Isaiah 36:1-22
36 Heziikáíyah aláahgo naatʼáanii nilı̨́įgo dı̨́ı̨́ʼtsʼáadah náhááh góneʼ Asíriya dineʼé aláahgo binanitʼaʼí Senákerib éí Júdah kéyahgi kin hadaasʼáago ditą́ągo binídaʼastłʼinígíí tʼáá ałtso yichʼįʼ naabaahgo ałtso yisná.
2 Áádóó Asíriya dineʼé aláahgo binanitʼaʼí éí Rábshakeh wolyéii Léíkish kin haalʼáádóó Jerúsalem kin haalʼáágóó siláo tʼóó ahayóí yił aláahgo naatʼáanii Heziikáíyah yichʼįʼ yiyííłʼaad. Áádóó wódahgo tó bá azʼánídóó tó bá aníʼáhígíí bíighahgi iigisgo iilgááh bá hazʼánígíí bichʼįʼgo atiinígi yiizįʼ.
3 Áko Hilkáíyah biyeʼ Iiláíyakim éí aláahgo naatʼáanii bighan bee bóhólníhígíí áádóó Shébna éí naaltsoos ííłʼíní índa Éísaf biyeʼ Jóʼah éí naatʼáaniishchíín nilíinii hachʼįʼ chʼékai.
4 Ákohgo Rábshakeh áhodííniid, Asíriya dineʼé aláahgo binanitʼaʼí ayóó átʼéii ání, Kʼad Heziikáíyah ádabidohní, Haʼátʼíí baʼahódlíí shı̨́įshąʼ baa dzíínílí?
5 Kódíní, shí ádíshní, Anaaʼ biniyé shinahatʼaʼ índa adziil shee hólǫ́, diní, nidi éí saad tʼáadoo nánídlíinii ádaatʼé. Kʼad háishąʼ baa dzíínílíigo shichʼįʼ nanilteeh?
6 Shoo, kʼad díí lókʼaaʼ yiskʼisgo ííʼáhígíí, éí Ííjip dineʼé danilı̨́įgo baa dzíínílí; tʼáá éí diné łaʼ yíniizı̨́įgo bílaʼ baa adoozhosh; tʼáá ádzíłtso éí Ííjip dineʼé aláahgo binanitʼaʼí Féro baa deijólíhígíí ákódahodoolííł.
7 Nidi, Bóhólníihii nihiDiyin God baa dadzííníidlí, dashidooniidgo Heziikáíyah éí dah daaskʼid bighą́ąʼdi ádaalyaaígíí áádóó bikááʼ náádaʼiiniih yę́ę nahjįʼ kóyiilaago Júdah dineʼé áádóó Jerúsalem dineʼé áyidííniid, Bikááʼ nááʼiiniihí bidááhdóó nidahohłá, nihiłníigo éísh doo éí átʼı̨́į da?
8 Éí bąą kʼad nánooshkąąh, shinanitʼaʼí Asíriya dineʼé aláahgo binanitʼaʼí bił ałhaʼdadiʼnohtʼaah. Áko bíninilʼą́ągo łı̨́ı̨́ʼ dabíyeeh dooígíí shóisíníłtʼeʼ ládą́ą́ʼ, łı̨́ı̨́ʼ naakidi mííl naa deeshnił.
9 Haash yitʼéego shinanitʼaʼí bá nidaalʼaʼí aʼohgo ádaatʼéii siláo yinanitʼaʼí nilíinii níwehjįʼ biʼdííłnihgo Ííjip dineʼé bitsindaabąąs bijáád naakiígíí ląʼígo índa dabisiláo łı̨́ı̨́ʼ yee nidaabaahígíí baa dzíínílíi doo?
10 Áko kʼadísh Bóhólníihii tʼáágééd díí kéyahígíí ádeeshdįįł biniyé níyá? Bóhólníihii áshíłní, Nílááh, díí kéyah bikʼijįʼ hasínáahgo áhółdįįh.
