Jeremiah 23:1-40
23 Dibé baa ádahojilyáanii shikéyah hootsogi dibé naakaígíí atídajííłʼįįd áádóó tadazhnooskaadii éí doo hojoobaʼ ájíníi da, ní Bóhólníihii.
2 Éí bąą diné bá nidzizı̨́įgo nidazhnitinii éí Ízrel dineʼé biDiyin God Bóhólníihii hakʼijįʼ nilı̨́įgo kwáháłní, Shidibé hazhóʼó naakai yę́ę nihaa tadaozhjééʼ, áádóó daʼníłtsʼą́ąʼgi nihaa adahaaswod, áádóó doo bikʼi dasídóoʼı̨́įʼ da nítʼééʼ. Shoo, doo yáʼátʼéhígi ádaohdzaaígíí biniinaa atínihideeshłííł, ní Bóhólníihii.
3 Áádóó daʼníłtsʼą́ąʼgi kédaayahgóó shidibé adahinéłkaadii éí daadziihígíí áádę́ę́ʼ nináhidínéeshkałgo tʼááłáhíjįʼ áłah áńdeeshdlííł, áádóó baʼáłchíní nínááhodoodleełgo kʼeeʼąą náánootʼı̨́įł doo.
4 Áko diné bikʼi dadéezʼı̨́įʼii baa ádahalyą́ą dooleeł biniyé nideeshnił. Éí hadaʼałtsoʼ doo, áádóó doo nínáádadzildzid da doo, áádóó doo hąąh náádahakaʼ da doo, índa tʼáadoo bídin dajílíní da doo, ní Bóhólníihii.
5 Bóhólníihii ání, Jó, bichʼįʼ yoołkááł, David bidineʼé ahoolchíiłii éí bitsʼą́ą́dóó tʼáá ákogi átʼéego atsʼáozʼaʼ łaʼ hadínóoséełgo yidootsoh; éí aláahgo naatʼáanii nilı̨́įgo hóyą́ągo nantʼáa doo. Kéyah tʼáá náhwiistʼą́ą́ nítʼééʼ doo haada yitʼéégóó áádóó tʼáá ákogi átʼéego ááníił doo.
6 Éí bíyoołkáałdi Júdah dineʼé áádóó Ízrel dineʼé yisdádooʼnił, áádóó biʼanaʼí danilíinii doo baa nídaatʼı̨́ı̨́góó kééhatʼı̨́į doo. Bóhólníihii bee tʼáá ákogi ádaniitʼéii, díí yízhíhígíí bee biʼdójíi doo.
7 Bóhólníihii ání, Éí bąą bichʼįʼ yoołkááł, jóʼakon, Bóhólníihii éí Ízrel dineʼé Ííjip kéyahdę́ę́ʼ chʼíiníʼeezhii hiná, doo nááháʼníi da doo.
8 Nidi, Náhookǫsdi kéyahdę́ę́ʼ Ízrel dineʼé chʼíiníʼeezhii índa kédaayahgóó tainooskaadii tʼáá átʼé áádę́ę́ʼ Ízrel dineʼé nináyiizhʼeezhii Bóhólníihii hiná, haʼníi doo. Áko tʼáá bí bikéyahgi kééhatʼı̨́į doo.
Halneʼii ádahodilʼíinii bikʼijįʼ yátiʼ
9 Áhodoonííł yaa dahalneʼii biniinaa yínííł nishłı̨́įgo atínídinishdleeh, áádóó shitah nahwiiłná. Bóhólníihii áádóó bizaad diyinii biniinaa diné éí wáin bikʼeh deesdlı̨́ʼígi átʼéego shił honeezdo nahonishłin.
10 Háálá kéyah bikááʼgóó adilyé tʼéí nihinééstʼeʼ. Hóyéeʼgo haʼoodzíʼígíí biniinaa kéyah yínííł nilı̨́įgo atínídindleeh. Dahonoojíígóó dahootsoígíí nídááltseigo daazgan. Doo yáʼátʼééhgóó dahiná, áádóó yee dabidziilii doo ákǫ́ǫ́ ádaatʼée da.
