Hosea 2:1-23
2 Nikʼisóó, Ámai,* kóbidiní, áádóó nilahkéí, Ruhámah,* kóbidiní.
2 Nihimá nídeinohkąąh, háálá kʼad doo sheʼasdzą́ą́ jílı̨́į da áádóó kʼad doo hahastiin nishłı̨́į da. Bee hweʼajiłígíí hániʼdii yóóʼazhdiʼaahgo bił ahizhdilyéhígíí habeʼastseʼ bitsʼą́ąjįʼ kójílééh,
3 áko doo ákójínééhgóó éí tʼáá hoʼdizhchínígi átʼéego tʼáá łichíʼígo áhodeeshłííł áádóó honoojíigi tʼáá hóółtseii nahalingo áhodeeshłííł índa dibááʼ hodiyoołhééł.
4 Haʼáłchíní ałdóʼ doo baa aʼáhí dínéesįįł da, háálá ałjiłnii baʼáłchíní danilı̨́.
5 Jó, bimá ałjiłgo nibiishchínígíí ałdóʼ tʼóó baa yáhásinígi áhóótʼįįd; jó kóní, Bił ałchʼįʼ dah daashwoʼii* bikééʼ tádíshyeed dooleeł; éí bááh índa tó shaa dayiikaah; aghaaʼ shí dooígíí áádóó naakʼąʼ shiʼééʼ ádeeshłíłígíí índa áliv akʼah shí dooígíí áádóó yishdlánígíí ałdóʼ yee shaa dajoobaʼ.
6 Éí bąągo chʼil deeníní honídeeshtʼih áádóó hadádiʼdeeshtłʼı̨́įłgo tʼáadoo chʼíjóyaʼjįʼgóó áhodeeshłííł, jóʼakon.
7 Bił ałchʼįʼ dah dajilwoʼii bikééʼ náázhdiilwoʼ nidi, doo łaʼ bił jididoodił da; házdéezʼı̨́įʼ nidi, doo bikʼízhdoogáał da; ákohgo ázhdidooniił, Átséédą́ą́ʼ shahastiin nítʼéeʼii bichʼįʼ tʼóó nihéédeeshdááł, háálá éí aláahgo yáʼátʼéehgo bił tádíshʼaash nítʼééʼ.
8 Áko baa hánilígíí doo yaa ákonízin da; éí tłʼoh naadą́ą́ʼ áádóó wáin ániidíii áádóó akʼah ádaatʼéii índa béésh łigaii áádóó óola kʼeeʼąą yilzhishgo éí bidiyin Béíyal* wolyéii yá choyoołʼı̨́ı̨́ nítʼééʼ.
9 Éí bąą daʼneestʼą́ą́ góneʼ náádeeshdáałgo shitłʼoh naadą́ą́ʼ índa wáin ániidíii bitsʼą́ą́ʼ nahjįʼ kónídeeshdlííł áádóó tʼáá łichíʼígo bee háázhdiitʼįįh doo biniyé aghaaʼ índa naʼatʼą́hí łigaii ditsʼidgo yistłʼónígíí baa deetʼą́ nítʼéeʼii bitsʼą́ą́ʼ nahjįʼ kónídeeshdlííł.
10 Yił ałchʼįʼ ádaatʼíinii binááł tʼóó baa yáhásingo jiinánígíí yitʼíní ádeeshłííł áádóó tsʼídá doo łaʼ shílákʼeedóó yisdáhółtééł átʼée da dooleeł.
11 Baa hoł hózhóonii tʼáá átʼé éí ádaʼazįįd nídeitʼaahii áádóó dah yiitą́ągo hááʼáyı̨́ı̨́h jı̨́ áádóó hohááʼáyı̨́ı̨́h jı̨́ índa dahozdísingo áłah nídaʼadleehii tʼáá ałtso nahjįʼ kódeeshłííł.
12 Hachʼil naʼatłʼoʼii índa hatsin fig naazkaadii hatsʼą́ą́ʼ deeshchǫǫł; éí, Bił ałchʼįʼ dah daashwoʼii shichʼįʼ nidayiiléego shaa dayiiznil, jiníigo baa yájííłtiʼ, nidi tʼáá ałtsoní bee hodíłchʼilgo ádeeshłííł áádóó nidaaldlooshii yaa nahodidookah.
