Jeremiah 14:1-22
14 Doo nahodoołtı̨́ı̨́łgóó Bóhólníihii éí Jeremáíyah yił hoolneʼ.
2 Júdah dineʼé yínííł danilı̨́, áádóó bidáńʼdaʼditı̨́ı̨́hgóó naháaztą́ągo áda dahodeesłxááʼ. Bidineʼé tséʼyaa naazhjéeʼgo daacha áádóó Jerúsalem kin haalʼáagi kéédahatʼínígíí éí nídaʼookąąhgo hahosiiltsʼįįh.
3 Bindanitʼaʼí éí bá nidaalʼaʼí tó nídeidookááł biniyé tó hahadleehgóó anídeiłʼaah. Tóojįʼ tó hánídaakahgo tó ádin łeh. Tó bee naakáhí tó tʼáágééd nináhákááh. Áko yaa yádanízingo áádóó ádił nidaalteehgo bitsiiʼ yikʼínídaʼałtih.
4 Háálá kéyahgi doo nahałtingóó niʼgóó ahihodooltálígíí biniinaa kʼéédaʼdidléehii yádanízingo bitsiiʼ yikʼínídaʼałtih.
5 Jó, bįįhtsaʼii ałdóʼ chʼil ádinígíí biniinaa biyázhí nidayiishchı̨́įgo yóóʼadeidiiʼaahgo yitsʼą́ą́ʼ ahilyeed.
6 Chʼil ádinígíí biniinaa télii daʼałchinii wókʼą́ą́góó dah naazı̨́įgo mąʼii nahalingo yisdah danilı̨́. Chʼil ádinígíí biniinaa binákʼee dah dahodichʼah.
7 Bóhólníihii nílíinii, doo ákwii ádeiitʼįįdígíí nihaa halneʼ nidi, nízhiʼ binahjįʼ nihá atínítʼı̨́, háálá tʼóó ahayóidi tʼą́ą́ʼ anáhiniideeʼgo nichʼįʼ nidaʼayeelzííʼ.
8 Ízrel dineʼé bá chohooʼı̨́ nílíinii, bide áhootʼįįhgo yisdáyiiníiłii nílíinii, haʼátʼíí lá biniyé Ízrel dineʼé bikéyahgi déʼéyóní nílı̨́, áádóó haʼátʼíí lá biniyé łaʼ háádę́ę́ʼ dayigáałii atiin tsʼáníyáago tʼáá ákǫ́ǫ́ biiłkaahígíí nahonílin?
9 Haʼátʼíí lá biniyé diné tʼóó bił ahóóyóí áádóó haʼátʼíí lá biniyé diné hayóí yisdáʼiiníił doo yíneelʼánígíí nahonílin? Nidi, Bóhólníihii nílíinii, nihitahgi honílǫ́. Nízhiʼígíí bee nihiʼdójí. Doo nihitsʼą́ą́ʼ dahodidííleeł da.
10 Díí dineʼé Bóhólníihii kóbíłní, Yóóʼeekaígíí bił ayóó ádahootʼé. Tʼáadoo naanáskai da; éí bąą Bóhólníihii tʼáadoo náábidiiʼnil da. Áko doo ákwii ádajíítʼįįdii kʼad yéédoolnih, áádóó ádił nidaʼdziisdzíʼę́ę yee haa nídóotʼįįł.
11 Áko Bóhólníihii áshidííniid, Díí dineʼé bá yáʼátʼééh dooleełii tʼáadoo bíká sodílziní.
12 Dahodísingo chʼiyáán átsʼánídeiditʼáahgo nídaʼookąąh nidi, doo bá dideestsʼı̨́įł da. Didlidgo nááhániihii índa akʼáán nááhániihii nínádayiilniih nidi, doo bá dínéesįįł da. Nidi diltłish áádóó dichin índa naałniih bee áhodeeshdįįł.
13 Nítʼééʼ ádííniid, Bóhólníihii Diyin God nílíinii! Haʼátʼíí lá ahayóí lá. Áhodoonííł yaa dahalneʼii lá ádabiłní, Diltłish doo deidoołtséeł da, índa dichin doo nihaa doołnih da, nidi díí nihił hazʼą́ągi bee achʼįʼ hózhóonii nihaa dideeshʼááł, daaní, jóʼakon.
