Jeremiah 18:1-23
18 Bóhólníihii kótʼéego Jeremáíyah yichʼįʼ hanáánáádzíiʼgo kóní,
2 Nídiidáahgo ásaaʼ ííłʼíní bighangóó dínááh; áadi shizaad didíítsʼı̨́ı̨́ł.
3 Ákohgo ásaaʼ ííłʼíní bighangóó níyáá nítʼééʼ, ásaaʼ bee álʼíní náyoołhisgo naalnishgo yiiłtsą́.
4 Áko ásaaʼ áyiilaaígíí dah yidiiʼą́ą́ nítʼééʼ yíchxǫʼ lá, áádóó tʼáá éí hashtłʼish ałtso tááyoosʼniiʼgo tʼáá bí ásaaʼ ííłʼíní nilíinii tsʼídá bił yáʼátʼéhígíí łaʼ ánááyiidlaa.
5 Nítʼééʼ Bóhólníihii shichʼįʼ hanáánáádzíiʼgo kóní,
6 Ízrel dineʼé nohłíinii, díí ásaaʼ ííłʼíní ádzaaígíigi átʼéego ánihideeshłíiłgo bíneeshʼą́. Jó, ásaaʼ ííłʼíní hashtłʼish bílákʼee siʼánígi átʼéego dah niheeshjih, Ízrel dineʼé danohłíinii.
7 Tʼáá nahalzhiishee łaʼ dineʼé kééhatʼı̨́, éí doodaiiʼ bee óhólníihgo bił hazʼą́ą́dóó nahjįʼ hahodeeshnił áádóó doo daʼjílı̨́ı̨́góó ádahodeeshłíiłgo atíhodeeshłííł, dishníigo baa yáshtiʼgo,
8 éí dineʼé bikʼijįʼ nishłı̨́įgo yááłtiʼii doo yáʼádaashóonii yaa nidaakaígíí yitsʼą́ąjįʼ dah nídahidiikaigo shí ałdóʼ doo yáʼátʼéhígi áhodeeshłííł yę́ę łahgo átʼéego baa tsíńdeeskos.
9 Áádóó tʼáá nahalzhiishee łaʼ dineʼé índa bee óhólníihgo bił hazʼáanii tʼóó ahayóigo ádeeshłííł áádóó bikʼijishdlíi dooleeł, dishníigo baa yáshtiʼgo,
10 éí dineʼé doo shikʼeh dahojíłʼı̨́ı̨́góó shinááł doo yáʼáshóonii baa jookahgo, áko bee akʼijishdlíi dooleeł, dííniidígíí éí łahgo átʼéego baa tsíńdeeskosgo doo ádeeshníił da.
11 Éí bąą kódíníigo Júdah dineʼé índa Jerúsalem kin haalʼáagi kéédahatʼíinii kʼad bichʼįʼ handziih, Bóhólníihii kóní, Doo yáʼáshǫʼ nihiniyé áshłaa, áádóó doo yáʼátʼééhgóó nihinahosíʼą́, áko tʼááłáʼí nootínígo doo yáʼáshóonii baa naahkaii bitsʼą́ąjįʼ kʼad naa náohkááh. Índa baa nidaohkaígíí áádóó ádaohníłígíí yáʼátʼéehgo ádaahłééh.
12 Nidi doo nihá chohooʼı̨́į da, daaní, nidi tʼáá nihí nihinahatʼaʼ bikʼehgo deíníikáah doo, áko tʼááłáʼí niitínígo nihijéí doo yáʼáshóonii bee doo nihídaʼdidzilgóó deíníikáah doo.
13 Éí bąą Bóhólníihii kóní, Ízrel chʼikę́ę́h tʼah doo diné bee haleehii tʼáá íiyisí tʼóó baaʼihígi áátʼįįd. Díigi átʼéhígíishąʼ háí lá yaa hodiiztsʼą́ą́ʼ? diníigo ałʼąą dineʼé bitahgóó bínaʼídíłkid.
