Jeremiah 21:1-14
21 Bóhólníihii éí Jeremáíyah yichʼįʼ haadzííʼ yę́ędą́ą́ʼ aláahgo naatʼáanii Zedekáíyah éí Melkáíyah biyeʼ Pásher áádóó nááʼiiłniihii Méíyasíyah biyeʼ Zefanáíyah hachʼįʼ ayííłʼaʼgo kóní,
2 Bóhólníihii nihá nabídíłkid, háálá Bábilan dineʼé aláahgo binanitʼaʼí Nébukadnézzar nihikʼiijeeh.* Bóhólníihii tʼóó bikʼeʼayóigo naashnishígíí tʼáá ałtso bikʼehgo Nébukadnézzar nihitsʼádoonéłígíí biniyé nihíká adoolwołgo daʼátʼé.
3 Ákohgo Jeremáíyah áháłní, Zedekáíyah kóbididoohniił,
4 Ízrel dineʼé biDiyin God Bóhólníihii kóní, Shoo, Bábilan dineʼé aláahgo binanitʼaʼí índa bisiláo áádóó Kaldíya dineʼé bisiláo éí ninaa ahéʼítłʼinígíí tłʼóóʼdę́ęʼgo nihiniyé nidahaaznáago nihináshzhiizhígíí bikʼijįʼ bee nidaʼabaahii éí bee doo łaʼ dadoohłííłgóó ánihideeshłííł, áádóó éí díí kin yílʼáhígíí ałníiʼgi ałkʼiyéideestsih.
5 Áádóó tʼáá shí sháháchįʼgo bikʼeʼíyéʼígi átʼéego atínihishʼı̨́įgo tʼóó báhádzidgo atéʼéshʼı̨́įgo shigaan ayóó ábóodziilii bee nihichʼįʼ kʼídííníshniiʼgo nihił daʼahideeshgą́ą́ł.
6 Díí kin haalʼáagi diné kéédahatʼíinii áádóó dabilı̨́ı̨́ʼ atídeeshłííł. Naałniih ayóó átʼéii nahodoołtsił.
7 Bóhólníihii kóní, Áádóó bikʼijįʼ Júdah dineʼé aláahgo binanitʼaʼí Zedekáíyah índa bá nidaalʼaʼí áádóó dinéda índa díí kin haalʼáagi naałniih, áádóó diltłish índa dichin tʼáadoo dahóóghą́ą́ʼgóó dadzidziihii Bábilan dineʼé aláahgo binanitʼaʼí Nébukadnézzar índa hweʼanaʼí danilíinii áádóó hazééʼ nideiʼáii baa hodideeshʼááł. Áko doo ááhodoosįįł da, doo hakʼédí dooleeł da índa doo haa aʼááh dínóozįįł da.
8 Áádóó díí dineʼé ábididííniił, Bóhólníihii kónihiłní, Iiná dooleełgo honítʼiʼjí índa daʼdootsaałgo honítʼiʼjí bee nihił hashneʼ, jóʼakon.
9 Díí kin haalʼáagi tʼáá ákǫ́ǫ́ nidajikaii éí diltłish bee nidahodiʼdootsił, áádóó dichin índa naałniih nidahodoołtsił, nidi díí kin haalʼáádóó nahgóó chʼízhníyáii éí Kaldíya dineʼé bisiláo honáshzhiizhii dahwiidoołtsołgo éí jiináa doo, áádóó binaalteʼ jílı̨́į doo.
10 Háálá díí kin haalʼáhígi yáʼáhootʼéehgo doo níshʼı̨́į da, nidi doo yáʼáshǫ́ǫ́góó níshʼı̨́, ní Bóhólníihii, áko Bábilan dineʼé aláahgo binanitʼaʼí baa didootʼáałgo éí yihodidooniłgo ałtso iididoołkʼą́ą́ł.
Júdah dineʼé aláahgo bindanitʼaʼí bikʼijįʼ náásgóó ábiʼdidoolniił baa hóóneʼ
11 Áádóó Júdah dineʼé aláahgo binanitʼaʼí bitsʼą́ą́dóó ahoolchíiłii ábidiní, Bóhólníihii bizaad yíníłtsʼą́ą́ʼ.
12 David bitsʼą́ą́dóó ahoołchíiłii danohłíinii, Bóhólníihii kónihiłní, Tʼah abínídą́ą́ʼ doo haada yitʼéii baa hohkááh, áádóó diné bighaʼílyáii bide áhósinii bitsʼąą yisdádahohnííł. Éí doodaiiʼ doo yáʼáshónígi ádaatʼínígíí biniinaa sháháchįʼígíí kǫʼ diltłiʼígíí nahalingo hadidoonoł, áádóó łaʼda doo yidínóołtsis da.
13 Yíldzisgi tsé dah azkánígíí bighą́ą́ʼgóó kéédahohtʼíinii, nihikʼijįʼ nishłı̨́, jóʼakon, ní Bóhólníihii. Áko ádadohní, Háishąʼ nihikʼijįʼ nilíinii nihaa tiih doonééł? doodaiiʼ, Háishąʼ kéédahwiitʼíní góneʼ adahidoonééł?
14 Nidi baohkah yę́ę bitsʼą́ą́dóó nihineestʼąʼ danilínígíí bikʼehgo atídanihideeshłííł, áádóó tsin bee hodíłchʼilgo yílʼáhígíí bohodideeshniłgo ałtso adidookʼą́ą́ł, áko bikʼi dinaagóó yílʼáhígíí tsʼídá ałtso dadidoolił, ní Bóhólníihii.
Footnotes
^ Nébukadrézzar éí Nébukadnézzar ałdóʼ wolyé. 2Kgs. 25:1-11; 2Chr. 36:17-21.
