Jeremiah 22:1-30
22 Bóhólníihii kóní, Nílááh, Júdah dineʼé aláahgo binanitʼaʼí bighan góyaa dínáahgo áadi díí saad bee bichʼįʼ hadíídzih,
2 Júdah dineʼé aláahgo binanitʼaʼí nílíinii, David bibikááʼdóó nahatʼáii bikááʼdóó dah sínídáago nánítʼáii, ni lá áádóó ná nidaalʼaʼí índa nidineʼé díí dáńʼdaʼditı̨́ı̨́h góneʼ yah anáhoohkahii, Bóhólníihii bizaad deísółtsʼą́ą́ʼ.
3 Bóhólníihii kóní, Doo haada yitʼéii áádóó tʼáá ákogi átʼéii bee ánítʼé áádóó éí diné bighaʼílyáii bide áhósinii bitsʼąą yisdáhínííł, áádóó tʼáadoo niʼiyísíhí; náánáłahdę́ę́ʼ naagháii áádóó áłchíní bizhéʼé ádaadinii índa asdzání bąąh ádahasdįįdii tʼáadoo tʼáá naʼníleʼdii áníłʼíní, índa díí nahósʼaʼgi diné łaʼ tʼáadoo ádihodiiltʼiʼii diyoołhéełgo bidił bitsʼánílı̨́įgo doo ádoolníił da.
4 Áko díí bee haasdzíʼígíí bikʼeh dahonołʼı̨́įgo áko lá índa díí aláahgo naatʼáanii bighanígíí dáńʼdaʼditı̨́ı̨́h góneʼ yah anáhookah doo, áádóó David bibikááʼdóó nahatʼáii yikááʼ dah náhidinoobįįł índa bí áádóó bá nidaalʼaʼí lá índa bidineʼé éí tsindaabąąs bijáád naakiígíí yee áádóó łı̨́ı̨́ʼ yee yah anáhookah dooleeł.
5 Nidi díí bee haasdzíʼígíí tʼáadoo dasidootsʼą́ą́ʼgóogo, tʼáá shí ádee hadisdziihgo ádíshní, Díí aláahgo naatʼáanii bighan bił hazʼą́ągi doo yidoolaałí da, ní Bóhólníihii.
6 Háálá Bóhólníihii éí Júdah dineʼé aláahgo binanitʼaʼí baʼáłchíní ahoolchíiłii yaa haadzíiʼgo kóní, Shichʼįʼgo Gíliyad kéyah nahonílin áádóó Dził Lébanan bílátahjįʼ nahonílin, nidi tʼáá aaníí, honoojí nahalingo ánihideeshłííł, índa kin hadaasʼáágóó doo nidaagháhí da doo.
7 Áádóó ídaʼoołdįįłii yee anadaatʼíinii nihiniyé hashtʼedadeeshłíiłgo danihigad agháago yáʼádaatʼéehii deidootsxiłgo tsídza deidiyoołkał.
8 Áko ałʼąą dineʼé tʼóó ahayóí díí kin haalʼáhígíí yą́ą́h nídadikahgo diné tʼááłáʼí nítínígo bíighahgóó deíkáahii ádeiłníi doo, Haʼátʼíí lá biniinaa Bóhólníihii díí ayóó átʼéego kin haalʼáii kóyiilaa lá?
9 Áadi tʼą́ą́ʼ yaa nídahalneʼgo ádaaníi dooleeł, DabiDiyin God Bóhólníihii bibee ahaʼdeetʼáanii yóóʼadeideezʼą́ągo diyin dabidiʼníinii yichʼįʼ nidahałáago áádóó deidósingo biniinaa kóbiʼdiilyaa.
10 Daaztsáanii tʼáadoo baa atínídadinohdleehí, índa tʼáadoo baa yínííł nidaohkaaí, nidi yóóʼabiʼdoodlóozii baa atínídadinohdleeh, háálá éí tsʼídá doo nízhdoodáał da, áádóó hakéyah tsʼídá doo néizdooltséeł da.
11 Júdah dineʼé aláahgo binanitʼaʼí Josáíyah biyeʼ Shálam,* éí bizhéʼé Josáíyah bitsáskʼehgi nantʼáá nítʼéʼígíí áádóó kodóó haadlóozii éí Bóhólníihii baa haadzíiʼgo kóní, Doo kojįʼ nízhdoodáał da,
12 nidi yisnááh jílı̨́įgo tʼáá ahoʼdoodlózíjįʼ tʼáá áadi dazhdootsaał, áádóó díí kéyah doo néízdooltséeł da.
13 Diné doo tʼáá ákogi átʼéii yee bighan áyiilaago áádóó doo haada yitʼéii tʼáágééd náʼádeídi haghan ádajiilaago ákótʼéego hakin nizhníʼáanii, éí hachʼįʼ doo hojoobaʼ ájíníi da. Éí diné yił kééhatʼíinii doo yichʼįʼ asłáágóó áádóó doo adeenáágóó bá nidaalnishgo áyósinii doo hojoobaʼ ájíníi da.
14 Éí diné ání, Kin ayóó áníłtsogo nideeshʼááł áádóó náʼádeídi dahótsaago dahooghango ádeeshłííł, áádóó tsésǫʼ dadooleełgóó bá bighádahaasdzą́ągo ádeeshłííł, índa dilkʼis tsin neheeshjííʼ ádaałtʼą́ʼígíí biiʼdę́ę́ʼ ahéideeshkałgo łichíiʼgo deeshdlish.
