Hosea 4:1-19
4 Ízrel dineʼé danohłíinii, Bóhólníihii áníinii deínółtsʼą́ą́ʼ, háálá tʼáá aaníinii áádóó ajoobaʼii índa Diyin God yééhósinii ádinígíí biniinaa díí kéyahgi kéédahatʼíinii Diyin God bikʼéháʼááh.
2 Tʼóó daʼahódziih, dabiyoochʼííd, tʼóó nidaʼałtseed, daʼniʼįįh áádóó ahaa daʼdilyéego tʼóó tséʼédin áhooniił; tʼáá ałkééʼ nidaʼahiltseedgo bidił bitsʼádaazlı̨́įgo ádaalneʼ.
3 Éí bąą kéyah chaał nidiʼniʼ áádóó yiiʼ kéédahatʼíinii tʼáá ałtso naaldlooshii índa tsídii bidaʼniiná; tʼáá aaníí łóóʼ ałdóʼ daniné.
4 Ákondi diné náánáłaʼ tʼáadoo yináádiiltłiʼí índa tʼáadoo łaʼ yiditehí, háálá nihidineʼé nááʼiiłniihii yichʼįʼ saad dahółónígi ádaatʼé.*
5 Jı̨́įgo áádóó tłʼéeʼgo nihí áádóó áhodooníiłii yaa halneʼii ałdóʼ bił dadidohgoh áádóó nihimá ádeeshdįįł.
6 Shidineʼé doo shéédahojísinígíí bąą ádzísdįįd; doo tʼáá kʼad shéédahoosįįdígíí biniinaa shí ałdóʼ shinááʼiiłniihii danohłíinii doo nihidínéesįįł da áádóó łah Diyin God bibee hazʼáanii baa deisoonahgo biniinaa shí ałdóʼ nihaʼáłchíní tʼóó beidiyeeshnah.
7 Wózhǫ́ kʼeeʼąą dínéestʼą́ągo tʼah biláhígo shichʼįʼ ádił nináádaʼiisííʼ. Éí bąą bee baa dahaʼniihii tʼóó baa yádahasingo ádeeshłííł.
8 Shidineʼé ádił nidaʼiilzíhígíí yee hwiih danilı̨́ áádóó yee ádił nidaʼiilzíhígíí kʼad yidáahjįʼ biʼniiná.
9 Diné ádaatʼéhígi átʼéego nááʼiiłniihii ákódajítʼé. Áko ádajítʼéii bąą atíhodeeshłííł áádóó baa nidajikaígíí biniinaa kʼééhodideeshdlííł.
10 Daʼayą́ą doo nidi, doo hwiih dadooleeł da. Adilyé yaa naakai doo nidi, baʼáłchíní ádaadin doo, háálá Diyin God dadzółtsʼą́ą́ʼ yę́ę doo dazniizı̨́įʼ da.
11 Ałjiłnii áádóó wáin índa wáin ániidíii biniinaa doo akʼidazhdootą́ą́ʼ átʼée da.
12 Shidineʼé bitsin dayókeed áádóó bigish éí tʼáá aaníí átʼéii nihaa deididooʼááł danízin, háálá ałjiłniigi átʼéego nitsídaakeesgo biniinaa biDiyin God yitsʼą́ą́ʼ yóóʼadahaaskaigo ajił tʼéí bił nidahodíłchiid.
13 Dziłghą́ąʼdi náádaʼiiłniihgo dawókʼą́ą́góó chéchʼil biyaagi, tʼiistsʼóóz biyaagi índa tʼiis biyaagi tsin bijeeh dilidgo łikání halchinii náádayiiłniih, háálá bichahaʼohgóó tʼóó dahózhóní yeeʼ.
Éí bąągo danihichʼéʼéké ajił bił nidahodíłchiid áádóó danihizhááʼáád tʼóó daʼdilé.
14 Danihichʼéʼéké ajił tʼóó bił nidahodíłchiidgo áádóó danihizhááʼáád daʼdiléego éí doo atídeeshłíił da, háálá diné danilínígíí tʼáá bí ałjiłnii yichʼįʼ chʼíʼídiyooʼnił áádóó ałjiłnii yił nidahałáago* nááʼiiniih yaa naakai; éí bąą diné tsʼídá doo akʼidaʼdootą́ą́ʼ átʼéégóó tʼóó nidaʼádiilchǫǫh.
15 Ízrel dineʼé nohłíinii, azhą́ daʼołjił nidi, Júdah dineʼé ádił daʼoolziih lágo. Kin shijaaʼ Gílgal* góyaa doo doohkah da índa Beth-éíven* góde ałdóʼ dooda. Tsʼídá tʼáá aaníí Bóhólníihii hiná; doo tʼáá ádzaagóó ádee hadidoohdzih da.
16 Háálá béégashiitsaʼii tʼą́ą́ʼ sitínígi átʼéego Ízrel dineʼé daasteeʼ. Ákoósh hootsogi dibé yázhí ałchozhígi átʼéego Bóhólníihii biʼiisą́ą doo?
17 Íífreiyim éí eʼelyaii bichʼįʼ nahadlá bił ayóó áhootʼé; tʼáadoo baa nánítʼíní.
18 Tó tsiʼnaʼiiłáii ałtso dayoodlą́ąʼgo tʼáá áłahjįʼ bidaʼajił yaa deíkááh; binanitʼaʼí danilíinii baa yáhásinii tʼéí bił ayóó ádahootʼé.
19 Bił yóóʼííyolii daazlı̨́ı̨́ʼ, áko náádaʼjiiłniihgo biniinaa tʼóó ádaa yá dazdínóodzįįł.
Footnotes
^ Éí doodaiiʼ, nááʼiiłniihii danohłíinii, nihikʼi hodiishʼaahgo átʼé.
^ Diné éí ałjiłnii yił daʼakʼeedgo diyin bidiʼníinii yichʼįʼ nidahałáago aneestʼąʼ tʼóó ahayóí dooleeł, danízin.
^ Saad Łaʼ Ááhdeiłníinii bee bééhózinígi yíníłtaʼ.
^ Hííbrew kʼehjí Beth-éíven jiníigo éí kin doo yáʼáshóonii jiníigo óolyé.