Jeremiah 16:1-21
16 Áádóó ałdóʼ Bóhólníihii shichʼįʼ haadzíiʼgo ání,
2 Neʼasdzą́ą́ tsʼídá doo nee hodooleeł da, áádóó kweʼé niyeʼké índa nitsiʼké tsʼídá doo hodooleeł da.
3 Háálá ayeʼké índa atsiʼké kweʼé nidahaazhchínígíí áádóó díí kéyahgi amá nidaʼjiishchínígíí índa azhéʼé há nidaʼiizhchínígíí Bóhólníihii hwee haadzíiʼgo kóní,
4 Naałniih naʼałtseedii nidahodoołtsił. Doo haa yínííł hodoosįįł da, índa doo yóóʼádahodiʼdoolníił da. Chąąʼgi átʼéego nihokááʼgóó nizdeeztąąd doo. Diltłish bee nidahoʼdidootsił áádóó dichin nidahodoołtsił. Dahatsʼíís daneeznánígíí éí tsídii wódahdi nidaatʼaʼii áádóó naaldlooshii nihokááʼgóó naaldeehii dahodooyı̨́ı̨́ł.
5 Háálá Bóhólníihii kóní, Niiʼoh nánídáahgo baa yínííł sínídá yíilaʼ, áádóó baa atínídinídleeh yíilaʼ, índa baa chaał nidísiih yíilaʼ, háálá shibee achʼįʼ hózhóonii áádóó ajoobaʼ índa aa aʼááh hasin díí dineʼé bitsʼą́ą́ʼ nahjįʼ kóshłaa, ní Bóhólníihii.
6 Díí kéyahgi ayóó ádaatʼéii áádóó aʼohgo ádaatʼéii dadínóonééł. Doo yóóʼádahodiʼdoolníił da índa doo łaʼ haa tínídindleeh da doo, áádóó doo łaʼ haa yínííł nilı̨́įgo niʼídidoolgish da, doo nidi bitsiiʼ ałtso yidooshih da.
7 Daneeznáanii yaa atínídadindleehii doo łaʼda yił daʼdooyı̨́įłgo hayidaʼíídóołnih da, índa bizhéʼé, doodaiiʼ bimá yaa atínídindleehii éí yee hadaʼíídóolniiłii bee adlání bee doo łaʼda yeidookáałgo yidoodlı̨́įł da.
8 Kin biiʼ ádaʼazįįdii góneʼ bitahgi díníídaałgo adííyı̨́ı̨́ł áádóó adíídlı̨́ı̨́ł biniyé doo yah adíínáał da.
9 Jó, Ízrel dineʼé biDiyin God tʼáá ałtsoní bee Bóhólníihii kóní, Shoo, níyoołkáałdi tʼáá níníłʼı̨́įgo díí hazʼą́ą́dóó diné bił nidahoozhǫǫhgo biinééʼ hahosiiltsʼįįhii áádóó diné bił dahózhǫ́ǫgo biinééʼ hahosiiltsʼįįhii áádóó diné daʼiiyehii dabiinééʼ hadahosiiltsʼįįhii índa asdzání bádaʼdoogehii dabiinééʼ hadahosiiltsʼįįhii niʼ kódadeeshłííł.
10 Kʼad díí dineʼé díí saad tʼáá átʼé bee bił hwíínílneʼgo, áko ádandidooniił, Haʼátʼíishąʼ biniyé doo yáʼáshónígi ánihiʼdidooníłígíí Bóhólníihii yee nihá haadzííʼ? Haʼátʼéegishąʼ doo ákwii ádeiitʼįįd da? Bóhólníihii nihiDiyin Godshąʼ haa yitʼéego bichʼįʼ ádił nidaʼayeelzííʼ?
11 Ákohgo ábididííniił, Bóhólníihii ání, Danihizhéʼé yę́ę yóóʼadashideezʼánígíí biniinaa diyin dabidiʼníinii yá nidaasʼaʼ, áádóó yichʼįʼ nidahałáá nítʼééʼ, áko yóóʼadashideezʼą́ągo shibee hazʼáanii tʼáadoo yikʼeh dahóółʼįįd da.