11 Háálá áhodoonííł yaa dahalneʼii éí náádaʼiiłniihii biłgo doo yáʼádajíshǫ́ǫ da. Tʼáá aaníí, shikin biiʼ sohodizin biiʼ doo yáʼádajíshǫ́ǫ́góó shił bééhoozin, ní Bóhólníihii.
12 Éí bąą yildahgóó éí chahałheełgi atiin hwíídéeltǫʼ nahalingo bee bá adahwiiztʼiʼ doo. Áko éí hwíídéeltǫʼgo daʼnítiinjįʼ adahodíʼnóolkałgo atídahodoolííł, háálá atíhodeeshłíiłgo yihah góneʼ doo yáʼáshǫʼ haa dideeshʼááł, ní Bóhólníihii.
13 Samériya kéyahdóó áhodoonííł yaa dahalneʼii doo hóshkał yaa nidaakaigo yiiłtsą́. Béíyal diyin bidiʼníinii yinahjįʼ dahoolneʼgo shidineʼé daʼasiihgo ádayiilaa.
14 Nidi Jerúsalem kin haalʼáagi áhodoonííł yaa dahalneʼii tʼóó baaʼihii yaa naakaigo yiiłtsą́: dadilé áádóó dabiyoochʼíidgo dahiná índa doo yáʼátʼééh ádaaníiłii dabidziilgo ádeileʼ, áko łaʼda doo yáʼáshóonii yaa naagháhígíí doo yitsʼágháah da. Éí tʼáá ałtso Sádamgi diné kéédahatʼı̨́ı̨́ nítʼééʼ yę́ę nahalingo áádóó ákwii kéédahatʼínígíí éí Gomárahgi diné kéédahatʼı̨́ı̨́ nítʼééʼ yę́ę nahalingo baa nitsídaaskees.
15 Éí bąą tʼáá ałtsoní bee Bóhólníihii éí áhodoonííł yaa dahalneʼii yaa haadzíiʼgo kóní, Jó, díchʼíiʼii hodadiyeesı̨́ı̨́ł áádóó tó ánítʼı̨́įhii hodadiyeeshdlı̨́ı̨́ł,* háálá Jerúsalemdóó áhodoonííł yaa dahalneʼii bitsʼą́ą́dóó Diyin God doo bá iináájí iinánígíí háátʼiʼ silı̨́įʼgo kéyah tʼáá náhwiistʼą́ą́ nítʼééʼ bikááʼgóó nihinééstʼeʼ.
16 Tʼáá ałtsoní bee Bóhólníihii kóní, Áhodoonííł yaa dahalneʼii nihił dahalneʼígíí bizaad tʼáadoo deínółtsʼą́ʼí. Woochʼííd baa dadzíínóhłíigo ádanihileʼ. Bóhólníihii yee hahaasdzíiʼii doo yaa dahalneʼgóó tʼáá bí dabijéí biyiʼdi yee yaa nitsídaazkéezii yaa dahalneʼ.
17 Dashiʼíinii yichʼįʼ tʼáá áłahjįʼ kódeiłní, Bóhólníihii ádííniid, Yáʼátʼéehgo dahinohnáa dooleeł, nihiłní. Áádóó diné tʼááłáʼí nítínígo dabijéí yee nidaalteehii yikʼehgo deíkáahii, Doo yáʼátʼéehii doo nikʼi hwiidooleeł da, deiłní.
18 Háíyeeʼ Bóhólníihii baa ahíʼiildeeʼgo Bóhólníihii bizaad baa ákodínéesįįł áádóó dideestsʼı̨́ı̨́ł nízingo ákwii yiizįʼ? Háí éí Bóhólníihii bizaad yidiiztsʼą́ąʼgo átʼé niizı̨́ı̨́ʼ?
