Isaiah 7:1-25
7 Ákohgo Júdah dineʼé aláahgo binanitʼaʼí Azáíyah biyeʼ Jótham éí biyeʼ Éíhaz bíyoołkááł yę́ędą́ą́ʼ Síriya dineʼé aláahgo binanitʼaʼí Ríízin índa Ízrel dineʼé aláahgo binanitʼaʼí Remaláíyah biyeʼ Pííkah éí Jerúsalem yichʼįʼ anaaʼ hodoołeeł biniyé ákóde níná, nidi tʼáadoo bikʼesdeesdlı̨́įʼ da.
2 Áko David bitsʼą́ą́dóó náás ahoolchíiłii bił hóóneʼgo áhodooʼniid, Síriya dineʼé éí Íífreiyim dineʼé yił ałchʼodaasneʼ. Áko tsin yílʼáii bichʼįʼ deeyolígi átʼéego Éíhaz áádóó hadineʼé bił hajéí nisedaastłah.
3 Áádóó Bóhólníihii éí Aizéíyah áyidííniid, Ni áádóó niyeʼ Shíyar-jéíshab* bił kʼad nílááh Éíhaz bichʼįʼ doohʼashgo wódahgo tó bá azʼání góde tó biiʼ nílíní hááʼáhígi áádóó iigisgo iilgááh bá hazʼánígíí bichʼįʼgo atiinígi bidááh nohʼaash,
4 áko ábididoohniił, Haʼídínílʼı̨́ı̨́ʼ áádóó tʼóó dííníłhéél; Síriya dineʼé aláahgo binanitʼaʼí Ríízin áádóó bidineʼé índa Remaláíyah biyeʼ éí chizh nideekʼą́ą́h nahalingo bánáháchįįhígíí biniinaa tʼáadoo nił yéʼí áádóó tʼáadoo nijéí doo bidziilí.
5 Síriya dineʼé áádóó Íífreiyim dineʼé índa Remeláíyah biyeʼ nilíinii ahił chʼodaasneʼgo tʼóó baaʼihgo nindahazʼą́ągo ádaaní,
6 Sołtįʼ, Júdah dineʼé baatįįh diikahgo bił yééʼ ádahodiilnííł, áádóó haaʼíshąʼ tʼáá nihí bikʼeh dadidiidleeł áádóó Téíbiyel biyeʼ nilíinii éí aláahgo naatʼáanii ádadiilníiłgo Júdah kéyah biyiʼ nantʼáa doo.
7 Díí Diyin God Bóhólníihii nilíinii yee haadzííʼ, Doo yídaneelʼą́ą da índa doo ákódaoneʼ átʼée da.
8 Damáskas kin haalʼáii éí Síriya dineʼé yinantʼá áádóó Damáskas binanitʼaʼí éí Ríízin, áádóó hastą́diindóó baʼaan ashdlaʼ nááhaijįʼ Íífreiyim dineʼé tabidíʼnóolkałgo doo łáʼí dineʼé nídoodleeł da.
9 Samériya kin haalʼáii éí Íífreiyim dineʼé yinantʼá áádóó Samériya binanitʼaʼí éí Remaláíyah biyeʼ. Doo iinídlą́ą́góogo tʼáá aaníí doo nidziil da doo.
Aizéíyah éí Imányowel yaa hoolneʼ
10 Nááʼáłdóʼ Bóhólníihii éí Éíhaz yichʼįʼ hanáánáádzíiʼgo ííłní,
11 Bóhólníihii niDiyin God bitsʼą́ą́dóó bee ééhózinii bííníkeed; chʼı̨́įdiitahgóó, doodaiiʼ yáʼąąshgóó bee ééhózinii yíníkeed.
12 Nidi Éíhaz ájíní, Dooda, Bóhólníihii doo bínabídídéeshkił da, doodaiiʼ Bóhólníihii doo nabídínéeshtah da.
13 Áko Aizéíyah ájíní, David baʼáłchíní, daʼíísínółtsʼą́ą́ʼ; diné nabídanohtaahígíísh tʼįįhdígo átʼéego baa nitsídaahkees, áko shiDiyin God ałdóʼ nabídanohtaah doo?
