼįįdii áłah ályaa; yee ádił niʼiiszíiʼii hashtʼeʼniiʼnil.
13 Asdzání awééʼ bídiiʼnaʼ nahalingo yínííł hakʼi hwiidooleeł; ayeʼ doo hóyáanii nilı̨́; bidiʼdoochíiłjįʼ ahoolzhiizhgo doo habíniʼ da.
14 Jishchááʼ bibee adziildę́ę́ʼ nááhodiyeeshnih. Aninéédę́ę́ʼ nááhodiyeeshnih. Aniné nílíinii, bee nikʼeʼíyéeʼii yę́ęshąʼ éí háájí? Jishchááʼ nílíinii, bee íʼííłdįįłii yę́ęshąʼ éí háájí? Doo naa aʼááh nisin da.
15 Azhą́ bikʼisóó bitahgóó tʼóó ahayóí bineestʼąʼ nidi, haʼaʼaahdę́ę́ʼ dooyoł; éí honoojíídę́ę́ʼ Bóhólníihii níyolgo íidoolííł áádóó tó háálíinii náhodooltsih índa tó haʼniłhoshii náhooltseii doo áádóó naalyeʼé daʼílíinii ałtso hatsʼą́ą́ʼ néididoolééł.
16 Samériya baʼátʼeʼ bee bohodidootʼih, háálá biDiyin God yichʼįʼ naalteeh nítʼééʼ. Bidineʼé éí diltłish bee nidabidiʼdootsił; beʼawééʼ bitsʼą́ą́ʼ nihídahidiiltsxisgo kódaníshéhígo nihidadílʼáa dooleeł; sáanii daaltsáanii yighá deidoogish.
