Isaiah 44:1-28
44 Éí ákótʼée nidi, kʼad shííníłtsʼą́ą́ʼ, Jéíkab shá naalʼaʼí nílíinii índa Ízrel nídiiłtíinii nílíinii,
2 Bóhólníihii Ániilaii índa tʼáá iishchʼid biyiʼdę́ę́ʼ hashtʼeniilaii éí níká adoolwołii ání, Tʼáadoo nił yéʼí, Jéíkab shá naalʼaʼí nílíinii, índa Jéshuran* nídiiłtíinii nílíinii.
3 Háálá dibááʼ nilíinii tó bikʼi yeideesił áádóó niʼ hóółtseiigi tó dooląął; naʼáłchíní shiNíłchʼi łą́ągo baa dideeshʼááł índa nitsʼą́ą́dóó yichíiłii bikʼihojidlíi doo,
4 áádóó tłʼoh bitahgi tó danílı̨́ bibąąhgi kʼaiʼ haníísánígíí nahalin doo.
5 Łaʼ ádidooniił, Shí Bóhólníihii bííʼ nishłı̨́, áádóó náánáłaʼ éí Jéíkab bízhiʼ yee ádójíi doo, índa náánáłaʼ éí bílaʼ yee naʼazogo Ízrel yee ádójíigo Bóhólníihii bííʼ nishłı̨́, níi doo.
6 Ízrel binanitʼaʼí nilíinii Bóhólníihii, éí bikʼé nináʼídláii tʼáá ałtsoní bee Bóhólníihii ání, Shí átséhígíí áádóó akéédę́ʼígíí nishłı̨́, áko diyinii doo łaʼ nááhódlǫ́ǫ da.
7 Ałkʼidą́ą́ʼ dineʼé ninínildą́ą́ʼ áshtʼínígi átʼéego łaʼísh hadoodzihgo yee nihodooʼááł áádóó hashtʼesinilgo shá íidoolííł? Bíniʼdii tʼáadoo leʼé ádahodooníiłii áádóó baa dahodoolzhishii yee yił dahodoolnih.
8 Tʼáadoo nił yéʼí, tʼáadoo nidi náníldzidí; íídą́ą́ʼ doósh haasdzíiʼgo nił hweeshneʼ da? Shá ooʼíinii danohłı̨́. Daʼ diyiniiísh łaʼ nááhódlǫ́? Tʼáá aaníí, diyinii doo łaʼ nááhódlǫ́ǫ da; doo łaʼ shił bééhózin da.
Edaʼalyaii bichʼįʼ nahadlá tʼóó áhodiigis átʼé
9 Edaʼalyaii ádeiłʼínígíí éí tʼáá ałtso tʼáadoo biniyéhí da áádóó ayóogo bił daʼílínígíí doo bee bá ídaʼiideeł da; bá dahalneʼígíí doo daʼooʼı̨́į da, índa doo bił éédahózin da, áko baa yádahodoosįįł.
10 Háishąʼ edaʼalyaii, doodaiiʼ doolyı̨́įʼgo edaʼalyaii tʼáadoo biniyéhí daígíí áyiilaa?
11 Jó, bichʼįʼ nidahałáii tʼáá ałtso yádadínóozįįł, áko ádabiilaii éí tʼáá diné ádaatʼı̨́; bíniʼdii áłah daaleehgo deizįįh; bił daayéeʼgo ahił ádaa yádandzin doo.
12 Atsidii éí tsénił bitsiitsʼiin tsííd biyiʼdę́ę́ʼ hanéíʼáahgo bibee atsidí yee hashtʼeʼniyéʼéłneʼgo bigaan bidziilii yee atsid; tʼáá aaníí, dichin nilı̨́įgo bidziilii nihiniłnééh; tó doo yidlą́ą́góó bił chʼaanáhádleeh.
13 Kin ííłʼíinii bee ídaʼneelʼąąhí tsin yikááʼ niiléehgo bee akʼeʼalchíhí yee daʼiizoh, áádóó tsin bee adiilkǫǫhí yee hashtʼeʼniikʼęh, áádóó diné baa dzólníinii nahalingo wóneʼé dah sizı̨́į doo biniyé názbąsgo bee ahééʼiidzóhígíí yee oozohgo diné sizı̨́ nahalingo ííłʼı̨́.
14 Gad ádá yiitsxeeł áádóó tsin sikaadii sáípres wolyéii índa chéchʼil yílʼáhígi ádá niidiitʼaah; nídíshchííʼ kʼiidiléehgo bikʼi nahałtingo dínísééh.
15 Áádóó índa diné díí łaʼ yee bikǫʼgo yee náʼiidoodził; tʼáá aaníí, łaʼ yee diididoołjahgo bááh íidoolííł; tʼáá aaníí, łaʼ yee bidiyin áyiiłʼįįhgo yichʼįʼ nahałá; beʼelyaii áyiiłʼįįhgo yichʼįʼ náníljoł.