14 Éí bąą Bóhólníihii tʼáá bí bee ééhózinii nihaididooʼááł: Jóʼakon, chʼikę́ę́h tʼah doo diné bee haleehii* idíʼnóoltsąąłgo ashkii yidoołchííł áádóó Imányowel yee yídóozhiił.
15 Yáʼátʼéehii yóóʼahiditʼaah índa yáʼátʼéehii ihiditʼaahgi bił ééhózingo géeso áádóó tsésʼná bitłʼizh yiyą́.
16 Háálá awééʼ éí doo yáʼátʼéehii yóóʼahiditʼaah índa yáʼátʼéehii nihiditʼaahgi bił bééhózin dooígíí tʼah bítséedi díí aláahgo naatʼáanii nidiltʼéego bééníldzidígíí bikéyah yóóʼadidootʼááł.
17 Íífreiyim dineʼé éí Júdah dineʼé bitsʼájíkai yę́ędóó tiʼhooʼníihgo yiníłkánígíí bilááh átʼéego tiʼhooʼníihii Bóhólníihii éí nikʼijįʼ áádóó nidineʼé índa nizhéʼé baʼáłchíní náás ahoolchíiłii yikʼijįʼ kwíidoolííł: éí Asíriya dineʼé aláahgo binanitʼaʼí yee ákónihidoolííł.
18 Éí beiníłką́ądi Ííjip kéyahgi tooh dadeezlı̨́ı̨́dóó tséʼédǫ́ʼii áádóó Asíriya kéyahdóó tsésʼná éí Bóhólníihii yíká ídiʼdoosoł.
19 Áko áádę́ę́ʼ hadooldah áádóó tsékooh doo naʼadáhí góyaa áádóó tsénídahasdzą́ą́góó áádóó chʼil ahoshí ałʼąą ádaatʼéii deílʼáágóó índa dahootsogóó ałkʼídaʼasoł doo.
20 Tʼáá éí yoołkáałdi Bóhólníihii éí dághá bee yilzhéhé yee adooshih; tooh nílíní bilááh nahósʼaʼdóó bá nidoolnishii łaʼ shóyoostʼeʼ; tʼáá éí Asíriya dineʼé aláahgo binanitʼaʼí nidoolnishgo tsiighá áádóó ajáád bitáshtłʼoh índa dághá ałtso yidooshih.
21 Kódahóótʼįįdóó bikʼijįʼ éí yoołkáałdi diné łaʼ éí béégashiitsaʼii łaʼ binááhaii áádóó dibé naakigo yaa áhályą́ą doo,
22 áko éí bitsʼą́ą́dóó abeʼ bee ídaʼazįįdgo géeso yiyą́ą doo, háálá éí kéyahgi diné dadzoodzíʼígíí tʼáá ádzíłtso géeso áádóó tsésʼná bitłʼizh dajiyą́ą dooleeł.
23 Áádóó éí yoołkáałdi tʼáá dádaʼakʼehígi miilgo chʼil naʼatłʼoʼii éí miilgo béésh łigaii bą́ą́h náʼádleehii bitsáskʼehgi chʼil ahoshí áádóó chʼil deeníní hodooleeł.
24 Kéyah tʼáá átʼé bikááʼ chʼil ahoshí áádóó chʼil deeníní dahólǫ́ǫgo biniinaa ałtı̨́ı̨́ʼ áádóó kʼaaʼ bee dahólóonii áadi nidaakai doo.
25 Deílkʼidgóó nínádahagoʼ yę́ęgóó chʼil ahoshí áádóó chʼil deeníní tʼóó báhádzidgo deílʼáago biniinaa doo łaʼ ákǫ́ǫ́ naagháa da doo, nidi béégashii áádóó dibéda tʼéí bá átʼée dooleeł.
Footnotes
^ Shííyar-jéíshab éí Hííbrew kʼehjí, Tʼáá díkwíí nídookah, jiníigo óolyé.
^ Hííbrew kʼehjí chʼikę́ę́h bízhą́ą́ naagháii. Mt. 1:23.
