Jeremiah 17:1-27
17 Júdah dineʼé ádił nidaʼiisdzíiʼii éí dabijéí bikááʼ bee akʼedaʼashchı̨́ índa nihibikááʼ náádaʼiiniihí bikááʼdóó adeeʼ dadeezʼáhígíí éí bąąhgóó bee binídaʼashkʼaazh. Béésh nitłʼizii bee akʼeʼalchíhí índa tsé daʼílíinii dáíman wolyéii bee akʼeʼalchíhí hááhaashchiiʼgo éí bee binídaʼashkʼaazh.
2 Dawókʼą́ą́góó tsin dootłʼizh naazkaadii dabiyaagóó bikááʼ náádaʼiiniihí áádóó asdzání bee edaʼalyaii naazı̨́ yę́ęgóó hadaʼáłchíní tʼahdii yéédaalniih.
3 Kéyahdi shidził nílíinii, nitʼíinii áádóó ninaalyeʼé tʼáá ałtso índa ninaagóó kéyah nidahwiisdzojįʼ ninádahałaah doo biniyé wódah nahazʼą́ą́góó ádaalyaii ádił nidaʼiidzííh biniyé bąąh daʼoogą́ąʼii átʼéego nideeshnih.
4 Sháháchįʼgo tʼóó tséʼédinda shił halchíiʼgo ádashoołaaígíí éí hoolʼáágóó dookʼą́ą́ł dooleełígíí biniinaa nihí nihaa diníʼánígíí bidadidoohchiłgo doo danihíiʼ da dooleeł. Áko kéyah doo dahoohʼı̨́įdi nihiʼanaʼí danilíinii bá nidaałʼaʼgo ádanihideeshłííł.
5 Bóhólníihii kóní, Diné łaʼ diné yaa dzólíii áádóó diné bibee adziilii yaa dzólíii índa Bóhólníihii doo yiniizı̨́ı̨́ʼgóó yóóʼiidííʼáanii éí hóyéeʼgo bá haʼoodzííʼ.
6 Háálá diné éí séí tʼéí dadeeskʼidgi kʼaiʼ łichííʼ tʼáá sáhí ííʼáhígíí nahojílin, áádóó yáʼátʼéehii achʼįʼ náhodidleeh nidi, doo dziiłtséeh da, nidi honoojíidi doo nahałtindi táánííʼ tʼéiyá haalgaidi diné łaʼ doo kééhatʼı̨́įdi kééhojitʼı̨́į doo.*
7 Nidi diné éí Bóhólníihii yaa dzólíii áádóó Bóhólníihii bee bił chohooʼíinii éí bikʼihojidlí.
8 Áko hó tábąąhgi tʼiis kʼidoolyáago éí behétłʼóól tábąąhjigo tanooshzheeʼígíigi ájítʼée doo. Nídadiłdoh nidi, doo béédzíldzid da doo áádóó hatʼąąʼ éí tʼáá áłahjįʼ dootłʼizh doo. Doo nahałtingóó yihahgo éí doo hoʼdiiłʼáa da doo, áádóó honeestʼąʼ tʼáá náhádleeh doo.
9 Ajéí wolyéii éí naʼadloʼ nináneelʼą́ąjįʼ tsʼídá tʼáá ałtso biláahgo binaʼadloʼ, áádóó doo náodziihígi átʼéégóó tʼáá íiyisí yíchxǫʼ. Éí háí bił bééhodoozįįłgo yíneelʼą́?
10 Bóhólníihii nishłíinii diné tʼááłáʼí nítínígo yee átʼéii bikʼehgo, índa ádajooníłígíí bee bineestʼąʼ bikʼehgo hachʼįʼ ninádiʼyeeshdlééł biniyé hajéí haasííd áádóó hániʼ há nidaashkaah.
11 Déłdánii éí ayęęzhii yikʼi sidáago tʼáadoo hayiyííłjéʼígi átʼéego diné naʼadloʼ bee yitʼíinii nishóiyoołtʼeehii ákótʼé; éí hastóí dooleełígíí bichʼįʼ bíídíiską́ągo yitʼíinii bitsʼą́ą́ʼ háájí shı̨́ı̨́ silı̨́įʼgo doo áhojilyą́ą́góó dazdootsaał.
12 Hodeeyáádą́ą́ʼ ayóó átʼéii bikááʼ dah asdáhí bikááʼdóó nahatʼáago bitsʼádiʼnílíidii ákwii hodiyingo hazʼánígíí éí nihí.
13 Bóhólníihii éí Ízrel dineʼé bee bił chohooʼíinii nílíinii, tʼáá ałtso yóóʼadanizhdiiʼaahii tʼóó haa yáhásinígi ádahodiʼdoolnííł; nitsʼą́ąjigo dah dahizhdiikáahii tʼáá ałtso házhiʼ łeezh bikááʼ ádadoolnííł, háálá iiná tó háálíinii éí Bóhólníihii nilíinii yóóʼadazdeezʼą́.
14 Bóhólníihii nílíinii, ná shíłdziih, áko náshiʼdooldzíiʼ doo. Yisdáshíłteeh, áko yisdáshiʼdooltı̨́į doo, háálá ni naa hashniih.
