Hosea 9:1-17
9 Ízrel nílíinii, ałʼąą dineʼé bił nidahoozhǫǫhígi átʼéego tʼáadoo nił nihoozhǫǫhí, háálá niDiyin God bitsʼéíníyáago íłjił nítʼééʼ; daʼoolchʼííhgóó tʼáá átʼé ałjiłnii nááyííłbįįhii nił ayóó áhootʼéé nítʼééʼ.
2 Oolchʼíihgi índa wáin bąąh hahaʼníihgi tʼáá bíniʼídi doo haʼdoołtsoł da; wáin ániidíii ałdóʼ bá ádin doo.
3 Díí Bóhólníihii bikéyahgi doo náádahojídlǫ́ǫ da dooleeł, nidi Íífreiyim dineʼé éí Ííjip kéyahgóó nihéédookah índa Asíriya kéyahgi chʼiyáán dááchǫʼii deiyą́ą doo.
4 Wáin éí Bóhólníihii bichʼįʼ nááhániihígíí doo yadeidooził da índa náádayiiłniihígíí doo yaa bił hózhǫ́ǫ da doo. Náádayiiłniihígíí éí yínííł nidaakaii dabibááh nidahalin; éí dayííyą́ʼígíí tʼáá ałtso nidabiiłchxǫǫh doo; bááh náádeidiyoołnihii tʼáá bí tʼéí dabibááh átʼée doo, áko Bóhólníihii bikin góneʼ doo yah adookáał da.
5 Hodílzingo áłah náʼádleeh néitʼaah góneʼ haa daohtʼı̨́į doo? Bóhólníihii bá hodílzingo áłah náʼádleeh bijı̨́ı̨́ góneʼ haa daohtʼı̨́į doo?
6 Háálá óʼoodįįłii yikʼee aheeskaigo Ííjip dineʼé éí áłah áhodoolííł áádóó Mémfis kin haalʼáádóó* dineʼé yóóʼádahodoolííł, jóʼakon; béésh łigaii bá hazʼánígi chʼil ahoshí hadínóotʼı̨́ı̨́ł; dabiníbaal góneʼ chʼil deeníní hadínóotʼı̨́ı̨́ł.
7 Atíbidiʼdoolníłígíí baa hoolzhiizh índa kʼéébidiʼdoolnííł beiníłką́. Ízrel dineʼé bił bééhodoozįįł; áhodooníiłii yaa halneʼii doo áhályą́ą da; níłchʼi kʼehgo diné yáłtiʼii diigis silı̨́ı̨́ʼ, háálá tʼóó ahayóígóó ádił nidaʼiyoołzííʼ áádóó ayóó átʼéego bikʼee dadinohniih.
8 Halneʼii éí shiDiyin God yił Íífreiyim yikʼi haʼídéesʼı̨́ı̨́ʼ nítʼééʼ, nidi tʼáá hidighááhgóó tsídii bee wódleehí bá naaznil áádóó biDiyin God bikin biiʼ góneʼ bikʼeʼ diniih hólǫ́.
9 Tsʼídá tʼáá Gíbiyah kin haalʼáadi bídayééłkaah yę́ędą́ą́ʼ átʼéhígi átʼéego díí diné ałdóʼ tʼáá bí ádadoolchxǫʼ; Bóhólníihii éí doo ákwii ádáátʼįįdii yénálniih doo; ádił nidaʼdziiszíiʼii biniinaa atíhodoolííł.
10 Ízrel éí honoojíigi chʼil naʼatłʼoʼii bikʼízhníyáhígíí nahalingo bikʼíníyá. Tsʼídá átséedi tsin fig bineestʼąʼ neestʼánígíí nidahojílingo dahazhéʼé yę́ę daashʼı̨́ı̨́ nítʼééʼ, nidi Béíyal-píyor yaa haaskaigo baa yáhásinii yá atsʼáʼádadeestʼą́ áádóó ayóóʼádayóʼnínígíí yił ahidaałtʼéego doo daaldinii daazlı̨́ı̨́ʼ.
11 Íífreiyim dineʼé yee ayóó átʼéii tsídii yóóʼeetʼaʼ nahalingo bił yóóʼahodoogááł, áko doo bá niʼiichíih da doo áádóó doo bá ootsą́ą da doo índa tsʼídá doo bá íʼdíʼnóotsąął da.
12 Azhą́ áłchíní bee hazlı̨́įʼ nidi, doo dahinaahgóó yąąh dabíniʼgo ádeeshłííł, áko diné doo łaʼ yidziih da doo. Tʼáá aaníí, bitsʼą́ą́ʼ dah diiyáago doo hojoobaʼ ájíníi da.
13 Íífreiyim éí Táir ayóó áhonóolningi bił hazʼánígi átʼéego yiiłtsą́. Íífreiyim baʼáłchíní nidadootsiłjįʼ ayííʼeezh.
14 Bóhólníihii nílíinii, haʼátʼíishąʼ baa didííʼááł? Bitsʼą́ą́ʼ atsą́ haʼiiʼeełgo índa abeʼ atseʼ biiʼ abeʼ ádingo ádíílííł.
15 Doo yee yáʼádaashóonii tʼáá ałtso Gílgal kin shijaaʼgi hólǫ́;* ákwii dahojooshłxáá nítʼééʼ. Doo yáʼádaashónígi ádaatʼínígíí biniinaa shighandóó chʼíhodínéeshkał, áko doo ayóóʼánááhwííníshʼníi da dooleeł; binanitʼaʼí danilíinii tʼáá ałtso shikʼijįʼ danilı̨́.
16 Íífreiyim atíbiʼdiilyaa, behétłʼóól danilíinii ałtso bił nídahooltsei. Bineestʼąʼ doo bąąh náhódleʼ átʼée da. Azhą́ nináádaʼiiłchíih nidi, badaʼáłchíní ayóóʼádayóʼníinii tʼóó naastseed dooleeł.
17 ShiDiyin God éí nahjįʼ kóhodoolííł, háálá doo dadzółtsʼą́ąʼ da nítʼééʼ. Áko ałʼąą dineʼé bitahgóó ałtso taizhdookah.
Footnotes
^ Díí kin haalʼáii Naf ałdóʼ hoolyé.
^ Saad Łaʼ Ááhdeiłníinii bee bééhózinígi yíníłtaʼ. Josh. 5:2-9.