14 Lébanan dziłghą́ąʼdi tséʼéłkááʼgóó doo nídaʼoodlíid da; áádę́ę́ʼ tó sikʼazii danílíinii doo ádaadįįh da.
15 Jó, shidineʼé shaa dayooznahgo diyin dabidiʼníinii éí tsin bijeeh dilidgo łikání halchingo nááhániihii yichʼįʼ deidííłid. Tʼáá nááshiinídą́ʼídi bee naʼnitinii yitsʼádayiizhʼeezhgo tʼáá áhoodzaa góneʼ dah deidiiłkaigo ádił nidaʼiisíihgo ádayiilaa. Azdolkǫʼgo atiinígíí yitsʼádayiizhʼeezhgo hóchǫ́ǫ́ʼógo atiin góneʼ adayiizhʼeezh.
16 Áko bikéyahgi doo siláhígóó áádóó tʼáá áłahjįʼ diné, Tłehee yéiʼ, daaníi dooleeł biniyé ákódáátʼįįd. Éí bąą éí kéyah diné tʼááłáʼí nítínígo yą́ą́h nidadikahgo bikʼee tʼóó bił adahayóigo bitsiitsʼiin nidayiighaʼ doo.
17 Atíhoʼdiilyaa bikʼíhoolzhiizhgi haʼaʼaahdę́ę́ʼ deiyolígíigi átʼéego hweʼanaʼí dabinááł tahwiidínéeshkał. Shiniiʼ éí doo deizdoołtséeł da, nidi shineʼdę́ę́ʼ tʼéiyá deizdoołtsééł.
18 Ákohgo ádaaní, Sołtįʼ, Jeremáíyah bindahodiitʼaał, háálá náádaʼiiłniihii bee hazʼáanii doo bitsʼą́ą́ʼ ádoodįįł da, índa dahóyáanii kótʼéego daanínígíí doo bitsʼą́ą́ʼ ádoodįįł da, áádóó áhodoonííł yaa dahalneʼii saad yaa dahalneʼígíí doo bitsʼą́ą́ʼ ádoodįįł da. Haaʼíyeeʼ nahóyádadiiltih, áádóó ájíníinii tsʼídá doo deídíiltsʼįįł da.
19 Bóhólníihii nílíinii, shíísíníłtsʼą́ą́ʼ; shináádiijahígíí haʼátʼíí daaní yíníłtsʼą́ą́ʼ.
20 Yáʼátʼéehii bidiníná doo yáʼáshóoniísh aa doolyééł? Jó, shiniyé aʼáán ádahoolaa. Béénílniih, tʼóó báhádzidígi átʼéego bee atíʼélʼíinii bitsʼą́ąjįʼ kódeeshłííł biniyé yáʼátʼéehgo bá yáshtiʼ dooleeł biniyé nidááhdóó sézı̨́ı̨́ nítʼééʼ.
21 Éí bąą baʼáłchíní éí dahodidoochįįłígíí baa diníʼaah. Diltłish bee adziilii bee nidadootsiłgo baa diníʼaah. Bíniʼdii beʼasdzą́ą́ danilíinii baʼáłchíní bitsʼą́ą́ʼ nidaatseedgo bąąh ádahasdįįdgo nidaakai leʼ, áádóó diné yił nidaaʼaashii bíniʼdii nidaatseed índa bitsíłkéí danilíinii daʼahijigą́ądi diltłish bee nidaatseed leʼ.
22 Siláo łaʼ dah yinééł tʼáadoo hooyání béíníʼeezhgo dabighandóó bíniʼdii chahááʼáago diitsʼaʼ, háálá dashidiyoołhééł biniyé aʼáán ádahoolaa, áádóó łoh biih dideeshtał biniyé shá nideiznil.
23 Nidi, ni Bóhólníihii nílíinii, dashidiyoołhééł yiniyé kótʼéego daaníigo shindahazʼánígíí tʼáá ałtso nił bééhózin. Doo ákwii ádáátʼįįdígíí doo bá yóóʼadidííʼáał da, índa ádił nidaʼiisíʼígíí éí nidááhdóó doo kʼééʼdííłchǫǫł da, nidi ninááł bikʼeh hodidoodleeł. Náhóchįįdgo baa nídíítʼįįł.
