Hosea 6:1-11
6 Tįʼ, Bóhólníihii bichʼįʼ tʼą́ą́ʼ nídiikah, háálá bí ninihiizhnizh, áko bí nánihidoołdzih; adanihideesnih nidi, hashtʼéénihidoodlííł.
2 Naaki yiską́ą́dóó bikʼijįʼ hinááh ánánihidoodlííł; tááʼ yiską́ągo náánihididoołjahgo binááł dahiniiʼnáa dooleeł.
3 Haaʼíshąʼ Bóhólníihii béédahoniilzin dooleełgo yéego hádeiitʼı̨́į doo. Tʼáá abíní náʼoodleełígi átʼéego chʼíhodoołeeł; átsé hodiłtı̨́hígíí índa akéeʼdi nahałtı̨́hígíí bee nínáháltłohígi átʼéego nihaa hodooleeł.
4 Íífreiyim nílíinii, haash nideeshłííł? Júdah nílíinii, haash nideeshłííł? Bee yáʼánóhtʼéhígíí éí abínígo áhí dah shoogishígíí nahalin; abínígo dahtooʼ tʼáá áko ádįįhígíí nahalin.
5 Éí bąągo shá dahalneʼii danilíinii bee nahoyéłneʼ; shizaad bee ádahoséłdįįd áádóó jishgishígíí nahalingo há nihodeeshʼááł.
6 Háálá aa aʼááh hasin éí nisin, nááhániihii éí dooda, áádóó didlidgo nááhániihii biláahgo Diyin God yéédahósinígíí nisin.
7 Nidi átsé hastiin ádzaaígi átʼéego shibee ahaʼdeetʼáanii kʼídeiztiʼgo naʼadloʼ shindayiisdéél.
8 Gíliyad* kin haalʼáádóóígíí ádił nidaʼiilzííh áádóó nidaʼałtseedgo dił nidaashchiiʼgo ádahaleʼ.
9 Daʼniʼįįhii éí diné yaa niheekaígi átʼéego Shííkem kin haalʼáágóó* atiin bąąhgóó náádaʼiiłniihii áłah nádleehgo nidaʼałtseed; doo ákǫ́ǫ́ áhátʼíinii yaa naakai.
10 Dineʼé Ízrel bee wójíhígíí bitahgi tsʼídá doodahígi ádaatʼı̨́įgo yiiłtsą́. Ákwii Íífreiyim beʼajił hólǫ́; Ízrel ádoolchxǫʼ.
11 Shidineʼé éí yáʼádaatʼéehii bííʼ danilíinii baa nídiníʼą́ągo, Júdah nílíinii, ni ałdóʼ nibaʼ aneestʼą́ągo ná hazʼą́ą doo.
Footnotes
^ Jórdan tooh haʼaʼaahjígo kin haalʼá.
^ Jerúsalem kin haalʼáádóó náhookǫsjígo tádiindóó baʼaan dı̨́ı̨́ʼ tsin sitą́.
