Isaiah 11:1-16
11 Jésii behégod biiʼdóó łaʼ háádínóosééł áádóó behétłʼóól bitsʼą́ą́dóó Bitsʼáozʼaʼ hadínóosééł,
2 áko Bóhólníihii biNíłchʼi Diyinii bikʼi hwiidooleełgo níłchʼi bee hódzáanii áádóó bee akʼidiʼiitįįhii, níłchʼi kótʼée doo níinii áádóó bidziilii, níłchʼi bee ééhózinii áádóó Bóhólníihii dílzin bił hólǫ́ǫ doo;
3 Bóhólníihii dílzin yaa bił hózhǫ́ǫ doo. Dayiiłtseʼígíí bikʼehgo doo einítʼı̨́į da doo, índa yidiitsʼaʼii bikʼehgo doo ánihwiiʼaah da doo,
4 nidi badahojoobáʼíii tsʼídá tʼáá ákwii átʼéego yikʼi hadidoodzih, áádóó nahasdzáán bikááʼgóó doo adááh yádaałtiʼii tʼáá ákogi átʼéego yá hadoodzih; tsihał nahalingo bizééʼdę́ę́ʼ hahwiileehgo yee nahasdzáán atíidoolííł áádóó biyol yee ałdóʼ doo yáʼádaashóonii íidoołdįįł.
5 Tsʼídá tʼáá ákogi átʼéii yee ákászaaz, áádóó tsʼídá baʼahódlíii yee ákászaaz.
6 Mąʼiitsoh éí dibé yázhí yił kééhatʼı̨́į doo, áádóó náshdóítsoh łikizhii éí tłʼízí yázhí yił tʼááłáhígi shitéezh doo, índa béégashii yáázh áádóó náshdóítsoh bitsiijįʼ ditłʼooígíí biyázhí áádóó alı̨́ı̨́ʼ neeskʼahii yił tʼááłáhígi shijéeʼ doo, áádóó áłchíní yázhí tábidiʼéesh doo.
7 Béégashii áádóó shash tʼááłáhígóó naʼałchozh doo áádóó dabiyázhí tʼááłáhígóó naazhjéeʼ doo índa náshdóítsoh bitsiijįʼ ditłʼooígíí éí béégashii nahalingo ałchozh doo.
8 Awééʼ tʼah ałtʼoʼii éí tłʼiish báhádzidii biʼáangi naanée doo, índa awééʼ iʼdíítʼóodii éí tłʼiish báhádzidii biʼáán yikʼi déesniiʼ doo.
9 Shidził dílzinii bikááʼ tʼáá ałtsogóó doo atídaʼahidilʼı̨́į da doo áádóó doo nidaʼahiilchǫǫh da, háálá tónteel hadeezbinígi átʼéego nahasdzáán tʼáá níłtéél nítʼééʼ Bóhólníihii bééhoʼdílzin doo.
Dabidisnáanii daadziihígíí bił dahózhǫ́ǫgo nináhidookah
10 Éí bijı̨́įdi Jésii behétłʼóól* nilíinii diné bichʼįʼ dah naʼatʼaʼí nilı̨́įgo bee ééhózin doo; nihokááʼ dineʼé éí há daatʼı̨́į doo áádóó hááhályı̨́įhgi ayóó áhonóolnin doo.
11 Éí beiníłką́ądi Asíriya áádóó Ííjip áádóó Páthras áádóó Iithiyópiya áádóó Íílam áádóó Sháínar kédaayahdę́ę́ʼ áádóó Héímath kin haalʼáádę́ę́ʼ índa táyiʼdę́ę́ʼ kéyah hadaazʼáádę́ę́ʼ éí Bóhólníihii nilíinii bidineʼé yidzíʼígíí yíká adoolniiʼgo shónéidoołtʼeeł.
12 Ałʼąą dineʼé bá dah naʼatʼaʼí bee ééhózinii íidoolííł, áádóó nahasdzáán tʼáá níłtéél nítʼééʼ Ízrel dineʼé yóóʼadabidiistʼáanii índa Júdah dineʼé tadaoskai yę́ę tʼáá dı̨́ı̨́ʼdę́ę́ʼ áłah ánéidoodlííł.
13 Íífreiyim dineʼé daʼoołchʼı̨́dígíí biiʼ hadooldoh, índa Júdah dineʼé biʼanaʼí ábiʼdisdįįd doo; Íífreiyim dineʼé éí Júdah dineʼé doo nááyoołchʼı̨́įd da doo índa Júdah dineʼé éí Íífreiyim dineʼé doo yíniʼ náánéísʼą́ą da doo.
14 Nidi eʼeʼaahjigo łáʼí nidlı̨́įgo híniinahjįʼ Filístiya dineʼé yikʼijįʼ ahidoolkʼih, áádóó tʼáá łaʼ bizhiʼ ee nidlı̨́įgo haʼaʼaahjigo ałtso deidoołnééł; Íídam dineʼé áádóó Móʼab dineʼé yaatįįh nákahgo Áman dineʼé bikʼeh dahółʼı̨́į doo.
15 Áko Bóhólníihii éí Ííjip kéyahgi tónteel bitáala bitsʼáhiníyínígíí ałtso néidoołtsih, áádóó tooh yikʼijįʼ níyol azéesii yił kʼídidoolnihgo tsostsʼidgo danílı̨́įgo íidoolííł; tʼáá hóółtseiigóó diné haʼnaa nidookah.
16 Ííjip kéyahdę́ę́ʼ Ízrel dineʼé háánáá nítʼééʼ yę́ęgi átʼéego bidineʼé daadziihígíí bá Asíriya kéyahdę́ę́ʼ atiin doo.
Footnotes
^ Behétłʼ óól éí bitsʼą́ą́dóó ahoolchíiłii, jiníigo óolyé. Rom. 15:12.