14 Ákohgo Bóhólníihii áshidííniid, Tʼáá ádzaagóó áhodoonííł yaa dahalneʼii tʼóó ádahodilʼíinii shízhiʼ binahjįʼ dabiyoochʼíidgo dahalneʼ. Éí doo dahóółʼaad da áádóó tʼáadoo hachʼįʼ haasdzíiʼ da índa tʼáadoo nidi hachʼįʼ yéíłtiʼ da. Tʼáadoo bił ádaadzaii áádóó tʼáadoo yídadínéeshyęęzhii, índa tʼáadoo nídoodleełii áádóó naʼadloʼ yaa nitsídaazkéezii yee nihił dahalneʼ.
15 Éí bąą Diyin God bízhiʼ bee tʼóó ádahozhdilʼı̨́įgo dahojilneʼígíí Bóhólníihii kwáháłní, Éí doo dahóółʼaad da, nidi ádaaní, Díí kéyahgi diltłish doo bee atídanihididoolníił da, índa doo dahodidoochįįł da. Nidi tʼóó ádahozhdilʼı̨́įgo dahojilneʼígíí éí diltłish áádóó dichin bee áhodeeshdįįł.
16 Dichin dahóóghą́ʼígíí índa diltłish bee nidahoʼdiztseedígíí biniinaa Jerúsalemgi kéédahojitʼínígíí kintaa daʼaztiinjįʼ chʼídahoʼdiistłʼííd, áko hó áádóó hwedaʼasdzą́ą́ índa hayeʼké áádóó hatsiʼké tʼáá bił tʼáadoo yóóʼádahóleʼé da doo. Doo yáʼáshónígi ádajíítʼįįdígíí biniinaa atíhodeeshłííł.
17 Éí bąą díí saad bee bichʼįʼ hadíídzih, háálá shidineʼé bichʼéʼé tʼah doo diné bee haleehígi átʼéego éí tsʼídá tʼáá íiyisí bikʼeʼashchʼíʼígi átʼéego atíbiʼdiilyaa. Tʼáá ákwíí tłʼééʼ índa tʼáá ákwíí jı̨́ bíniʼdii shinákʼeeshtoʼ tʼáadoo ádįįhí tʼáá náálı̨́į leʼ.
18 Tʼáá háajigo dah hidisháahgo, shoo, ákǫ́ǫ́ diltłish bee nidaaztseedii naazhjééʼ! Kin haalʼáá góneʼ yisháałgo, shoo, ákǫ́ǫ́ dichin kʼadę́ę nidabiłtseedii naazhjééʼ! Áko áhodoonííł yaa dahalneʼii índa náádaʼiiłniihii éí kéyah doo yéédahósindi tádadikááh.
19 Júdah dineʼéésh tʼáá óolyéego yóóʼadííníʼą́? Niiʼ sizíiniísh Záíyan yiyííʼįįd?* Haʼátʼíísh biniyé nihitaa síníłhaalgo tsįįhdasiildááz, áko bee nídeidziih dooígíí ádin? Bee achʼįʼ hózhóonii há dadéetʼı̨́įʼgo naháatą́, nidi yáʼátʼéehii doo nihee haleeh da. Yáʼátʼééh nídadiidleełígíí bibaʼ naháatą́ą nidi, tʼóó nihichʼįʼ nídahodiiʼnááh!
20 Bóhólníihii nílíinii, nichʼįʼ doo yáʼáshónígi ádeiidzaaígíí, índa danihizhéʼé yę́ę nichʼįʼ doo ákwii ádáátʼįįdii kʼad bee ádaa ákodaniidzı̨́ı̨́ʼ, háálá nichʼįʼ ádił nidaʼayeelzííʼ.
21 Nízhiʼ binahjįʼ doo nihidííʼįįł da. Nibikááʼdóó nahatʼáii bikááʼdóó bee ayóó ánítʼéii tʼóó baa yáhásingo doo ádíílíił da. Nihił ahaʼdíínítʼánígíí éí béénílniihgo doo kʼínítíih da.
22 Ałʼąą dineʼé bitahgóósh diyin dabidiʼníinii łaʼ nahałtingo íidoolíiłgo yíneelʼą́? Yótʼáahdiísh nahałtingo íidoolíiłgo yíneelʼą́? Bóhólníihii Diyin God nílíinii, ni lą́ą nídahodiłtı̨́įhgo áníłʼı̨́. Éí bąą nibaʼ ádaniitʼée dooleeł, háálá díí tʼáá ałtso íinilaa.
Footnotes
^ Záíyan éí Jerúsalem kin haalʼá jiníigo óolyé.