11 Nítʼééʼ Iiláíyakim áádóó Shébna índa Jóʼah éí Rábshakeh ádeiłní, Tʼáá shǫǫdí, ná nidaalʼaʼí bichʼįʼ Síriya dineʼé bizaad bee yáníłtiʼ, háálá éí dadiitsʼaʼ; Jew dineʼé bizaad éí tʼáadoo bee nihichʼįʼ yáníłtiʼí, áko tsé ahénátłʼinígíí bikááʼdę́ę́ʼ diné doo dandidootsʼı̨́įł da.
12 Nidi Rábshakeh ání, Shinanitʼaʼíísh nihinanitʼaʼí áádóó nihí nihichʼįʼ hadeesdzihgo biniyé shííłʼaad? Tsé ahénátłʼinígíí bighą́ąʼdi diné dah naháaztánígíí daʼ éísh doo bichʼįʼ shiʼdoolʼaad da? Áko tʼáá bí dabichaan áádóó dabilizh bił nídadíídı̨́ı̨́ł.
13 Áko Rábshakeh yiizįʼgo ayóó íitsʼaʼgo Jew dineʼé bizaad yee haadzíiʼgo ání, Asíriya dineʼé aláahgo binanitʼaʼí ayóó átʼé nanitʼaʼí nilíinii yee hahaasdzíʼígíí dadoohtsʼı̨́ı̨́h.
14 Éí aláahgo naatʼáanii kóní, Tʼááká Heziikáíyah nihiʼdóleeh lágo, háálá éí yisdánihidoojihígíí doo yíneelʼą́ą da.
15 Áádóó Heziikáíyah éí Bóhólníihii baa dadzíínóhłíigo ánihólééh lágo, kóníigo, Bóhólníihii tʼáá aaníí yisdánihidoonił; díí kin haalʼáii Asíriya dineʼé aláahgo binanitʼaʼí doo baa didootʼáał da.
16 Heziikáíyah tʼáadoo deísółtsʼą́ʼí, háálá Asíriya dineʼé aláahgo binanitʼaʼí kóní, Aa doolyéełii bee shił lą́ daʼohłeehgo wóshdę́ę́ʼ shichʼįʼ chʼínóhkááh, áádóó tʼááłáʼí nootínígo nihichʼil naʼatłʼoʼii áádóó nihifig sikaadii bąąhdóó daʼohsą́ą doo áádóó tʼááłáʼí nootínígo nihitoʼ bá naʼazʼą́ą́dóó daʼohdlą́ą doo;
17 kéyah tʼáá nihí nihikéyah nahalingo, kéyah bikááʼ tłʼoh naadą́ą́ʼ áádóó wáin ániidíii hólóníjįʼ índa kéyah bikááʼ bááh áádóó chʼil naʼatłʼoʼii hólǫ́ǫjįʼ anihideeshʼish biniyé nisháahjįʼ ákódanohtʼée doo.
18 Hadaʼísídółʼı̨́ı̨́ʼ, áko Heziikáíyah nihiʼdóleeh lágo kóníigo, Bóhólníihii éí yisdánihidoojih. Ałʼąą dineʼé bidiyin danilíiniísh łaʼ dahakéyah Asíriya dineʼé aláahgo binanitʼaʼí yighadeideestʼą́?
19 Héímath kin haalʼáádóó índa Árpad kin haalʼáádóó dabidiyinii éí háájí? Séfarvéíyim kin haalʼáádóó dabidiyinii éí háájí? Daʼ éísh Samériya kéyah shighadeideestʼą́?
20 Kédaayahdóó dadiyin tʼáá ałtso bitahdóó háídíígíishąʼ hakéyah shighaideetʼą́, áko Bóhólníihii éí Jerúsalem doo shighaididootʼáał da?
21 Nidi dineʼé dadéesxéelgo saad tʼááłáʼí nidi, tʼáadoo yee yichʼįʼ hadaasdzíiʼ da, háálá aláahgo naatʼáanii haadzíiʼgo ání, Doo bichʼįʼ háádadoohdzih da.
22 Áko Hilkáíyah biyeʼ, Iiláíyakim éí aláahgo naatʼáanii bighan bee bóhólníhígíí áádóó Shébna éí naaltsoos ííłʼíní índa Jóʼah éí naatʼáaniishchíín ákʼindaʼiisdláadgo Heziikáíyah yaa yíkai áádóó Rábshakeh bizaad yee yił dahoolneʼ.