13 Béíyal* wolyéii bichʼįʼ didlidgo nááhániihii náájiisniiʼgo biniinaa atíhodeeshłííł. Jaatłʼóół índa tsé daʼílíinii tʼéí bee háázhdiitʼįįh áádóó bił ałchʼįʼ dah dajilwoʼii bikééʼ yóóʼaníjílwoʼ áádóó shaa jiyooznah, ní Bóhólníihii.
14 Éí bąągo ádíchʼįʼgo kóhodeeshłíiłgo honoojíijįʼ ahodeesłóós, jóʼakon; áadi hazhóʼó hachʼįʼ hadeesdzih.
15 Áádę́ę́ʼ nídzídzáago hachʼil naʼatłʼoʼii haa nídideeshʼááł áádóó Éíkor honíteel* góyaa chohooʼı̨́įgo chʼéʼétiin há ádeeshłííł, áko ániid nijigháádą́ą́ʼ tʼáá Ííjip kéyahdę́ę́ʼ chʼízhníyáago hoł hózhǫ́ǫgo hojitaałígi átʼéego hojitaał doo.
16 Éí bijı̨́ shahastiin náshididííʼniił, nidi bóhonishníihii doo nááshidíʼníi da doo, ní Bóhólníihii.
17 Béíyal bee dawójíii doo náájójíígóó áhodeeshłííł, áko náásgóó dabízhiʼ doo bééjílniih da dooleeł.
18 Éí bijı̨́ naaldlooshii áádóó tsídii índa nidaaʼnaʼii bił bee ahaʼdeetʼáanii há ádeeshłííł: Ałtı̨́ı̨́ʼ índa diltłish ałtso ádeeshdįįł áádóó anaaʼ baa naʼaldeehii nidootʼih. Ákohgo hasih hazʼą́ągi háádaalyı̨́įhgo ádeeshłííł.
19 Áádóó hoolʼáágóó náʼdeeshheh; tsʼídá tʼáá ákogi átʼéii áádóó doo daadeitʼéégóó áádóó ayóóʼánóshʼníigo índa naa aʼááh nisingo náʼdeeshheh.
20 Shaʼahódlíigo náʼdeeshheh áádóó Bóhólníihii bééhonísin dooleeł.
21 Éí bijı̨́ wótʼááh bichʼįʼ tʼą́ą́ʼ háádeesdzih áádóó éí nahasdzáán yichʼįʼ tʼą́ą́ʼ háádoodzih, ní Bóhólníihii.
22 Índa nahasdzáán éí tłʼoh naadą́ą́ʼ áádóó wáin ániidíii índa akʼah yichʼįʼ tʼą́ą́ʼ háádoodzih, áádóó éí Jézriyel* yichʼįʼ tʼą́ą́ʼ háádadoodzih.
23 Áko ádá kʼihodideeshłééł; doo haa aʼááh nisin da yę́ę haa aʼááh dínéesįįł, áádóó, Doo shidineʼé danohłı̨́į da, hoʼdiʼníí nítʼéeʼii, Kʼad shidineʼé danohłı̨́, bidideeshniił, áko, Ni tʼéí nihiDiyin God nílı̨́, dashididooniił.
Footnotes
^ Ámai éí shidineʼé jiníigo óolyé.
^ Rohámah éí baa aʼááh hasin hazlı̨́ı̨́ʼ jiníigo óolyé.
^ Kéínan dineʼé bidiyin dabidiʼníinii ááhyiłní.
^ Saad Łaʼ Ááhdeiłníinii bee bééhózinígi yíníłtaʼ.
^ Saad Łaʼ Ááhdeiłníinii bee bééhózinígi yíníłtaʼ.
^ Achʼįʼ nahwiiʼná honíteel ááhyiłní. Josh. 7:24-26.
^ Kweʼé Jézriyel jiníigo Ízrel ááhyiłní. Hos. 1:4.
