Isaiah 54:1-17
54 Doo íłchíii, hótaał; doo ádéíʼiiltʼeʼii, haʼdíʼaah; awééʼ tʼah doo nídiiʼnéehii, yéego hadílgháásh, háálá asdzání ayéehii baʼáłchíní hólónígíí biláahgo doo ałchíii baʼáłchíní hodooleeł, ní Bóhólníihii.
2 Niníbaal siʼą́ągi hótsaago ánílééh áádóó łaʼ tʼáadoodaaí bíniʼdii kééhwiitʼı̨́įgi dáádadeezbaalii deidiłtsʼǫǫd; niníbaal bitłʼóól nineezgo ádanileʼgo índa bá anídaalkałígíí niłdzilgo adaniłkaał.
3 Nishtłʼajigo áádóó nishʼnáajigo naʼáłchíní kʼeeʼąą doolzhish; ałʼąą dineʼé bikédaayah yee ádídahólníih doo índa kin hadaasʼáii doo nidaagháhí da yę́ęgóó kéédahatʼı̨́į doo.
4 Tʼáadoo náníldzidí, háálá doo ádaa yádíníidzįįł da, doo nidi nił halą́ą da doo, háálá doo naa yáhásingo ándiʼdoolníił da, nidi ániid nanináádą́ą́ʼ bee naa yáhóósįįdii baidiyíínah índa asdzání bąąh áhásdįįdii nahalingo yínííł nanináhígíí doo béénílniih da doo.
5 Háálá Ániilaii éí nahastiin átʼé; tʼáá ałtsoní bee Bóhólníihii biʼdiʼní, áádóó Ízrel dineʼé biDiyin nilíinii nikʼé nináʼídláii éí nahasdzáán tʼáá náhwiizʼą́ą́ nítʼééʼ biDiyin God biʼdiʼníi doo.
6 Jó, asdzání yóóʼabiʼdootʼáanii áádóó bíniʼ yiiʼaʼii índa ániid naaghá yę́ędą́ą́ʼ yił ahidiiʼáázh yę́ę doo biniizı̨́ʼígi ánítʼéego Bóhólníihii hágo niłní, ní niDiyin God.
7 Tʼóó kónízahíjįʼ yóóʼandííʼą́ą́ nítʼééʼ, nidi ayóó átʼéego nihaa aʼááh nisingo áłah ánánihideeshdlííł.
8 Tʼóó kónízahíjįʼ shił hazhchihgo nihitsʼą́ąjįʼ nininíshtʼą́, nidi hoolʼáágóó aa aʼááh hasinii bee naa aʼááh nisin doo, ní Bóhólníihii, nikʼé nináʼídláii.
9 Áko díí Nóah bíyoołkááł yę́ędą́ą́ʼ shił ákótʼé: íídą́ą́ʼ tó yíląądii nahasdzáán bikááʼ doo náádidoolkǫǫłgóó bee haasdzíʼígi átʼéego doo nichʼįʼ sháháchįʼ da doo, áádóó doo nidishtehgóó bee haasdzííʼ.
10 Azhą́ shı̨́ı̨́ dził ádadoodįįł índa dah daaskʼidii nahjįʼ kódadooníił nidi, bee aa aʼááh nisinii éí doo nitsʼą́ąjįʼ kódooníił da, doo nidi bee hashtʼehodítʼéii shidineʼé bee bił ahaʼdinishtʼáanii nahjįʼ kódooníił da, ní Bóhólníihii naa aʼááh nízinii.
Jerúsalem ániidíii
11 Nichʼįʼ nahwiiʼnáanii áádóó níyol yáhoołgohii índa doo níká aʼalyeedii nílíinii, tsé nitłʼizii nitłʼááh nástłʼingo áádóó tsé daʼílíinii bee kingo ándeeshłííł, jóʼakon.
12 Áádóó tsé daʼílíinii ágat wolyéii bee nitsésǫʼ ádeeshłííł, áádóó diichiłí bee nidáádaditı̨́įhgo índa tsé daʼílíinii bee ninaa ahéédaʼastłʼingo ádeeshłííł.
13 Áádóó naʼáłchíní tʼáá ałtso éí Bóhólníihii nabidínóotįįł índa ayóó átʼéego naʼáłchíní bá hashtʼehodítʼée doo.
14 Tʼáá ákogi átʼéii bee nihoníłdzil doo; ade áhootʼé óʼólzin bitsʼąą doo deeghánídi honílǫ́ǫ doo, háálá doo nił yéeʼ da doo áádóó bikʼee ił yéeʼii bitsʼąą doo deeghánídi honílǫ́ǫ doo, háálá áháníjįʼ doo níighahjįʼ kódooníił da.
15 Jó, tʼáá aaníí áłah ádaʼdidoolnííł, nidi shí shee éí dooda; tʼáá háiida niniyé áłah daazlı̨́ʼígíí éí niniinaa naʼadínóodah.
16 Jó, atsidii éí kǫʼ yiiʼ béésh néiniiłchxihgo bee naʼabaahii áyoolíłígíí tsítsʼáyiiníiłii éí íishłaa áádóó áʼdoołdįįł biniyé óʼoołdįįłii íishłaa.
17 Bee naʼabaahii niniyé ályaaígíí tʼáá ałtso doo nidídóołniił da índa saad bee nahwiinítʼı̨́įgo nikʼijįʼ neheʼníłígíí bá nahoyíʼaah doo. Díí Bóhólníihii bá nidaalʼaʼí bííʼ dooleełígíí átʼé, áádóó bitʼáá ákogi átʼéii éí shitsʼą́ą́dóó átʼé, ní Bóhólníihii.
