Isaiah 42:1-25
42 Shá naalʼaʼí de íínísinii, éí nídiiłtíinii shiiʼ sizíinii yaa bił hózhóonii níníłʼı̨́; shiNíłchʼi Diyinii baa diníʼą́; tʼáá ákogi átʼéii ałʼąą dineʼé bichʼįʼ bééhózingo íidoolííł.
2 Éí doo dilwosh da doo, áádóó biinééʼ doo chánah íidoolíił da; kintah daʼnítiingóó nidi biinééʼ doo łaʼ jididootsʼı̨́įł da.
3 Lókʼaaʼ yiskʼisii nidi doo kʼíidootih da, índa bee hoolʼiní biih yítʼiʼígíí tʼóó bilid nidi doo yidínóołtsis da, índa tʼáá aaníinii bikʼehgo tʼáá ákogi átʼéii bééhózingo íidoolííł.
4 Nahasdzáán bikáaʼgi tʼáá ákogi átʼéii bohoníłdzilgo áyiilaajįʼ doo dínóołnah da, doo nidi bąąh nahodookał da, áádóó tónteel bibąąhgóó kéyah éí bibee hazʼáanii yibaʼ ádaatʼée doo.
5 Diyin God Bóhólníihii nilíinii éí yádiłhił áyiilaago kʼíístsʼǫ́ǫdii áádóó nahasdzáán áádóó biyiʼ hólóonii yił kʼíístsʼǫ́ǫdii áádóó bikáaʼgi diné nídídzihgo índa níłchʼi yee hináago áyiilaii ání,
6 Shí Bóhólníihii nishłíinii tʼáá ákogi áníshtʼéego níízhiʼ, áádóó nílaʼ yíníshtąʼgo naa áháshyą́ą doo, índa diné bá bee ahaʼdeetʼáanii nílı̨́įgo ándeeshłííł, áko ałʼąą dineʼé bá adinídíín nílı̨́į doo;
7 doo daʼooʼíinii binááʼ ąą ádadoonííł; awáalyaadę́ę́ʼ awáalyaaí chʼíhidííʼish, áádóó chahałheełgóó nidaháaztáanii awáalyaadę́ę́ʼ chʼíhidííʼish biniyé ákóndeeshłííł.
8 Shí Bóhólníihii nishłı̨́; tʼáá éí shízhiʼ; bee ayóó áníshtʼéii doo náánáłaʼ baa dideeshʼáał da; bee shaa haʼniihii doo edaʼalyaii bichʼįʼ kódeeshłíił da.
9 Jó, ałkʼidą́ą́ʼ yę́ę baa dahwiishzhiizh áádóó tʼáadoo leʼé ádaaniidíii baa hashneʼ; tʼah doo dahaleehdą́ą́ʼ tʼáá bítséedi bee nihił hashneʼ.
Bóhólníihii bidziilgo yisdáʼíínilgo baa haʼniih
10 Tónteel góyaa ałnáádaakahii áádóó tʼáá ałtso biiʼ dahólóonii índa táyiʼdę́ę́ʼ kéyah hadaazʼáii áádóó biyiʼ dahólóonii índa yikááʼ kéédahatʼíinii danohłíinii, nidahoneesʼą́ą́dę́ę́ʼ sin ániidíii bee Bóhólníihii baa haʼniihgo dahohtaał.
11 Honoojí áádóó bikin hadaasʼáii tʼáá éí Kíídar dineʼé atah kééhatʼíinii bíniʼdii biinééʼ chánahgo ádeiilééh; bíniʼdii tsé yikááʼ kéédahatʼíinii dahataał; dziłghą́ą́ʼdę́ę́ʼ bíniʼdii dadilwosh.
12 Bíniʼdii Bóhólníihii yaa dahaniih leʼ, áádóó tónteel bibąąhgóó kéyah Bóhólníihii bee baa haʼniihii yaa dahalneʼ leʼ.
13 Diné ayóó ábóodziilígi átʼéego Bóhólníihii náás dahodidooleełgo diné naabaahii nahalingo oochʼı̨́ı̨́d yee yíneedlı̨́įgo nídiildzil; chánahgo ádidooniił; tʼáá aaníí, ayóó íídóotsʼı̨́ı̨́ł; biʼanaʼí danilíinii yikʼeh didoodleeł.
