James 5:1-20
5 Haaʼíyeeʼ daʼohtʼíinii, bikʼee tiʼdahwiidoohnihii bichʼįʼ hoolzhishígíí biniinaa dadołwoshgo daahcha.
2 Daahtʼínígíí dadííłdzid, áádóó danihiʼééʼ chʼosh ałchozhii dayííłchozh.
3 Nihiʼóola índa nihibéésh łigaii nídadiniichxiiʼ. Nídadiniichxiiʼ yę́ę bee nihééhodoozįįł, áko nihitsʼíís dookʼą́ą́ł nahalingo atínihidoolííł. Nihoogháahjįʼ yoołkáałgo nihinaalyeʼé hashtʼeʼnídahisoonil.
4 Jóʼakon, nidaalnishí nihidádaʼakʼehgóó daʼííshéeʼgo bikʼé naʼazhnishii tʼáadoo nidasooláa da. Áko nihikʼijįʼ yádaałtiʼgo hahóółʼá. Índa Diyin God éí tʼáá ałtsoní bee Bóhólníihii daʼííshéʼígíí hahóółʼáago yidiiztsʼą́ą́ʼ.
5 Nahasdzáán bikááʼ tʼáá ałtsoní daahtʼı̨́įgo bee ákʼidaahdláago tsiʼnisoohkai. Naʼatseed bijı̨́įjįʼ biniyé nihijéí hwiih danilı̨́įgo ádaahłaa.
6 Diné tsʼídá tʼáá ákogi átʼéii bá nidahosooʼą́ áádóó dasoołhı̨́, nidi tʼáadoo nihichʼįʼ deesdzil da.
Hadaʼíínółní áádóó sodadołzin
7 Éí bąą shikʼisóó, Bóhólníihii nádzáajįʼ hadaʼíínółní. Jóʼakon, kʼééʼdídléehii niʼ bitsʼą́ą́dóó aneestʼąʼ ílíinii yibaʼ átʼéego, áłtséedi índa akéeʼdi bikʼi nahałtı̨́įhjįʼ haʼólníi łeh.
8 Nihí ałdóʼ hadaʼíínółní. Nihijéí bidziilgo ádeínóhsin, háálá Bóhólníihii nídoodáłígíí koshídę́ę́ʼ hadziih.
9 Shikʼisóó, Diyin God doo nihá nihodiyooʼaał daígíí biniyé tʼáadoo ałchʼįʼ saad dahonołʼíní. Jóʼakon, ánihwiiʼaahii chʼéʼétiindę́ę́ʼ sizı̨́!
10 Shikʼisóó, Diyin God yá dahalneʼii Bóhólníihii bízhiʼ yee yaa dahoolneʼgo yiniinaa tiʼdahoozniiʼ nidi nízaadgóó hadaʼoosniid. Éí bidaʼołʼı̨́.
11 Jó, nízaadgóó hadaʼoosniidii bił dahózhǫ́, dadiiʼní. Job wolyéhígíí nízaadgóó haʼoosniidígíí baa dahosidootsʼą́ą́ʼ, áádóó nihoolzhiizhdi Bóhólníihii há íʼiilaaígíí nihił béédahózin. Dooládóʼ Bóhólníihii aa aʼááh nízin da, áádóó joobaʼ lá!
12 Díí tʼáá ałtso biláahgo, shikʼisóó, tʼáadoo haʼátʼíhída bee ádee hadahidohdziihí, yáʼąąsh, doodaiiʼ nahasdzáán bee nidi dooda, tʼáá haʼátʼíhída bee ádee haʼdiidziihii nidi dooda, nidi Diyin God doo nihá nihodiyooʼáłígíí biniyé, Aooʼ, didoohniiłgo tʼóó, Aooʼ, bee hadoohdzih; Dooda, didoohniiłgo tʼóó, Dooda, bee hadoohdzih.
13 Nihitahgiísh łaʼda bichʼįʼ nahwiiʼná? Bíniʼ éí sodilzin. Łaʼdaásh bił hózhǫ́? Bíniʼ éí Diyin God yaa haniihgo hataał.
14 Łaʼdaásh nihitahgi bitah honeezgai? Bíniʼ éí daʼoodlání áłah nádleehii yá aląąjįʼ naazíinii hágo bizhdidooniiłgo éí hatsiiʼtʼáagi akʼah yadeidooziłgo Bóhólníihii bízhiʼ dayózhíigo há sodadidoolzįįł.
15 Díí Diyin God dayoodlą́ągo yaa dadzólíigo sodadilzinígíí beego, hatah honeezgai doo ájítʼéhí da nízhdoodleeł; Bóhólníihii nááhodidoołááł, índa ádił niʼdziilzííh ládą́ą́ʼ há yóóʼanídidootʼááł.
16 Áko ałchʼįʼ bąąhági ádaahtʼínígíí ahidiníłnáago bee ádaa dahołneʼ, áádóó doo ádanohtʼéhí da nídadoohdleeł biniyé ahá sodadołzin. Diné tsʼídá tʼáá ákogi átʼéii bisodizin éí tʼáá íiyisí bidziilgo idééłní.
17 Iiláíjah, diné tʼáá nihígi átʼéé nítʼééʼ nidi, doo nahodoołtı̨́ı̨́łgóó haleebee sodoolzin, áko tááʼ nááhaidóó hastą́ą́h nídeezidjįʼ nahasdzáán bikáaʼgi tʼáadoo nahóółtą́ą da.
18 Áádóó sonáádoolzin, áko nítʼééʼ wótʼááhdę́ę́ʼ nahóółtą́, áko nahasdzáán bikáaʼgi nídaʼneestʼą́.
19 Shikʼisóó, nihitahgi łaʼda haneʼ tʼáá aaníinii bitsʼánooyáago, nítʼééʼ éí łaʼda bił nánoohtʼáazhgo
20 díí baa ákodanoohsįįh, bąąhági ááníiłii niʼiisíihgo bá honítʼiʼdę́ę́ʼ bił níjítʼázhígíí éí aniné bitsʼą́ąjįʼ biiʼ sizíinii yisdázhdoołtééł, áko haa shı̨́ı̨́ néelą́ąʼjįʼ Diyin God bichʼįʼ ádił niʼiisíiʼ nidi ałtso Diyin God há yóóʼanéididooʼááł.