19 Jó, níyoltsoh éí Bóhólníihii tʼóó báhádzidgo báhóóchįįdígíí niheeldoh. Éí náátsʼóʼoołdísiitsoh tʼáá íiyisí tʼóó bikʼeʼíyéʼígi átʼéego diné doo yáʼájíshóonii yikʼi chʼídoogááł.
20 Bóhólníihii bijéí biiʼdi yaa nitsíkeesii ałtso yiʼiilaago áádóó ałtso yinaashnishjįʼ índa báhóóchįįdii baa náhodoodleeł. Akéeʼdi yoołkáałdi nizhónígo bikʼidadiʼdoohtı̨́ı̨́ł.
21 Díí dahalneʼii doo déíłʼaad da, nidi dahalneʼgo tádadookai. Tʼáadoo bichʼįʼ haasdzíiʼ da nidi dahoolneʼ.
22 Nidi shaa ahíʼiildeeʼgo ákweʼé dadziizįʼgo tʼéiyá shizaad bee shidineʼé bił dahojoolneʼ doo nítʼééʼ, áádóó doo yáʼáshǫ́ǫ́góó dahináanii índa doo yáʼáshǫ́ǫ́góó ádaatʼíinii bitsʼą́ąjįʼ dah nídabizhdiiłkai doo nítʼééʼ.
23 Diyin God nízaadi hólóonii doo nishłı̨́į da, nidi kǫ́ǫ́ honishłǫ́, ní Bóhólníihii.
24 Doo yideestséeł da biniyé doo dahootʼı̨́įdi diné łaʼ nídidootʼı̨́įłgoósh yíneelʼą́? ní Bóhólníihii. Yáʼąąsh áádóó nahasdzáán tʼáá ałtsogóó biiʼ honishłǫ́, ní Bóhólníihii.
25 Áhodoonííł yaa dahalneʼii shízhiʼ binahjįʼ woochʼííd yaa dahalneʼgo, Neisííyeel, neisííyel, daaníigo disétsʼą́ą́ʼ.
26 Haa nízáágóoshąʼ? Áhodoonííł yaa dahalneʼii woochʼííd yaa dahalneʼgo bijéí yee bindaʼadloʼgo yaa nitsídaakeesígíí bijéí biiʼ dahólǫ́ǫgoósh ádaatʼı̨́?
27 Éí nideizyeelígíí yee ahił dahalneʼgo shidineʼé éí shízhiʼ yaa deidiyoonah danízingo yiniyé ádaatʼı̨́. Tʼáá ákótʼéego dabizhéʼé yę́ę ałdóʼ Béíyal yichʼįʼ nidahałáá nítʼééʼ yę́ę biniinaa shízhiʼ yaa dayooznah.
28 Áhodoonííł yaa halneʼii neizyeelígíí hániʼdii yaa halneʼ. Tʼáá háiida shizaad neiʼáii éí hániʼdii baʼahódlíigo shizaad yaa halneʼ. Tłʼoh naadą́ą́ʼ yigizhgo bitsiin éí bineestʼąʼ doo bił aheełtʼée da yaʼ? ní Bóhólníihii.
29 Shizaad éí tsʼídá kǫʼ nahalin áádóó bee atsidí tsé kʼíyiiłneʼii nahalin, ní Bóhólníihii.
30 Éí bąą áhodoonííł yaa dahalneʼii tʼááłáʼí nítínígo náánáłaʼ halneʼé nilíinii shizaad yee deiniʼįįhii hakʼijįʼ nishłı̨́, jóʼakon, ní Bóhólníihii.
31 Áhodoonííł yaa dahalneʼii dabitsooʼ chodayoołʼı̨́įgo, Bóhólníihii kóníí lá, daaníinii éí bikʼijįʼ nishłı̨́, jóʼakon, ní Bóhólníihii.
