Jeremiah 12:1-17
12 Bóhólníihii nílíinii, tsʼídá tʼáá ákogi ánítʼéego doo haada yitʼéii bee nichʼįʼ hadeesdzihgo aghaʼdideeshtʼááł. Haʼátʼíí lá biniyé diné doo yáʼádaashóonii yaa naakaígíí bee badaʼiideeł? Haʼátʼíí lá biniyé tʼóó baa yáhásinígi ádaatʼéii yaa nidaakaígíí tʼáá ałtso bił dahózhǫ́?
2 Kʼidahodíínílá áádóó behétłʼóól dahazlı̨́ı̨́ʼ. Dadínéesą́ áádóó bineestʼąʼ nídahoodleeł. Naa yádaałtiʼ nidi, doo deeghánídi bitsʼąą honílǫ́.
3 Nidi, Bóhólníihii nílíinii, ni éí shééhonísin. Shiiniłtsą́, ná hinishnánígíí nabínínítą́ą́ʼ. Dibé nidadootsiłii bitsʼázhnínil nahalingo bitsʼánínííł, áádóó łaʼa jı̨́ nidadootsiłígíí biniyé hashtʼedahólééh.
4 Haa lá nízáágóó kéyahígíí nidínéesdzáago naniseʼ daniiłnaʼ doo? Diné doo yáʼádaashóonii ákwii kéédahatʼínígíí biniinaa naaldlooshii índa tsídii daneezná, háálá, Anihídeidoołkáałjįʼ ahoolzhiizhgo doo yizdoołtséeł da, daaní.
5 Diné bił ałgháádíkahgo bąąh nííníyáago ákoshąʼ haa yitʼéego łı̨́ı̨́ʼ bił ałghadidííkah? Kéyah yáʼáhootʼéehgi nídígohgo ákoshąʼ Jórdan tooh bibąąhgóó hodíłchʼilgi haa nitʼı̨́į doo?
6 Azhą́ nikʼisóó danilíinii índa nizhéʼé bighandóó nidaakaígíí tʼáá éí nidi, ninádandeezʼą́. Tʼáá aaníí, éí nikééʼ dadilwosh nítʼééʼ; nizhónígo nichʼįʼ yádaałtiʼ nidi, tʼáadoo yinídlání.
7 Shaʼáłchíní yóóʼadííʼą́; shíiʼii bitsʼáníyá; shiiʼ sizíinii hánígo ayóóʼádayóʼnínígíí bidaʼanaʼí baa diníʼą́.
8 Shíiʼii éí hodíłchʼildi náshdóítsoh bitsiijįʼ ditłʼooígíí atíshidoolíiłgo shiniyé ánínígíí nahalin. Éí bąą bikʼee dínih.
9 Shííʼ nilínígíí éí tsídii łikizhígíí nahalin. Náánáłaʼ tsídii binaagóó nidaatʼaʼígíí éí bikʼee dadiniih. Naaldlooshii tʼáá ałtso dzígaidę́ę́ʼ áłah áníléehgo daʼdoolghał.
10 Tʼóó ahayóí diné aa ádahalyáanii shichʼil naʼatłʼoʼii yílʼáii atídayiilaa; shíhígíí ałtso yikʼi naaskai; shikéyahgi doo siláhígóó tʼóó honoojí ádahoolaa.
11 Doo siláhígóó ádahoolaa. Doo siláhígóó bąą shichʼįʼ yínííł nilı̨́įgo yicha. Ádił nidaʼiisíiʼii doo bąąh bíniʼígíí biniinaa kéyah tʼáá náhwiistʼą́ą́ nítʼééʼ doo siláhígóó áhoolyaa.
12 Honoojítahgi wódahgo nahazʼánígóó nidaʼiiłchǫǫhii nidahaazná. Ákwii kéyah tʼáá náhwiistʼą́ą́ nítʼééʼ Bóhólníihii bidiltłish bee niʼdootsił. Doo łaʼda bił hodéesyéel da doo.
13 Tłʼoh naadą́ą́ʼ kʼidazdeezláa nidi, hosh tʼéí dajííyizh. Nijíkai lá nidi, tʼáadoo há bilááh násdlı̨́įʼ da. Bikʼee íyéʼígi átʼéego Bóhólníihii báhóóchįįdígíí biniinaa dajííyizhii baa yádanohsin doo.
14 Diné doo yáʼádaashǫ́ǫ́góó bił kééhashtʼíinii tʼáá ałtso Bóhólníihii hakʼijįʼ nilı̨́įgo kóní, Shidineʼé Ízrel daabí áshłaa yę́ę bizhdeelniiʼii, shoo, éí hakéyah bikááʼdóó náhodideeshjihgo hatahdóó Júdah dineʼé nahjįʼ háádeeshʼnił.
15 Hatahdóó hanááshʼnildóó bikʼijįʼ baa aʼááh nánísdzin doo, áádóó diné tʼááłáʼí nítínígo daabíiʼii índa bikéyah baa náhideeshʼish.
16 Tʼáá Béíyal bízhiʼ yee ádee hadahididziihgo bíndabizneestą́ʼígi átʼéego tʼáá ákótʼéego Bóhólníihii hiná, dajiníigo bee ádee hadahizdidziihgo bídahojiiłʼą́ąʼgo, áko lá índa shidineʼé bitahgi hadziilgo ádahodiʼdoolníił ni.
17 Nidi doo akʼeh dahółʼı̨́ı̨́góó éí dineʼé náhodideeshjihgo ałtso áhodeeshdįįł, ní Bóhólníihii.
