Jeremiah 1:1-19
1 Bénjamin dineʼé bikéyahdóó Ánathath hoolyéegi nááʼiiłniihii dah yikahígíí bitahdóó Hilkáíyah wolyéii biyeʼ Jeremáíyah ádííniidii.
2 Éíman biyeʼ Josáíyah éí Júdah dineʼé aláahgo yinantʼáago yoołkááł yę́ędą́ą́ʼ tááʼtsʼáadah náhááh góneʼ Bóhólníihii éí Jeremáíyah yichʼįʼ haadzííʼ.
3 Áádóó ałdóʼ Josáíyah biyeʼ Jiihóíyakim éí Júdah dineʼé aláahgo yinantʼáago bíyoołkááł yę́ędóó Josáíyah biyeʼ Zedekáíyah éí Júdah dineʼé aláahgo yinantʼáago łaʼtsʼáadah nááhaijįʼ ashdlaʼ nídízííd binih Jerúsalem kin haalʼáagi kéédahatʼíinii dabiʼdisnáajįʼ Bóhólníihii éí Jeremáíyah yichʼįʼ hanádzihgo hoolzhiizh.
4 Áko Bóhólníihii shichʼįʼ haadzíiʼgo ání,
5 Tʼah doo atsą́ądi hashtʼenishłééh yę́ędą́ą́ʼ nééhasin; tʼah doo iishchʼid biiʼdę́ę́ʼ niʼdichíídą́ą́ʼ diníyingo ániishłaa. Índa ałʼąą dineʼé bichʼįʼ yáníłtiʼ dooleeł biniyé nininíłtı̨́.
6 Áko índa ádíshní, Bóhólníihii Diyin God, shíyeeʼ tʼah áłchíní nishłı̨́, jóʼakon; yáshtiʼ dooleełígíí doo bíneeshʼą́ą da.
7 Nidi Bóhólníihii áshidííniid, Tʼah áłchíní nishłı̨́, tʼáadoo diníní. Tʼáá bichʼįʼ nishʼáhígíí tʼáá ałtso bichʼįʼ hidínáah doo. Bee nichʼįʼ hahasdziihii éí bee yáníłtiʼ doo.
8 Ádanóolninígíí tʼáadoo bééníldzidí, háálá yisdándeeshtéełgo biniyé nił honishłǫ́, ní Bóhólníihii.
9 Ákohgo Bóhólníihii shizééʼ yideelchidgo áshidííniid, Shoo, shizaad nizáá lá.
10 Shoo, ałʼąą dineʼé índa bee ídahólníihgo bił nahazʼą́ą́góó nahjįʼ hahíníił doo, índa doo bidziilgóó ádanileʼ doo, áádóó ádahíłdįįh doo, áádóó bikʼeh hidídleeh doo, áádóó hashtʼéédanidleʼ doo índa kʼéédahidídleʼ doo biniyé díí jı̨́ nininíłtı̨́.
11 Nááʼáłdóʼ Bóhólníihii shichʼįʼ hanáánáádzíiʼgo kóní, Jeremáíyah, haʼátʼíísh yíníʼı̨́? Áko ádíshní, Álman sikaadii bitsiin yishʼı̨́.*
12 Áko Bóhólníihii áshíłní, Jó, nizhónígo yiniłtsą́, háálá shizaad biʼdeeshłííł biniyé baa áháshyą́.*
13 Áádóó Bóhólníihii naakidi aleeh góneʼ shichʼįʼ hanáánáádzíiʼgo kóní, Haʼátʼíí yíníʼı̨́? Áko ádíshní, Ásaaʼ bee abéezhgo* yishʼı̨́, náhookǫsdę́ęʼgo siką́.
14 Áádóó Bóhólníihii áshíłní, Kéyah tʼáá náhwiistʼą́ą́ nítʼééʼ náhookǫsdę́ęʼgo doo yáʼáshóonii bikʼi dahwiidooleeł.
15 Bóhólníihii ání, Shoo, náhookǫsdi ałʼąą dineʼé bídahólníihgo bił nahazʼą́ą́dę́ę́ʼ tʼáá ałtso, Wóshdę́ę́ʼ, dabidishní, áko nidahidoonéełgo tʼááłáʼí níjaaʼígo Jerúsalem kin haalʼáagi dáńʼdaʼditı̨́ı̨́hgóó bídahólníih doo, índa tsé bee binaa ahéédaʼastłʼinígíí tʼáá átʼé yikʼijįʼ danilı̨́į doo, áádóó Júdah dineʼé bikin hadaasʼáhígíí tʼáá ałtso yikʼijįʼ danilı̨́į doo.
16 Áádóó yóóʼadashizdeezʼą́ągo diyin dabidiʼníinii bichʼįʼ łikání halchinii dazhdííłidgo índa tʼáá hó dahálaʼ bee bindajishnishii bichʼįʼ nidahojiłáago doo yáʼáshónígi ádajíítʼįįdígíí biniinaa bee atíhodeeshłíiłii hakʼijįʼ bee hadeesdzih.
17 Éí bąą áká nílzisgo yiizįįh, áádóó bee nichʼįʼ hahasdziihii tʼáá ałtso bee bichʼįʼ yáníłtiʼ. Tsídandółyéés lágo, éí doodaiiʼ binááł tsíndideesyis.
18 Shoo, kéyah tʼáá náhwiistʼą́ą́ nítʼééʼ, índa Júdah dineʼé aláahgo binanitʼaʼí nilíinii áádóó náádaʼiiłniihii índa naatʼáanii danilíinii áádóó kéyahdóó dineʼé kéédahatʼíinii bikʼijįʼ nahonílingo kin haalʼá ditą́ągo binaa ahééʼítłʼinii, béésh nitłʼizii ííʼáii índa béésh łitsoii bee binaa ahééʼítłʼinii nahonílingo díí jı̨́ áníshłééh, jóʼakon.
19 Nikʼi néijah doo, nidi nił honishłǫ́ǫgo nił yisdáháshʼaashígíí bee doo nikʼeh dazhdidlı̨́į da doo, ní Bóhólníihii.
Footnotes
^ Tsin álman éí dąągo áłtsé bílátah daʼiigah.
^ Hííbrew kʼehjí tsin álman jiníigo, Baa áháshyą́, jiní nahalingo diitsʼaʼ.
^ Bábilan dineʼé yaa halneʼ.
