James 4:1-17
4 Nihitahgi ahigą́ índa ahinídiiltłáadshąʼ háádę́ę́ʼ nihwiileeh? Daʼ doósh niheʼadáhonooniʼ nihiyiʼdi naalnishígíí bitsʼą́ą́dę́ę́ʼ nihwiileeh da?
2 Laanaa danohsin nidi doo nihee dahaleeh da; nidaʼołtseed, áádóó nihił adááh dahaníi nidi doo shódeinołtʼeeh dago, tʼóó ahináádoohjah áádóó daʼahohgą́. Bídin danohłínígíí doo Diyin God bídeínóhkeedgóó biniinaa doo nihee dahaleeh da.
3 Dayínóhkeed nidi doo nihee dahaleeh da, háálá biniyé dayínóhkeedígíí doo yáʼátʼéeh da, nihił dahoneełni tʼéí biniyé dayínóhkeed.
4 Nihí adiléhí danohłíinii, nihokááʼ bił nidahaztʼiʼii nihił bidáádahaníigo Diyin God biʼanaʼí danohłínígíísh doo nihił béédahózin da? Éí bąą tʼáá háiida nihokááʼ bił nidahaztʼiʼii hoł bidááhánínígíí Diyin God biʼanaʼí ízʼdólzingo átʼé.
5 Diyin God bizaad bee akʼeʼashchínígíí doo tʼáadoo biniyéhígóó kóníigo bee akʼeʼashchı̨́, Níłchʼi nihiiʼ naazı̨́įgo áyiilaii éí laanaa nízingo oołchʼı̨́ı̨́d.*
6 Nidi tʼah aláhídi átʼéego Diyin God aa joobaʼ, éí bąą bizaad bee akʼeʼashchíinii kóní,
Diyin God éí diné ádaa dahaʼniihii yikʼijįʼ nilı̨́,nidi diné aʼohgo ádaa nitsídaakeesii yaa joobaʼ.
7 Éí bąą Diyin God baa ádadiyohtʼaah. Níłchʼi bidaʼiiníziinii binanitʼaʼí bichʼįʼ nidaałdzilgo nihitsʼádoolwoł.
8 Diyin God baa hohkááh, áko bí ałdóʼ nihaa doogááł. Bąąhági ádaahníiłii, nihílaʼ táádaahgis. Tʼáá naaki nilı̨́įgo nitsídaahkeesii, nihijéí chin bąąh ádaadingo ádaahłééh.
9 Yínííł bikʼee tiʼdahoohnííh, áádóó atínidadinohdleeh, índa daahcha. Bíniʼdii nihidloh hasinii atínáhodinidleeh náádleeł, áádóó bíniʼdii nihił dahózhónígíí éí yínííł náádleeł.
10 Bóhólníihii binááł aʼohgo ádaa nitsídaahkees, áko ayóó átʼéii danohłı̨́įgo ánihidoolííł.
Akʼis nilíinii tʼáadoo baa nídaahtʼíní
11 Shikʼisóó, tʼáadoo nichxǫ́ʼógo ahaa yádaałtiʼí. Tʼáá háiida Christ bee akʼis nilı̨́įgo nichxǫ́ʼógo baa yájíłtiʼígíí, doodaiiʼ baa níjítʼínígíí éí Diyin God yee hasʼáanii nichxǫ́ʼógo baa yájíłtiʼ áádóó baa níjítʼı̨́įgo átʼé. Jó, bee hazʼáanii baa níjítʼı̨́įgo bee hazʼáanii doo yikʼehgóó ááníiłii jileeh, bee hazʼáanii yikʼi hodiiʼaahii jileeh.
12 Diyin God tʼéiyá bee hazʼáanii ííłʼíinii áádóó ánihwiiʼaahii nilı̨́. Tʼáá bí tʼéiyá yisdáʼiinííł, áádóó ałdóʼ íʼdoołdįįłgo yíneelʼą́. Áko nishąʼ haʼátʼíí nishłı̨́ nínízingo bił kééhótʼíinii baa nánítʼı̨́?
Tʼáadoo ádaa dahohʼniihí
13 Haaʼíyeeʼ, kódadohʼníinii, Díí jı̨́, yiską́ągoda kin haalʼáajįʼ diikah, ákwii nihaa nidaʼiiniihgo nídoohah, áko béeso nihee dahodooleeł.
14 Éí azhą́ yiską́ągo áhodooníłígíí doo nihił béédahózin da nidi ádadohní. Jó, niheʼiinaʼshąʼ haʼátʼíí átʼé? Áhí tʼóó kónígháníjįʼ haleehgo ádįįhígíí nahalinii átʼé.
15 Kódadohníi dooleeł yę́ę, Bóhólníihii íinízin ládą́ą́ʼ dahiniiʼnáa doo, díidída, doodaiiʼ níléidída baa nidiikah.
16 Nidi ádaa dadzíínóhdlíigo ádaa dahohniih. Ákótʼéego ádaa haʼniih tʼáá ałtso doo yáʼátʼéeh da.
17 Éí bąą tʼáá háiida haʼátʼíhída yáʼátʼéehgo ádoolníłígíí hoł bééhózin nidi doo ájoonííłgóó éí bee ádił niʼdziilzííh.
Footnotes
^ Tʼáá íiyisí ayóóʼánihijóʼníigo biniinaa níłchʼi nihiih jííláhígíí bá laanaa dzinízingo joołchʼı̨́ı̨́d.
