Jeremiah 11:1-23
11 Bóhólníihii éí Jeremáíyah yichʼįʼ hanáánáádzíiʼgo kóní,
2 Díí bee ahaʼdeetʼáanii saad diitsʼı̨́įhgo Júdah dineʼé áádóó Jerúsalem kin haalʼáagi kéédahatʼíinii bichʼįʼ bee handziih,
3 áádóó ábididííniił, Ízrel dineʼé biDiyin God Bóhólníihii nilíinii kóní, Díí bee ahaʼdeetʼáanii saad doo bikʼeh hojíłʼíinii hóyéeʼgo há haʼoodzííʼ,
4 Ííjip kéyahdę́ę́ʼ éí béésh biiʼ déédíljahí biiʼdę́ę́ʼ danihizhéʼé yę́ę chʼíníʼeezh yę́ędą́ą́ʼ bee bichʼįʼ haasdzíiʼgo ádíshní, Bee nihichʼįʼ hahasdziihígíí tʼáá átʼé bidaʼołʼı̨́įgo bikʼeh dahonołʼı̨́, áko índa shidineʼé nohłı̨́į doo, áádóó nihiDiyin God nishłı̨́į doo.
5 Áko díí jı̨́įdi átʼéhígíigi átʼéego danihizhéʼé yę́ę kéyahgi abeʼ áádóó tsésʼná bitłʼizh bee ádaʼazįįdígíí* nihaa dideeshʼááł, dishníigo bee bichʼįʼ ádee hadeesdzííʼ. Áko ádííniid, Tʼáá ákótʼée leʼ, Bóhólníihii nílíinii.
6 Áádóó Bóhólníihii áshidííniid, Júdah kéyahgi kin hadaasʼáágóó índa Jerúsalem kin haalʼáagi kintaa daʼaztiingóó díí saad baa nahólneʼgo kódíní, Díí bee ahaʼdeetʼáanii saad deísínółtsʼą́ąʼgo bidaʼołʼı̨́.
7 Shikʼeh dahonołʼı̨́, dishníigo danihizhéʼé yę́ę Ííjip kéyahdę́ę́ʼ chʼíníʼeezh yę́ędą́ą́ʼ áádóó díí jı̨́įjįʼ tʼah abíínídą́ą́ʼ náádiishʼnahgo tsʼídá tʼáá aaníí ádíshníigo bił hashneʼgo hoolzhiizh;
8 ákondi tʼáadoo akʼeh dahóółʼįįd da índa tʼáadoo daʼdiiztsʼą́ąʼ da, nidi tʼááłáʼí nítínígo doo nibídaʼdidzilgóó bijéí biyiʼdę́ę́ʼ doo yáʼáshǫʼ bił ádaatʼíinii yikʼehgo deíkai. Éí bąą díí bee ahaʼdeetʼą́ą́jí saad tʼáá átʼé hakʼijįʼ bohoolyaago áshłaa, éí saad bidaʼołʼı̨́ hodííniid nítʼééʼ tʼáadoo bidaʼjiilaa da.
9 Áádóó Bóhólníihii áshidííniid, Júdah dineʼé áádóó Jerúsalem kin haalʼáagi kéédahatʼíinii bitahgóó nidahaʼáago bééhoozin.
10 Dabizhéʼé yę́ę éí shizaad doo tʼáá kʼad deidiiztsʼą́ąʼii doo ákwii éʼétʼéii yaa nidaaskai yę́ę éí yichʼįʼ tʼą́ą́ʼ anáákaigo diyin dabidiʼníinii yichʼįʼ nidahałáá nítʼééʼ. Ízrel dineʼé índa Júdah dineʼé dabizhéʼé yę́ę bił ahadaʼdinishtʼáanii dayiiztiʼ.
11 Éí bąą Bóhólníihii kóní, Shoo, doo yáʼátʼéhígi ádahodeeshłíiłgo tsʼídá doo bitsʼádazhdínóochéeł da. Azhą́ nídashijookąąh nidi, doo hwíínístsʼą́ąʼ da doo.
12 Áko índa Júdah kéyahgi kin hadaasʼáágóó índa Jerúsalemgi kéédahatʼíinii éí diyin dabidiʼníinii yichʼįʼ tsin bijeeh dilidgo łikání halchinii náádayiiłniihii yichʼįʼ dadookahgo nídayookąąh doo, nidi hade ádahoodzaago doo yisdáhodoonił da.