14 Kʼé nísdzingo nízaadgóó ahoolzhiizh; hashtʼedííníshtʼéego tʼą́ą́ʼ kóʼádííníszin nítʼééʼ; kʼad asdzání éí awééʼ bídiiʼnaʼígi átʼéego yishchago tʼáá łahjįʼ anáshiłgo hasdah nanishgoʼ.
15 Dził áádóó dah daaskʼidii chʼil bąąh dahólóonii dadeeshgą́ąłgo tʼáadoo biniyéhí da dooleełgo áádóó tooh danílínígóó kéyah nídahodoodleeł nidahalingo índa tó naazkánígíí dahóółtseiigo ádeeshłííł.
16 Áádóó doo daʼooʼíinii honítʼiʼ éí doo bił béédahózinii bił nídeeshkah índa atiin doo dahooʼı̨́ı̨́dę́ę́ʼ bił nídeeshkah; bidáahgi chahałheełígi adinídíingo áádóó nidahoneestłʼiizhígíí kʼéhézdongo ádeeshłííł. Doo yóóʼadideeshʼááłgóó kótʼéego bá ádeeshłííł.
17 Edaʼalyaii yaa dadzólíii áádóó, Nihidiyin danohłı̨́, deiłníinii éí tʼą́ą́ʼ kónídadeeshdlíiłgo ádaa yádadínóozįįł.
Ízrel dineʼé atíbiʼdiilyaa nidi tʼáadoo yitsʼą́ą́dóó ídahoołʼą́ąʼ da
18 Nihijédaahkałii daʼdoohtsʼı̨́ı̨́h áádóó doo daʼoohʼíinii dadohhaał, áko daʼiidoołtsééł.
19 Háísh doo ooʼı̨́į da? Jó, shá naalʼaʼí lą́ą. Háishąʼ shá haneʼ neiʼáhí yíłʼaadii bijééhkałígi átʼé? Tʼáá ákogi áníshtʼé nízinii éí Bóhólníihii bá naalʼaʼí doo ooʼı̨́į daígíí háísh ákódaatʼé?
20 Ląʼígóó ninááł áhóótʼįįd nidi doo baa ákonínízin da; doo nijééhkał da, nidi doo adinitsʼaʼ da.
21 Bóhólníihii bitʼáá ákogi átʼéii binahjįʼ bee hazʼáanii ayóó átʼéego áádóó ił nilı̨́įgo íidoolíiłgo tʼáá íiyisí bił hóóshǫǫd.
22 Ákondi díí dineʼé bee daʼneestʼı̨́ı̨́ʼ áádóó bighadaʼiisʼnil; tʼáá ałtso aʼáán bee dabiʼdisdloh áádóó awáalyaa góneʼ nídabiʼdeesʼı̨́ı̨́ʼ; tʼáá áłahjįʼ biʼdisnáanii áádóó binaalyeʼé bighadahaʼníiłii danilı̨́, áko doo łaʼda yisdábóníłí da, áádóó doo łaʼda kóbíłníi da, Béédadohchííd.
23 Háísh nihitahdóó díí yididootsʼı̨́ı̨́ł? Háísh daʼíístsʼą́ąʼgo ádahodooníiłgo baa haneʼígíí deididootsʼı̨́ı̨́ł?
24 Háísh Jéíkab dineʼé bąąh oogą́ąʼii nilı̨́įgo áádóó Ízrel dineʼé aghadaʼiiʼníiłii baa biʼdeeʼnil? Bóhólníihii éí bichʼįʼ ádił daʼsiilziihígíí doósh éí átʼı̨́į da? Bihonítʼiʼgóó dajíkáah dooígíí doo daznízin da, doo nidi bibee hazʼáanii doo bikʼeh dahojíłʼı̨́į da nítʼééʼ.
25 Éí bąą ayóó átʼéego hashké niidzı̨́ʼígíí índa bidziilgo anaaʼ hakʼi yayiiką́ áádóó éí yee diltłiʼgo íʼdiilyaago doo baa ákozniizı̨́įʼ da índa dookʼą́ąłgo hajéí doo baa nitsídzíkees da nítʼééʼ.