32 Doo tʼáá aaníí naʼiisgeelii yaa dahalneʼii, éí dabiyoochʼíidgo áádóó tʼáadoo biniyéhígóó yee ádaa dahaʼniihgo yee shidineʼé ádił nidaʼiilzíihgo ádeileʼii éí bikʼijįʼ nishłı̨́, jóʼakon, ní Bóhólníihii. Nidi éí tʼáadoo dahóółʼaad da, áádóó kódadohníi dooleeł tʼáadoo hodííniid da, índa díí dineʼé tʼáadoo bee bá chodajooʼįįhí da, ní Bóhólníihii.
33 Ákohgo díí dineʼé łaʼ, éí doodaiiʼ áhodoonííł yaa dahalneʼii łaʼ, doodaiiʼ náádaʼiiłniihii łaʼ, Bóhólníihii haa yitʼéego baa nááháneʼ?* níigo nanihídééłkidgo kótʼéego bichʼįʼ háádíídzih, Haa yitʼéego haneʼígíí ááhdiní? Nihí yóóʼanihidideeshʼááł, nihiłní Bóhólníihii bididííniił.
34 Áádóó áhodoonííł yaa dahalneʼii łaʼ áádóó náádaʼiiłniihii łaʼ índa dinéda łaʼ, Bóhólníihii bitsʼą́ą́dę́ę́ʼ íiyisí baa haneʼii, níigo yáłtiʼii éí diné baʼáłchíní tʼáá bił atídeeshłííł.
35 Nidi diné tʼááłáʼí nítínígo yił kééhatʼíinii, índa hakʼis nilíinii, Bóhólníihii haa yitʼéego nihichʼįʼ énáhoosįįd? doodaiiʼ, Bóhólníihii haa yitʼéego hanáánáádzííʼ? daʼahidohʼníi dooleeł.
36 Áko kodóó Bóhólníihii bitsʼą́ą́dę́ę́ʼ haneʼii doo łaʼ náádidooʼniił da, háálá diné tʼááłáʼí jinítínígo tʼáá hó hazaad chodajoołʼı̨́į doo, áádóó Diyin God hináanii, éí tʼáá ałtsoní bee Bóhólníihii nihiDiyin God bizaad łahgo átʼéego ádaohłaa.
37 Kótʼéego áhodoonííł yaa halneʼii bichʼįʼ yádaołtiʼ doo, Bóhólníihii haa yitʼéego nichʼįʼ énáhoosįįd? áádóó, Bóhólníihii haa yitʼéego hanáánáádzííʼ? dabidohníi doo.
38 Nidi, Díí Bóhólníihii bitsʼą́ą́dę́ę́ʼ haneʼ, dadohníigo tsʼídá nihichʼįʼ Bóhólníihii kóní, Díí Bóhólníihii bitsʼą́ą́dę́ę́ʼ haneʼ bee hadasoohdzíʼígíí bąą, Díí Bóhólníihii bitsʼą́ą́dę́ę́ʼ haneʼ, tʼáadoo dadohníní, nihidishníigo nihichʼįʼ iʼííłʼaʼ.
39 Éí bąą tsʼídá nánihidideeshjihgo* nihí áádóó danihizhéʼé yę́ę tʼáá bił kin haalʼáago nihaa diníʼáanii ákwii honishłǫ́ǫ́dóó átsʼá nihideesxas, jóʼakon.
40 Áádóó doo baa hodiyooʼnahgóó hoolʼáágóó nihikʼijįʼ yátiʼgo índa nihaa yáhásingo ánihideeshłííł.
Footnotes
^ Tiʼdahooʼníihii áádóó achʼįʼ dahoʼdiisnáaʼii ááhyiłní.
^ Hííbrew kʼehjí hééł áádóó haneʼ saad tʼááłáʼí átʼé.
^ Hííbrew kʼehjí kóní.