16 Tsin łahjįʼ yidiłidgo yee náʼiidzííł, áádóó atsįʼ yee yiłbéézh índa yee ałtʼeesgo yee hwiih yileeh; tʼáá aaníí, náʼiidzíiłgo áádóó ániih, Kʼad lą́ą, kǫʼ yiiłtsą́ągo náʼiisdziil,
17 áádóó yidziihígíí éí bidiyin áyiiłʼįįh; tʼáá éí biʼeʼelyaii nilı̨́įgo yichʼįʼ tséʼyaa náníljołgo nahałáago sodilzingo kóníigo, Yisdáshíłteeh, háálá shidiyin nílı̨́.
18 Doo bił béédahózin da áádóó doo yikʼidaʼdootą́ą́ʼ átʼée da, háálá doo dajooʼı̨́į da doo biniyé hanááʼ ałchʼįʼ ádayiilaa, índa doo akʼidazhdiʼdootı̨́įł da biniyé hajéí dádaʼdeeskaal.
19 Áádóó doo łaʼda bijéí biyiʼdi yaa ákonízin da, doo nidi bił bééhózin da, doo nidi akʼidiitįįhgo áníi da, Łahjįʼ kǫʼ bee dííłid; tʼáá aaníí, ałdóʼ bitsííd bee bááh síłtʼé índa atsįʼ bee síłtʼéego yíyą́ą́ʼ. Daʼ ákoósh yidziihígíí doo yildingóó ádeeshłííł áádóó tsin ííʼáhígíí bichʼįʼ tséʼyaa dínéeshjoł?
20 Łeeshchʼiih yiyą́; bijéí biʼdeesdloʼígíí łahjigo kóbiilaago biiʼ sizíinii doo yisdéidoołtéeł da, doo nidi ádidooniił da, Shílaʼ nishʼnáájí bee woochʼííd yíníshtąʼ.
Bóhólníihii éí Ízrel dineʼé yikʼé nináʼiidléii nilı̨́
21 Jéíkab ni, Ízrel nílíinii, díí béénílniih, háálá shá naalʼaʼí nílı̨́; hashtʼeʼniníʼníniiʼ; shá naalʼaʼí nílı̨́. Ízrel nílíinii, doo naa yidiyeeshnah da.
22 Kʼos diłhił áádóó áhí yóóʼiilzhoʼígi átʼéego bee hazʼáanii hínítiʼii índa ádił niʼiyínílzíʼígíí ná kʼééʼííłchǫʼ; shichʼįʼ ninánídááh, háálá nikʼé nináʼníshdlá.
23 Yáʼąąshdi dahonohłóonii, dahohtaał, háálá Bóhólníihii ádzaa; nahasdzáán bikááʼdóó dahonohłóonii, hadadołgháásh; dził danohłíinii áádóó tsin dayílʼáii índa tsin tʼááłáʼí níkaadgo, sin hadadohʼaah, háálá Bóhólníihii éí Jéíkab yikʼé nináʼídlá, áko Ízrel binahjįʼ baa haʼniih.
24 Bóhólníihii nikʼé nináʼídláii áádóó iishchʼid biyiʼdi hashtʼeniilaii ání, Shí Bóhólníihii tʼáá ałtsoní áyiilaii áádóó yádiłhił tʼáá sáhí kʼíístsʼǫ́ǫdii índa nahasdzáán niiníłkaadii nishłı̨́;
25 dabiyoochʼíidii bee ééhózinii ádayoolíiłii neheshtʼéehgo nidaʼídíłkidii doo bił dahózhǫ́ǫ́góó ádeileʼii índa hastóí dahóyáanii tʼą́ą́ʼ kódeileʼgo bił éédahózinii doo hódzą́ átʼéégóó ádeileʼii nishłı̨́;
26 éí bá naalʼaʼí bizaad tʼáá aaníigo áyósinígíí áádóó bá haneʼ nideiʼáii yee yádááłtiʼii áyoolíiłii nishłı̨́; tʼáá éí Jerúsalem kin haalʼáii ííłní, Diné niiʼ kéédahatʼı̨́į doo, áádóó Júdah kéyah biyiʼ kin hadaasʼáii ííłní, Áńdanihidiʼdoolnííł índa kintsʼiilgo nahazʼánígóó ałdóʼ áńdadeeshdliił;
27 éí tó daditáanii ííłní, Nídííltsih, áádóó nitooh danílíinii nídadeestsih.
28 Sáíras wolyéii yeinítʼı̨́įgo ání, Shá naʼniłkaadii nilı̨́įgo bídin nishłínígíí íidoolííł; tʼáá aaníí, Jerúsalem kwíididooniił, Áńdiʼdoolnííł, índa kin biiʼ sohodizin kwíididooniił; nitłʼááh nástłʼinii ádoolnííł.
Footnotes
^ Jéshuran éí Hííbrew kʼehjí, Tʼáá ákwii ájítʼéii, jiníigo óolyé.
