Isaiah 2:1-22
2 Éímaz biyeʼ Aizéíyah éí Júdah kéyah índa Jerúsalem kin haalʼáii átʼée doogi bee hoł hóóneʼ.
2 Nihodoogáałjįʼ ayííłką́ągo áhodooníiłii éí Bóhólníihii bikin biiʼ sohodizin bidził éí dził aghádahazʼáii biláahdi bohoníłdzilgo ádoolnííł áádóó dah daaskʼidígíí biláahdi ayóó átʼéii ádoolnííł índa ałʼąą dineʼé tʼáá átʼé áajįʼ íílı̨́į doo.
3 Áádóó diné tʼóó ahayóí kódaaníigo deíkáahgo, Sołtįʼ, haaʼíshąʼ Bóhólníihii bidził bighą́ą́ʼgóó éí Jéíkab biDiyin God bikin biiʼ sohodizinjįʼ hahidiikahgo Diyin God átʼéii yínanihiniłtin doo, índa bikʼehgo daʼnítiinii deíníikáah dooleeł, háálá Záíyandóó bee hazʼáanii bee yáhiditéehgo Jerúsalemdóó Bóhólníihii bizaad hahwiileeh doo.
4 Bóhólníihii éí ałʼąą dineʼé yitaʼ sizı̨́į doo áádóó dineʼé tʼóó ahayóí yá nahodiiʼaah doo, áádóó dabidiltłish háádahidootsiłgo bee nihwiildlaadí ádadoolnííł, índa dabitsiidétáán háádahidootsiłgo bee tsin bitsʼáozʼaʼ bee higéshí ádadoolnííł; ałʼąą dineʼé éí diltłish doo ahindayiilyée da doo, anaaʼ nidi doo yínáádahoołʼaah da doo.
Bóhólníihii éí ádaa deidzódlíii yaa nídóotʼįįł
5 Jéíkab baʼáłchíní danohłíinii, hágo, haaʼíshąʼ Bóhólníihii bibee adinídíinii biyiʼ dayíníikáah dooleeł.
6 Jó, nidineʼé Jéíkab baʼáłchíní yóóʼadííníʼą́, háálá haʼaʼaahdę́ę́ʼ doo tʼáá aaníígóó nahagháii hwiiʼ hadadeezbin áádóó Filístiya dineʼé nahalingo náásgóó áhodoonííł yaa halneʼii danilı̨́ índa déʼéyóní baʼáłchíní yił daʼahótąʼ.
7 Bikéyahgi tʼáá íiyisí béésh łigaii áádóó óola yee daʼatʼı̨́; tʼáá ałtsojįʼ tʼáá íiyisí daʼatʼı̨́; bikéyahgóó doo chohooʼı̨́ı̨́góó łı̨́ı̨́ʼ deílʼá; bitsindaabąąs bijáád naakiígíí ałdóʼ tʼáadoo bee danéelą́ʼí da.
8 Bikéyahgóó edaʼalyaii ałdóʼ tʼáadoo bee danéelą́ʼí da; tʼáá bí yindaashnishii yichʼįʼ yaa áńdaatʼįįh; éí tʼáá bí ádayiilaa nítʼééʼ.
9 Éí bąą diné tʼáá bitaʼígi ádaatʼéii índa diné ayóó ádaatʼéii ałdóʼ aʼohgo ádabidiʼdoolnííł. Nidi ádił nidaʼiisíiʼii doo bá yóóʼadidííʼáał da.
10 Éí bąą Bóhólníihii bikʼee ił yéeʼii áádóó yee ayóó átʼéii bitsʼádiʼnílíidii bitsʼąą tsénííʼ góneʼ adoohkahgo łeeyiʼ nídadidoohtʼı̨́ı̨́ł.
11 Éí yoołkáałdi diné bibee ádaa dahodzódliʼ noolninii wóyahgo ádoolnííł áádóó ayóó átʼéego ádaa deidzódliʼii aʼohgo ádoolnííł índa Bóhólníihii tʼéiyá ayóó átʼée dooleeł.
12 Áko tʼáá ałtsoní bee Bóhólníihii beiníłką́ągo diné ádaa dahojiʼniihii áádóó hwee ádaa dahodzódliʼii índa ayóó ádajítʼé ídazhdólzinii tʼáá ádzíłtso hakʼijįʼ nilı̨́įgo daʼjíʼohgo áhodoolííł:
13 Lébanangi gad jílʼáii alááh ádajítʼéii áádóó ayóó ádajítʼéii tʼáá ájítʼé áádóó Béíshangi chéchʼil jílʼáii tʼáá ájítʼé,
14 áádóó dził aghádadzizʼáhígíí tʼáá ájítʼé áádóó ayóó átʼé yáádaalkʼidígíí tʼáá átʼé,
15 áádóó yaʼiiʼáago bikááʼdóó hadaʼalzídígíí tʼáá átʼé áádóó ditą́ągo binaa ahééʼítłʼinígíí tʼáá átʼé,
16 áádóó Társhish kin haalʼáii bitsinaaʼeeł tʼáá átʼé áádóó nidaashchʼąąʼgo daʼílíinii tʼáá átʼé hakʼidiyaa dooleeł.
17 Éí yoołkáałdi diné bee ádaa dahodzódliʼii aʼohgo ábidiʼdoolnííł áádóó ayóó átʼéego ádaa deidzódliʼii wóyahgo ádahodiʼdoolnííł índa Bóhólníihii tʼéiyá ayóó átʼéego baa haʼniih dooleeł.
18 Áádóó edaʼalyaii yę́ę tsʼídá ałtso bił yóóʼahodoogááł.
19 Áádóó Bóhólníihii éí nahasdzáán yidooghał biniyé yichʼįʼ nídiidzáago Bóhólníihii bikʼee ił yéeʼii áádóó yee ayóó átʼéii bitsʼádiʼnílíidii bitsʼąą tsénídahasdzą́ą́góó áádóó aʼą́dahasdzą́ą́góó diné yóóʼahizhdoojah.
20 Éí yoołkáałdi diné éí habéésh łigaii edaʼalyaii áádóó óola edaʼalyaii bichʼįʼ nidahojiłáa doo biniyé ádá ádajiilyaa yę́ę éí naʼazísí yázhí áádóó jaaʼabaní bichʼįʼ adajiiłkaad doo,
21 áko Bóhólníihii éí nahasdzáán yidooghał biniyé yichʼįʼ nídiiʼnaʼgo Bóhólníihii bikʼee ił yéeʼii áádóó yee ayóó átʼéii bitsʼádiʼnílíidii bitsʼąą tsénídahasdzą́ą́góó áádóó tséníʼdaʼdeezbaalgóó yóóʼadajiijeeh doo.
22 Diné biyol hadoolwołii tʼáadoo bichʼįʼ choʼiiniłʼíní, háálá haʼátʼéegoshąʼ haʼahódlíigo haa nitsáhákees?
