Isaiah 52:1-15
52 Záíyan nílíinii, chʼéénídzííd; chʼéénídzíidgo díldzííł; Jerúsalem diyingo kin haalʼáii nílíinii, niʼééʼ nizhónígíí biih ninááh, háálá kʼad kodóó doo bąąh náhineeshgizhii índa chin bąąh hólóonii doo łaʼ nił yah adookah da.
2 Jerúsalem yisnááh nílíinii, nídiidáahgo łeezh ádąąh nigáád áádóó dah nídah; Záíyan bichʼéʼé yisnááh nílíinii, nizénáztʼiʼígíí ádaa diidlé.
3 Háálá Bóhólníihii kóní, Doo bą́ą́h ílínígóó naniʼdiizniiʼ índa béeso tʼáágééd nikʼé nináʼdoolyééł.
4 Jó, Bóhólníihii Diyin God kóní, Shidineʼé áłtséédą́ą́ʼ Ííjip kéyah góyaa eekaigo áá kééhatʼı̨́ı̨́ nítʼééʼ yę́ędą́ą́ʼ Asíriya dineʼé tʼáadoo baanígóó hade ádahósin nítʼééʼ.
5 Tʼáadoo biniyéhígóó shidineʼé yóóʼadajiizhʼeezhgo bąą kʼad kweʼé haʼátʼíí shee hólǫ́? ní Bóhólníihii. Bá nidajilʼaʼí hahóółʼáago shízhiʼ tʼáá ákwíí jı̨́ baaʼihgo bá yátiʼgo hoolzhish, ní Bóhólníihii.
6 Éí bąą shidineʼé shízhiʼ bił béédahodoozįįł; éí bąą ałdóʼ, beiníłką́ądi bił béédahodoozįįł, éí shí áshtʼı̨́įgo haasdzííʼ, éí shí áshtʼı̨́.
7 Dziłghą́ąʼdi haneʼ yáʼátʼéehii bee hózhǫ́ náhoodleełii, éí haneʼ baa hózhóonii bitsʼą́ą́dóó yáʼádaatʼéehii áádóó yisdáʼiildééh yaa halneʼii dooládóʼ bikeeʼ ayóó ánóolnin da; éí Záíyan ííłní, NiDiyin God éí nantʼá!
8 Geʼ, diné ná hadaʼasíidii biinééʼ chánah ádeidoolííł, áádóó tʼáá łaʼ bizhiʼee hadadiʼdooʼááł, háálá Bóhólníihii éí Záíyan bidisnánídę́ę́ʼ nábiníʼeezhgo deizdoołtsééł.
9 Jerúsalem kin haalʼáagi dahóóchxǫʼgo nahazʼánígíí danohłíinii, ił hózhǫ́ náhodoodleełgo tʼáá łaʼ bizhiʼee dahohtaał, háálá Bóhólníihii éí bidineʼé haʼiyoosnííʼ, Jerúsalem yikʼé nináʼídlá.
10 Ałʼąą dineʼé binááł Bóhólníihii bigaan diyinii hachʼįʼ yitʼíní áyiilaa, áko nahasdzáán nidahoneesʼą́ą́dę́ę́ʼ diné tʼáá ałtso nihiDiyin God bibee yisdáʼiildéehii deizdoołtsééł.
11 Dah dohkááh, dah dohkááh, bitsʼą́ąjigo dah dohkááh; chin bąąh hólóonii bidadoołchííd; binííʼdę́ę́ʼ chʼínóhkááh; Bóhólníihii bileetsʼaaʼ deínóhjáahii, chin nihąąh ádaadin ádaʼdołnééh.
12 Jó, doo tsı̨́įłgo chʼídoohkah da, doo nidi chʼídadínóohchéeł da, háálá Bóhólníihii tʼáá bí nihilą́ąjįʼ yigáał doo, índa Ízrel dineʼé biDiyin God éí tʼáá nihikéédę́ę́ʼ nihaa áhályą́ą doo.
Bóhólníihii bá naalʼaʼí tiʼhoozniiʼii
13 Shoo, shá naalʼaʼí hóyą́ągo nidoolʼaał; tʼáá íiyisí ayóó átʼéego abidiʼdoolníiłgo ayóo baa haʼniih; tʼáá íiyisí wódahgo agháhidíízı̨́į doo.
14 Diné tʼóó ahayóí hakʼee tʼóó bił adahóóyóigo diné náádaałaʼ biláahgo haniiʼ bikʼi naʼasgazgo doo bééhózin da; diné ahoolchíiłii biláahgo hakʼi naʼasgaz dzizlı̨́ı̨́ʼ,
15 ákótʼéego ałʼąą dineʼé tʼóó ahayóí hakʼee tsídadoolyis; aláahgo naatʼáanii danilíinii hakʼee dadidoołhił; tʼáadoo bee bił dahóóneʼ yę́ę deidoołtsééł índa tʼáadoo deidiiztsʼą́ą́ʼ yę́ę yaa ákodadínóozįįł.