15 Dilkʼis nighan biiʼdę́ę́ʼ sikaadígíí bee aláahgo naatʼáanii nishłı̨́į dooleełísh nínízin? Daʼ doósh nizhéʼé yę́ę Josáíyah diné tʼáá bitaʼígi átʼéego hináá nítʼééʼ, ayą́ą́ nítʼééʼ, doodlı̨́įłii yidlą́ą́ nítʼééʼ, áko doo haada yitʼéégóó índa tʼáá ákogi átʼéego ááníiłgo bá yáʼátʼééh nítʼééʼ?
16 Diné badahojoobáʼíii áádóó hojoobaʼ nahasʼáanii yá atéétʼįįd, áko díí kódzaaígíí tʼáá ákóneʼ íʼiilaa; éí tsʼídá shééhoʼdílzinii átʼé, ní Bóhólníihii.
17 Nidi ni adáninilníigo áádóó diné doo ádihodiiltʼiʼii diyoolyéełgo bidił doolzasgo áádóó diné bide ahwíínísingo índa tʼáá naʼníleʼdii diné biʼdoodlohgo łídoocháásh tʼéiyá baa nitsíníkeesgo baa nahídá.
18 Éí bąą Júdah dineʼé aláahgo binanitʼaʼí Josáíyah biyeʼ Jiihóíyakim éí Bóhólníihii kótʼéego baa haadzííʼ, Aháláaneʼ, shínaaí! Aháláaneʼ, shideezhí! Aháláaneʼ, bóhonishníihii! Aháláaneʼ, yee ayóó átʼéii! doo daaníigo haa atínídadindleehgo daacha da doo!
19 Télii jooshoł áádóó łeeh jííłtínígi átʼéego Jerúsalem kin haalʼáii bidáńʼdaʼditı̨́hídóó tłʼóóʼgóó chʼídahodooshołgo łeeh dahodoołtééł.
20 Dził Lébanan góde hasínáahgo dílwosh, áádóó Dził Béíshandi chánahgo handziihgo dílwosh. Bił ałchʼįʼ dah danilwoʼii tʼáá ałtso atélyaago daneeznánígíí biniinaa Dził Ábarim atiindóó ninínáahgo dílwosh.
21 Tʼáá ałtsoní bee ádaʼazįįdgo kééhótʼı̨́ı̨́dą́ą́ʼ nichʼįʼ yéíłtiʼ, nidi, Doo tʼáá kʼad nidisítsʼą́ąʼ da, díníniid. Ándishníinii doo bikʼeh honíłʼı̨́į da. Tʼáá ániid nanináádą́ą́ʼ tsʼídá tʼáá ákónítʼı̨́.
22 Nihaa ádahalyáanii éí níyoltsoh yóóʼabidooził áádóó bił ałchʼįʼ dah danilwoʼii tʼáá ałtso biʼdisnáágóó iidínóołkał, áko doo yáʼáshónígi ádaotʼįįdii tʼáá átʼé biniinaa yádanohsin doo áádóó tsʼídá tʼóó nihaa yádahodoosįįł.
23 Dził Lébanan níʼáhídi kéédahohtʼíinii, gad tahgóó danihighan ádaohłaii, nihił hahoníígaigo dooládóʼ nihikʼédí hódlǫ́ǫ da doo. Asdzání éí awééʼ bídiiʼnaʼgo bił hahoníígaiígíigi átʼéego nił hahodínóogah!
24 Bóhólníihii ání, Tsʼídá tʼáá aaníí hinishná; ákótʼéego Júdah dineʼé aláahgo binanitʼaʼí Jiihóíyakim biyeʼ Konáíyah* yinílyéii, azhą́ éí shiyoostsah bee naʼnitʼáhígíí nahonílin nidi, nahjįʼ handiyeeshxą́ą́ł,
25 áádóó dandiyoołhéełii béédanildzidii Bábilan dineʼé aláahgo binanitʼaʼí Nébukadnézzar áádóó Kaldíya dineʼé baa nidideeshʼááł.
26 Áádóó náánáłaʼ kéyahdi doo niʼdizhchı̨́įdi ni áádóó nimá nishchíinii tʼáá bił ákǫ́ǫ́ anihideeshnił, áko áadi dadíítsaał.
27 Áko kéyah bichʼįʼ nízhdóʼnééł laanaa daznízinii doo ákǫ́ǫ́ nídazhdooʼnéeł da.
28 Daʼ díí hastiin Konáíyahásh éí ásaaʼ yiskʼisii doo nidzinii nahalin? Éísh ásaaʼ doo baa hózhóonii jílı̨́? Haʼátʼíí lá biniinaa bí áádóó baʼáłchíní náánáłaʼ kéyah doo éédahósingóó adabidiʼniiskaad?
29 Kéyah, kéyah, kéyah nílíinii, Bóhólníihii bizaad diitsʼı̨́ı̨́h.
30 Bóhólníihii kóní, Díí hastiin baʼáłchíní ádin nahalingo baa akʼeʼíłchí. Éí nizhníłdįįd bijı̨́įjįʼ doo ayóó ájítʼé jidooleeł da; jó, haʼáłchíní náás ahoolchííłgóó David bibikááʼdóó nahatʼáii doo łaʼ yikááʼdóó dah náádínóodaał da, áádóó doo łaʼ Júdah dineʼé yá nantʼáa da doo.
Footnotes
^ Shálam éí Jiihóʼahaz ałdóʼ wolyé. 2Kgs. 23:31-34; 2Chr. 36:1-4.
^ Konáíyah éí Jehóíyakin ałdóʼ wolyé. 2Kgs. 24:8-15; 2Chr. 36:9,10.
