Jeremiah 19:1-15
19 Bóhólníihii kóní, Nílááh, ásaaʼ ííłʼíní hashtłʼish ásaaʼ bee tó naatʼáhí áyiilaaígíí łaʼ nídiiʼaah, áádóó diné bitahdóó hastóí daazlı̨́įʼii nídiinííł, índa náádaʼiiłniihii bitahdóó hastóí daazlı̨́įʼii nídiinííł,
2 áádóó Dáńʼdítı̨́ı̨́h Ásaatsʼiil wolyéii éí bíighahgóó yíldzis Hínam biyeʼ bíhígíí ákǫ́ǫ́ dínáahgo áadi saad bee nił hodeeshnihígíí bee yádííłtihgo
3 ádidííniił, Júdah dineʼé aláahgo bindanitʼaʼí danohłíinii índa Jerúsalem kin haalʼáagi kéédahohtʼíinii, Bóhólníihii bizaad dadoohtsʼı̨́ı̨́h. Ízrel dineʼé biDiyin God tʼáá ałtsoní bee Bóhólníihii kóní, Shoo, díí kweʼé hazʼánígi doo yáʼáshónígi áhodooníiłgo ádeeshłííł, áko éí tʼáá ałtso deidiitsʼaʼii bijaaʼ daawozh doo.
4 Jó, yóóʼadashideezʼą́, áádóó díí hazʼánígi doo bééhózingóó ádayiilaa, índa bí lá áádóó dabizhéʼé yę́ę áádóó Júdah dineʼé aláahgo bindanitʼaʼí éí diyin dabidiʼníinii doo bił béédahózinii yichʼįʼ tsin bijeeh dilidgo łikání halchinii deidiłid nítʼééʼ, áádóó diné tʼáadoo ádidahodiiltʼiʼii nideistseedgo dabidił díí hazʼą́ągi naashchiiʼgo ádayiilaa
5 índa dabiyeʼké éí Béíyal yichʼįʼ náádayiiłniihgo deidiłid dooleeł biniyé ałdóʼ Béíyal bá ninádahałaah doo biniyé wódah nahazʼą́ągo yá ádahoolaa. Ákódaohtʼı̨́į dooleeł, tʼáadoo bidííniid da áádóó tʼáadoo bee bichʼįʼ yéíłtiʼ da índa tʼáadoo nidi bikʼítsídíłkéez da.
6 Éí bąą díí kweʼé hazʼánígi doo Tófet nááhoolyée da dooleeł, índa yíldzis Hínam biyeʼ bíhígíí doo nááhoolyée da dooleeł, nidi yíldzisgi diné naaztseed hoolyée dooleeł, jóʼakon, ní Bóhólníihii.
7 Áádóó díí hazʼą́ągi Júdahdóó índa Jerúsalemdóó kótʼéego daanínígíí ádingo ádeeshłííł, áádóó diltłish bee nidahoʼditseedgo índa hazééʼ nideiʼáhígíí nidahałtseedgo ádahodeeshłííł, índa dahatsʼíís daneeznáanii éí tsídii wódahdi nidaatʼaʼii índa nihokááʼgóó naaldlooshii dabichʼiyąʼ dooleeł biniyé baa dideeshʼááł.
8 Díí kin haalʼáagi dahodeeshzhago áhodeeshłíiłgo naałniih ałʼąą áátʼeełii hááłniiʼígíí biniinaa diné díí hazʼánígíí nídayiiltséehgo bikʼee tʼóó bił adahayóigo, Tłehee yéiʼ, daaníigo yą́ą́h nídadikah doo.
9 Áádóó hweʼanaʼí honáshzhiizhgo bikʼee nitsijikaigo ádahoolaago índa hazééʼ nideiʼáhígíí hachʼįʼ nidahwiiłnáago hayeʼké áádóó hatsiʼké dabitsʼíís dahodiyeesı̨́ı̨́ł índa kwáʼásiní dajóʼníinii dabitsʼíís nídazhdoolghał.
10 Áko índa tó bee naatʼáhí éí diné nił yíkaígíí binááł dííłtsʼił,
11 áádóó ábididííniił, Tʼáá ałtsoní bee Bóhólníihii kóní, Ásaaʼ ííłʼíní éí tó bee naatʼáhí hashtłʼish yee áyiilaii łaʼda yistsʼilgo doo hashtʼenáólneʼígi átʼéego tʼáá ákótʼéego díí dineʼé áádóó díí kin haalʼáhígíí dideeshtah índa Tófetgi yóóʼádaʼalneʼ doo, háálá łahgóó doo nááhástʼą́ą da.*
12 Díí hazʼánígi índa ákwii kééhojitʼínígíí tʼáá bił tsʼídá díigi átʼéego áhodeeshłííł, áko díí kin haalʼáhígíí tʼáá Tófetgi átʼéego áhodeeshłííł.
13 Áádóó Jerúsalemgi kin yílʼáhígíí índa Júdah dineʼé aláahgo bindanitʼaʼí bikin naaznilígíí éí Tófet hazʼą́ągi hóóchǫʼígi átʼéego dadoochǫǫł, háálá dahakin tʼáá átʼé bighą́ą́ʼdóó wótʼááh hiníláii tʼáá átʼé bichʼįʼ tsin bijeeh dilidgo łikání halchinii dazhdííłid áádóó diyin dabidiʼníinii bichʼįʼ yanáadziʼgo náádahaazniiʼii yadaadziid.
14 Áko índa Jeremáíyah éí Tófetdi Diyin God bizaad baa hozhdoolnih biniyé ákǫ́ǫ́ Bóhólníihii ahóółʼaʼ yę́ę áádę́ę́ʼ nídzídzá. Áádóó Bóhólníihii bikin biiʼ sohodizin binaa hazʼánígi ákwii yiizįʼgo diné tʼáá ałtso áyidííniid,
15 Ízrel dineʼé biDiyin God tʼáá ałtsoní bee Bóhólníihii kóní, Jó, díí kin haalʼáagi áádóó bikʼi dinaago kin tʼáá áłchʼı̨́ı̨́dígo dah naazhjaaʼígíí éí tʼáá ałtso bikʼijįʼ doo yáʼáshónígi áhodoonííł, dishníigo bee haasdzíiʼii éí kʼad bikʼijįʼ kóshłééh, háálá doo nihódaʼdidzilgóó shizaad doo daznízingóó doo tʼáá kʼad dazdiiztsʼą́ąʼ da.
Footnotes
^ Tófet hazʼánígi diyin dabidiʼníinii bichʼįʼ nááhániihii nínádaʼjiiłnih nítʼééʼ. Jer. 7:31,32.
