James 3:1-18
3 Shikʼisóó, ląʼí nołtʼéego naʼnitiní daohłeʼ lágo, háálá nidaʼniitinígíí tʼah aláhídi átʼéego bikʼeʼashchʼíiʼgo nihaa nídahódóotʼįįłgo nihił béédahózin.
2 Tʼáá áníiltso ląʼígóó nidaʼayiilzííh. Tʼáá háiida saad doo nidziisííhgóó hadziidziihígíí éí diné tsʼídá tʼáá ákóneʼ átʼéii jílı̨́, hatsʼíís ałdóʼ hakʼeh hółʼı̨́ ádzósingo bízhneelʼą́.
3 Jó, łı̨́ı̨́ʼ nihikʼeh hółʼı̨́į doo biniyé bizaʼiiltʼihgo bee bitsʼíís neidloʼ.
4 Tsinaaʼeeł ałdóʼ baa nitsídaahkees; azhą́ ayóó áníłtso nidi, áádóó níyol bidziilii yee naaʼeeł nidi, bee naadloʼí áłtsʼíísí nidi naʼałʼeełii tʼáá bí nízingóó neiloʼ.
5 Tʼáá ákótʼéego ałdóʼ atsooʼ áłtsʼíísí lá nidi ayóó ádaatʼéii yee ádaa haʼniih. Jóʼakon, kǫʼ tʼįįhdígo nidi, tsin ayóogo bee hodíłchʼilii yidiiłtłiʼ!
6 Atsooʼígíí éí kǫʼ nahalin. Atsooʼ éí íiyisí doo yáʼátʼéehii nilı̨́įgo nihitsʼíís yee hadítʼéii yitah hólǫ́, nihitsʼíís tʼáá átʼé niyiiłchxǫǫh. Hoolʼáágóó tiʼhooʼnííh bił hazʼą́ądi hodookʼą́łígíí bitsʼą́ą́dóó nihił hoolzhishígíí yidiiłtłiʼ.
7 Jó, naaldlooshii, nidaatʼaʼii, nidaaʼnaʼiida índa tónteel yiiʼ dahólóonii nidi nidahazhǫǫh, éí diné nidabiishǫǫh.
8 Nidi diné éí atsooʼ doo yóshǫǫh átʼée da. Doo hashtʼedítʼéégóó doo yáʼáshóonii nilı̨́, daʼagháanii biiʼ hééł.
9 Éí Diyin God aTaaʼ nilíinii bee baa dahwiiʼniih, áádóó Diyin God honáłtʼéego diné ájiilaaígíí ałdóʼ bee dayíníidziih.
10 Azééʼ tʼááłáʼíígíí bitsʼą́ą́dóó saad bee akʼihojidlí índa saad bee ódziihii hahwiileeh. Shikʼisóó, díí doo ákódeiitʼı̨́į da dooleeł nítʼééʼ!
11 Daʼ tʼááłáʼí tó háálínídę́ę́ʼésh tó łikango índa dókʼǫ́ǫzhgo háálı̨́į łeh?
12 Shikʼisóó, fig sikaadgoósh álivz bąąh hodooleeł, éí doodago chʼil naʼatłʼoʼii sikaadgoósh fig bąąh hodooleeł? Dooda lą́ą! Tʼáá ákótʼéego tó dókʼǫ́ǫ́zh háálı̨́ı̨́dóó tó łikanii doo hóleʼ átʼée da.
Hódzą́ yáʼąąshdę́ę́ʼ hólóonii
13 Nihitahdóoshąʼ háí hóyą́ áádóó akʼidiʼyiitįįh? Hániʼdii yáʼátʼéehgo jiinánígíí áádóó baa hojíyą́ągo aʼohgo ízʼdólzingo ájooníłígíí ííshjání ádzósin leʼ.
14 Nidi daʼiinołchʼı̨́įdgo nihiiʼ nidahodikʼǫǫsh ládą́ą́ʼ áádóó ałchʼą́ą́h nidaahʼnaʼ ládą́ą́ʼ, tʼáadoo ádaa dahohʼniihí, tʼáá aaníinii tʼáadoo bikʼijįʼ danihiyoochʼídí.
15 Hódzą́ ákótʼéhígíí doo yáʼąąshdę́ę́ʼ nihwiileeh da, nidi nihokáaʼgi hólóonii átʼé, áko doo Diyin God bitsʼą́ą́dóó átʼée da, nidi níłchʼi biʼiiníziinii bitsʼą́ą́dóó átʼé.
16 Háálá tʼáá haaʼída oochʼı̨́ı̨́d índa ałchʼą́ą́h naʼaʼnaʼ hólǫ́ǫgi ákwii doo hashtʼehodítʼée da, áádóó baaʼihii tʼáá ałtso baa ooldah łeh.
17 Nidi yáʼąąshdę́ę́ʼ bee hódzáanii éí, átséhí góneʼ chin bąąh ádinii átʼé, áádóó kʼéʼnídzin, áádóó áʼáhwiinítʼı̨́ʼí, índa lą́ nízin, tʼáá íiyisí aa aʼááh hasin índa yáʼátʼééh óʼooʼnííł, áádóó ałʼohgo ahaa nitsáhákeesii índa tʼóó áhodiʼı̨́ bąąh ádin.
18 Kʼé nídahoołeełii tʼáá ákogi átʼéii bineestʼąʼ bąą hózhǫ́ǫgo kʼéédeididleʼ.