13 Háálá, Júdah nílíinii, tʼáá nikin hadaasʼá ánéelą́ʼígi átʼéego tʼáá ákónéelą́ąʼgo nidiyin dabidiʼníinii hazlı̨́ı̨́ʼ, áádóó bikááʼ nááʼiiniihí bikááʼdóó Béíyal bichʼįʼ tsin bijeeh dilidgo łikání halchinii éí Jerúsalemgi kintaa daʼaztiinígi ánéelą́ąʼgo tʼóó baa yáhásingo bikááʼ nááʼiiniihí nidasínínil.
14 Éí bąą díí dineʼé tʼáadoo bá sodílziní, doo nidi bá náʼiinikąąhgo bá sodidíílzįįł da, háálá bide áhoodzaago nídashookąąh nidi, doo hodideestsʼı̨́įł da.
15 Ayóóʼóshʼníinii doo yitsʼídígi áátʼįįdgóósh háí hadiʼníʼą́ągo shighan góneʼ nináájídáa doo? Bee ádee hahínídzíiʼii índa atsįʼ nááhániihii éísh atíníʼdilnéhígíí ná nahjįʼ kwíidoolííł? Ákódzaago éí baa nił hózhǫ́ǫ doo.
16 Bóhólníihii kóniłníí nítʼééʼ, Tsin áliv dootłʼizhgo sikaadii yáʼátʼéehii índa bineestʼąʼ yáʼátʼéehii nidi ayóó íitsʼaʼgo níyolgo yihodíínil, áádóó bitsʼáozʼaʼ ałtso adahideezkʼą́ą́ʼ.
17 Ízrel dineʼé índa Júdah dineʼé éí tsin bijeeh dilidgo łikání halchinii Béíyal yichʼįʼ deidiłidgo doo yáʼáshónígi ádáátʼįįdgo shá dahashchįįdígíí biniinaa tʼáá ałtsoní bee Bóhólníihii kʼindííláii doo yáʼáshónígi áńdiʼdoolníłígíí yee haadzííʼ.
Jeremáíyah binahastʼą́
18 Bóhólníihii shił ééhózin áyiilaago shił bééhoozin; áadi índa yaa nidaakaígíí shichʼįʼ yitʼíní íinilaa.
19 Nidi dibé yázhí doo átʼíínígíí naatseedjįʼ eedlóozii nahonishłin nítʼééʼ. Haaʼíyeeʼ tsin sikaadígíí bineestʼąʼ tʼáá bił ádadiildįįł; haaʼíyeeʼ dahináanii bitahdóó dadiyiilyééł, áko bízhiʼ doo bénínááhániih da doo, daaníigo shikʼijįʼ danilı̨́įgo shindahazgizígíí doo shił bééhózin da nítʼééʼ.
20 Nidi, tʼáá ałtsoní bee Bóhólníihii nílíinii, tʼáá ákogi átʼéego ánihoyíʼaahii, áádóó diné bijéí índa bíniʼ bééhózingo áyoolíiłii nílíinii, biniyé áshtʼíinii naadiníʼánígíí biniinaa haaʼíshąʼ bee kʼééʼdínéehii yideestsééł?
21 Éí bąą Ánathath kin haalʼáadi diné kéédahatʼíinii* nizéédeidootʼįįłgo yíká daʼałkidii, Bóhólníihii bízhiʼ bee tʼáadoo hólneʼé, éí doodaiiʼ dandiyiilyééł, daaníinii éí Bóhólníihii kótʼéego yaa haadzííʼ.
22 Éí bąą tʼáá ałtsoní bee Bóhólníihii kóní, Shoo, atíhodeeshłííł. Tsíłkéí diltłish bee nidadootsił; biyeʼké índa bitsiʼké éí dichin nidabidoołtsił.
23 Ánathath kin haalʼáagi diné kéédahatʼíinii doo yáʼáshónígi ádahodeeshłíłígíí yihah góneʼ atíháshłéehgo tʼááłáʼí nidi doo łaʼ jidoodzih da.
Footnotes
^ Kéyahgi chʼiyáán yáʼátʼéehii bee ádaʼazįįdígíí ááhyiłní.
^ Jeremáíyah éí Ánathathdę́ę́ʼ naaghá.