15 Shoo, háadiyeeʼ Bóhólníihii bizaad? Hániʼdii kʼad bohodoolnííł, dashiłní.
16 Shí sízı̨́įgi tʼéí dibé baa áháshyą́ągo nikééʼ yisháłígíí bitsʼą́ą́dóó doo tsı̨́ı̨́ł nishłı̨́į da nítʼééʼ, índa diné atídadíílíłígíí doo bídin nishłı̨́į da nítʼééʼ. Baa yéíłtiʼígíí éí níínáałgo nił bééhózin.
17 Tʼáadoo shiyanahółhizí; doo yáʼátʼééhgóó hodidilzhishgo nineʼ nihesdzííh.
18 Atídashiłʼíinii hániʼdii yádanízin leʼ; shí éí tʼáadoo yánísiní. Bíniʼdii tʼáadoo ájóneʼ hasingi ádaaneʼ. Shí éí ákóoshneʼ lágo. Doo yáʼátʼéhígi bohodoolníłígíí bikʼijįʼ yiighad, áádóó naakidi ahą́ą́h nániiláago atínílééh.
Hááʼáyı̨́ı̨́h jı̨́ éí tsʼídá diyingo óolzin doo
19 Bóhólníihii kóshíłní, Nílááh, diné bidáńʼdítı̨́hígi éí Júdah dineʼé aláahgo bindanitʼaʼí yah anídaakahgi índa chʼéédaakahgi ákǫ́ǫ́ dínáahgo ákweʼé sínízı̨́, áádóó Jerúsalem kin haalʼáagi dáńʼdaʼditı̨́ı̨́hgóó tʼáá ałtso ákónínééh,
20 áádóó ábidiní, Júdah dineʼé aláahgo bindanitʼaʼí danohłíinii tʼáá ánółtso áádóó Júdah dineʼé danohłíinii tʼáá ánółtso índa Jerúsalemgi kéédahohtʼíinii tʼáá ánółtso, díí dáńʼdaʼditı̨́ı̨́hgóó yah anídaohkahii Bóhólníihii áníinii dadoohtsʼı̨́ı̨́h.
21 Bóhólníihii kóní, Ádaa ádahołyą́. Hááʼáyı̨́ı̨́h jı̨́ı̨́ góneʼ nihiyéél tʼáadoo nidaahjaahí, índa Jerúsalemgi dáńʼdaʼditı̨́ı̨́h góneʼ tʼáadoo yah adahołjiidí.
22 Danihizhéʼé yę́ę bee bichʼįʼ haasdzíʼígi átʼéego hááʼáyı̨́ı̨́h jı̨́ı̨́ góneʼ nihighandóó nihiyéél tʼáadoo chʼídahoołjiidí áádóó tʼáadoo nidaołnishí índa ákóneʼ hodiyingo ádeínóhsin.
23 Nidi tʼáadoo daʼíistsʼą́ąʼ da áádóó doo dadiʼdootsʼı̨́įł da índa doo nidabiʼdínóotįįłígíí biniyé doo nibídaʼdidzilgóó ádaʼdiilyaa.
24 Nidi Bóhólníihii kóní, Haleebee hazhóʼó dashíísółtsʼą́ąʼgo hááʼáyı̨́ı̨́h jı̨́ı̨́ góneʼ díí kin haalʼáagi dáńʼdaʼditı̨́ı̨́h góneʼ hééł doo yah adahoołjiidgóogo, nidi hááʼáyı̨́ı̨́h jı̨́ı̨́ góneʼ doo nidaołnishgóó dahodíínóhsingo,
25 áko lá índa aláahgo naatʼáanii danilíinii índa naatʼáanii danilíinii David bibikááʼdóó nahatʼáii yee dabidziilgo díí kin haalʼáagi dáńʼdaʼditı̨́ı̨́h góneʼ yah anáhoohkah doo; tsindaabąąs bijáád naakiígíí łaʼ yiiʼ naháaztą́ągo índa łaʼ łı̨́ı̨́ʼ bił deíldlóoshgo yah anáhookah doo. Júdah dineʼé bí lá áádóó binaatʼáanii danilíinii áádóó Jerúsalemgi kéédahatʼíinii yah anáhookah doo. Áko hoolʼáágóó díí kin haalʼáa doo.
26 Áádóó Júdah kéyahgi kin hadaasʼáádóó áádóó Jerúsalem bikʼi dinaago nidahósʼaʼdóó índa Bénjamin kéyahdę́ę́ʼ áádóó halgaidę́ę́ʼ índa dził naaznildę́ę́ʼ áádóó shádiʼááhdę́ę́ʼ didlidgo nááhániihii índa náádahidoonihii áádóó akʼáán náádahidoonihii índa tsin bijeeh dilidgo łikání halchinii nááhániihii áádóó Diyin God baa hojiniihgo nááhániihii Bóhólníihii bikin biiʼ sohodizin siʼą́ąjįʼ nidayiijáah doo.
27 Nidi doo dashíísółtsʼą́ą́ʼgóó hááʼáyı̨́ı̨́h jı̨́ doo hodiyingo ádeínóhsingóó índa Jerúsalemgi dáńʼdaʼditı̨́ı̨́h góneʼ hááʼáyı̨́ı̨́h jı̨́įgo hééł tʼáá yah adahoołjiidgo, áko dáńʼdaʼditı̨́ı̨́hgóó bodahodideeshniłgo diné ayóó átʼéii danilíinii éí dabighan adahididookʼą́ąłgo doo dadínóoltsis da.
Footnotes
^ Hííbrew kʼehjí tʼáá íiyisí yíchxǫʼgo bikʼeʼíyééʼ éí doo biʼdééłníígóó daatsaa jiníigo óolyé.
