Jeremiah 15:1-21
15 Ákohgo Bóhólníihii áshidííniid, Azhą́ Mózes áádóó Sámuel shidááhdóó yiizįʼ nidi, díí dineʼé bichʼijí aséłtą́ągo tʼáadoo tsídíkéez da. Doo shá biyeetʼı̨́ı̨́ʼ ánízáágóó yówehjįʼ aníłkaad.
2 Ákohgo, Háágóósh dadiikah? daniłníigo kóbididííniił, Bóhólníihii kóní, Dadínóonéłígíí éí dadínóonééł. Diltłish bee nidadootsiłígíí diltłish bee nidadootsił. Dichin nidabidoołtsiłígíí éí dichin nidabidoołtsił, índa dadoolnéłígíí éí dadoolnééł.
3 Bóhólníihii ání, Dı̨́ı̨́ʼ ałʼąą átʼéego daʼagháanii nidideeshʼááł: diltłish éí bee nidahodiʼdootsił, łééchąąʼí éí dahodoolghał áádóó tsídii wódahdi nidaatʼaʼii índa naaldlooshii nihokááʼgóó naaldeehii éí nidahodoołtsiłgo dahodoolghał.
4 Júdah dineʼé aláahgo binanitʼaʼí Heziikáíyah biyeʼ Manáseh éí Jerúsalem kin haalʼáagi áátʼįįdígíí biniinaa nihokááʼgóó ałʼąą dineʼé kéédahatʼı̨́įgo bee óhólníihii bił nahazʼą́ą́góó tʼóó hakʼee bił adahayóigo áhodeeshłííł.
5 Jerúsalem nílíinii, háí tʼéí nikʼédí dooleeł áádóó háí tʼéí neicha doo? Háí éí atiin yitsʼádoogáałgo, Ákóʼóolyéenii éí kʼad haitʼé? níigo nínaʼidídóołkił.
6 Bóhólníihii ání, Yóóʼashidííníʼą́; tʼą́ą́ʼ anáhítłíísh. Éí bąą nichʼįʼ kʼídíshniiʼgo atíniishłaa. Łahgo átʼéego nąąh tsínáhidiskeesígíí bąąh niníyá.
7 Éí kéyahdi dáńʼdítı̨́ı̨́h bineʼ naʼadziʼgi bee ąąh oolchʼíhí hatahgóó tádíítą́. Haʼáłchíní haghaháshʼnil. Shidineʼé atéshłaa, háálá ádaatʼéii tʼáadoo yitsʼąą tʼą́ą́ʼ dah nídiikai da.
8 Tónteel bibąąhgóó séí ánéelą́ʼígíí biláahgo asdzání bąąh ádahasdįįdgo áshłaa. Tsíłkéí dabimá atíidoolíiłii ałníʼníʼą́ągo ákwii níʼeezh. Yínííł índa bikʼeʼíyéeʼii tʼáadoo hooyání bikʼi hwiidooleełgo áshłaa.
9 Asdzání tsostsʼidi ashchíinii nidi, doo bidziil da silı̨́ı̨́ʼ. Doo bitah hwiinaʼ da, tʼahdii jı̨́įgo bee iʼííʼą́. Yánízin áádóó tʼóó baa yáhásin nítʼééʼ. Daadzíʼígíí binahjįʼ bidaʼanaʼí binááł diltłish baa hodideeshʼááł, ní Bóhólníihii.
10 Kéyah tʼáá náhwiistʼą́ą́ʼ nítʼééʼ ákwii diné kéédahatʼínígíí bił ałchʼįʼ nidaasdzilgo áádóó bił ałghaʼdadishtʼáahgo, shimá nílíinii, doo shishíníłchı̨́ı̨́jí laʼ yáʼátʼéeh dooleeł nítʼééʼ, shichʼįʼ yíiyá łáaniʼ! Tʼáadoo leʼé łaʼ diné tʼah doo baʼnishłée da, índa diné łaʼ tʼah doo tʼáadoo leʼé shaʼílée da, nidi tʼáá ałtso dashódziih.
11 Bóhólníihii ádííniid, Diné bá yáʼátʼéeh dooleeł biniyé néédideeshchił áádóó doo yáʼáshǫ́ǫ́góó hodeeyáago índa achʼįʼ hodiizʼnáaʼgo anaʼí danilíinii nídanookąąhgo ádeeshłííł.
12 Náhookǫsdę́ęʼgo béésh nitłʼizii* índa béésh łitsoiísh łaʼda kʼíidootihgo yíneelʼą́?
13 Nihikéyahgi tʼáá ałtsogóó nahósʼaʼgi ádił nidaʼayosíiʼii tʼáá átʼé biniinaa nitʼíinii índa niyódí bąąh oogą́ąʼii átʼéego tʼáadoo bą́ą́h ílínígóó nideeshnih.
14 Kéyah doo dahoohʼı̨́įdi nihiʼanaʼí danilíinii bá nidaołʼaʼ doo, háálá sháhóóchįįdígíí bee didooljéeʼgo nihikʼijįʼ dookʼą́ął dooleeł.
Bóhólníihii éí Jeremáíyah baa dzólíigo áyiilaa
15 Nił bééhózin, Bóhólníihii nílíinii, béénílniihgo shaa ninánítaah; shichʼįʼ nidahwiiłnáanii shá kʼéébidídlééh. Haʼíínílníhígíí binahjįʼ doo nahjįʼ kóshidíílíił da. Niniinaa shá nahatʼiʼgo nił bééhózin leʼ.
16 Nizaad bikʼíninítą́ą́ʼ áádóó yíyą́ą́ʼ. Nizaad bee shił hóózhǫǫd índa shijéí bee bił nihoozhǫǫh, háálá tʼáá ałtsoní bee Bóhólníihii Diyin God nílíinii, nízhiʼ bee shiʼdééjiʼ.
17 Tʼáá íiyisí doo shił hóózhǫǫdgóó áshiinilaago shikʼi dinilniiʼígíí biniinaa tʼáá sáhí sédá; bił dahoneenihii tʼáadoo bitahgi nídáa da áádóó doo shił nihonízhǫǫd da.
18 Haʼátʼíí lá biniyé shił hodiniihígíí doo nikʼeʼ da índa níshgaígíí nídooldzihgi doo yinízingóó doo nádziih da? Daʼ tó nílı̨́įgo ánádįįhgo binaʼadloʼósh nahalingo shichʼįʼ ákónítʼée doo?
19 Éí bąą Bóhólníihii kóní, Néínídzáago hadaałtʼé ánándeeshdlíiłgo shidááhdóó yidíízįįł. Tʼóó baaʼihii bitahdę́ę́ʼ ílíinii bitsʼáínínilgo yáshtiʼígi átʼéego shá yáníłtiʼ doo. Bí naa náhidookah daatsʼí, nidi ni éí tsʼídá doo bididíínáał da.
20 Áko díí diné bichʼįʼ béésh łitsoii binaa ahééʼítłʼin nahalingo tsʼídá nidziilgo áńdeeshłííł. Danóbáah doo nidi, doo nikʼeh dadidoodleeł da, háálá nił honishłǫ́ áádóó díídzihgo yisdánídeeshtééł, ní Bóhólníihii.
21 Diné doo yáʼádaashóonii bigháá nideeshtééł. Diné doo daatsʼíidii bitsʼą́ąjįʼ nikʼé nináʼdeeshdlééł.
Footnotes
^ Bábilan dineʼé ááhyiłní. Jer. 1:13.