12 Áádóó nihí danihizhéʼé yę́ę tʼah bilááh átʼéhígo tʼóó tséʼédinda ádaotʼįįd; jó, doo dashíínółtsʼą́ąʼ da dooleełígíí biniyé tʼááłáʼí nootínígo danihijéí doo yáʼáshóonii biyiʼdóó doo nihídaʼdidzilgóó deínóhkááh.
13 Éí bąą díí kéyahdóó náánáłaʼ kéyah doo éédahózingóó anihidínéeshkał. Nihí doo dahoohʼı̨́į da, índa danihizhéʼé yę́ę tʼáadoo dahoołtsą́ą da, áko ákwii tʼáá ákwíí jı̨́ índa tʼáá ákwíí tłʼééʼ diyin dabidiʼníinii bá chodaohʼı̨́į doo. Áadi doo nihichʼooshníi da doo.
14 Bóhólníihii ání, Éí bąą Bóhólníihii éí Ízrel dineʼé Ííjip kéyahdę́ę́ʼ chʼíiníʼeezhii hiná,* doo nááháʼníi da dooígíí bichʼįʼ yoołkááł, jóʼakon.
15 Nidi, Bóhólníihii éí náhookǫs kéyahdę́ę́ʼ* Ízrel dineʼé chʼíiníʼeezhii índa kédaayahgóó Ízrel dineʼé tainooskaadę́ę́ʼ nináyiizhʼeezhii hiná, haʼníi doo. Áko dabizhéʼé yę́ę kéyah baa diníʼáníjįʼ nináhideeshʼish.
16 Bóhólníihii ání, Łóóʼ hadayiileehii tʼóó ahayóí bíká iʼííłʼaʼ; éí hadah hodiyooloh, jóʼakon. Áádóó éí bikʼijįʼ nidaalzheehii* tʼóó ahayóí bíká iʼdeeshʼaałgo daadziłgóó áádóó deílkʼidgóó índa tsé daakʼizgóó háká nidaalzheehgo áádę́ę́ʼ ninádahodiyooʼish.
17 Háálá yee ádaatʼéii tʼáá átʼé yishʼı̨́, áko tsʼídá tʼáadoo shitsʼąą dínótʼı̨́łí da, índa doo ákwii ádajitʼínígíí nidi doo shitsʼąą nidanilʼin da.
18 Doo ákwii ádajíítʼįįdígíí índa ádił nidaʼdziisíhígíí biniinaa naakidi ahą́ą́h nániiláago átsé kʼééhodideeshdlííł, háálá doo dahináanii béédaʼalyaii doo daaldinii éí shikéyah bee dajííłchxǫʼ, áko shíiʼii doo daaldinii biiʼ hadazdeesbįįd.
19 Bóhólníihii nílíinii, nee shidziilgo bineʼ naʼadziʼii shá nílı̨́; shichʼįʼ náhodiiʼnáahgo bineʼ ahinishchéehii nílíinii, nahasdzáán nidahoneesʼą́ą́dę́ę́ʼ ałʼąą dineʼé naahakáahgo tʼáá aaníí danihizhéʼé yę́ę woochʼííd áádóó tʼáadoo nánídlíinii índa doo bee aʼídeełii bííʼ daazlı̨́ı̨́ʼ, daaníi doo.
20 Dinéésh łaʼ diyin dabidiʼníinii ádá ádeidoolííł? Aooʼ, nidi éí doo dadiyin da.
21 Éí bąą díí kʼad tʼéiyá hoł béédahózingo áhodeeshłííł; éí shidziilgo áádóó ayóó áshóodziilgo hoł béédahózin doo, áko Bóhólníihii éí shízhiʼgo hoł béédahodoozįįł.
Footnotes
^ Bóhólníihii hiná jiníigo éí, Ákótʼéego tsʼídá tʼáá aaníí ákóhodoonííł, jiníigo óolyé.
^ Bábilan dineʼé ááhyiłní. Jer. 1:13.
^ Bábilan dineʼé yaa halneʼ.
