Jeremiah 24:1-10
24 Ákohgo Bábilan dineʼé aláahgo yinanitʼaʼí Nébukadnézzar éí Jiihóíyakim biyeʼ Jekonáíyah,* éí Júdah dineʼé aláahgo yinanitʼaʼí nilı̨́įgo áádóó Júdah dineʼé yinaatʼáanii danilíinii índa kin ádeiłʼíinii áádóó béésh nitłʼizii deitsidii Jerúsalem kin haalʼáádóó yisnáago Bábilan kéyahdi yiníʼeezhdóó bikʼijįʼ kótʼéego Bóhólníihii bitsʼą́ą́dę́ę́ʼ shił áhoodzaa: shoo, Bóhólníihii bikin biiʼ sohodizin bichʼéédą́ąʼgi fig sikaadii bineestʼąʼ tsitsʼaaʼ naakigo bee niiką́.
2 Fig áłtsé neestʼánígíí yáʼádaatʼéehii tsitsʼaaʼ tʼááłáʼí bee siką́. Łaʼ éí fig doo yáʼádaatʼéhígíí, tʼáá íiyisí tʼóó badaaʼihígíí, doo jóoyą́ʼígi ádaatʼéhígíí tsitsʼaaʼ bee siką́.
3 Ákohgo Bóhólníihii áshidííniid, Jeremáíyah, haʼátʼíísh yíníʼı̨́? Áko ádíshní, Fig bineestʼąʼ. Łaʼ fig yáʼádaatʼééh, tʼáá íiyisí yáʼádaatʼééh, áádóó łaʼígíí éí fig doo yáʼádaatʼéeh da, tʼáá íiyisí doo yáʼádaatʼéeh da, doo jóoyą́ʼígi ádaatʼée da.
4 Áádóó Bóhólníihii shichʼįʼ hanáánáádzíiʼgo kóní,
5 Ízrel dineʼé biDiyin God Bóhólníihii kóní, Júdah kéyahdóó dabiʼdisnáago dah biʼdiijaaʼígíí díí fig yáʼádaatʼéhígíí nahalingo baa ákodínéesįįł. Éí bá yáʼádaatʼéeh dooleeł biniyé kodóó Kaldíyadę́ę́ʼ dineʼé bikéyahgóó dahóółʼaad.
6 Há yáʼádaatʼéeh dooleeł biniyé hakʼi díshʼı̨́įʼ doo, áádóó tʼáá díí kéyahjįʼ nináhodeeshjih. Áádóó kʼeeʼąą náázhnootʼı̨́įłgo ánáhodeeshdlííł. Doo tʼą́ą́ʼ kónáhodeeshdlíił da, áádóó kʼidahodideeshłééł. Doo hadahodiyeestsʼǫł da.
7 Áádóó Bóhólníihii nishłı̨́įgo shéédahodzísin dooleełígíí biniyé hajéí ákótʼéego bee nitsídadzikees dooleełígíí haa dadideeshʼááł, áádóó shidineʼé dajílı̨́į doo, índa haDiyin God nishłı̨́į doo, háálá hajéí tʼáá átʼé bee shaa nízhdookah.
8 Nidi Bóhólníihii kóní, Fig tʼóó baaʼihgo doo jóyą́ą́ʼ átʼée daígi átʼéego Júdah dineʼé aláahgo binanitʼaʼí Zedekáíyah áádóó binaatʼáanii danilíinii áádóó díí kéyah siʼą́ągi Jerúsalemgi dadzidziihígíí índa Ííjip kéyahdi kéédahatʼínígíí yóóʼahodideeshʼááł.
9 Áádóó tʼáá tahwiidínéeshkałgóó nahasdzáán tʼáá siʼą́ą́ nítʼééʼ bikááʼgóó diné kéédahatʼı̨́ı̨́góó hakʼee tʼóó bił adahayóigo, áádóó doo yáʼáshóonii dajílı̨́įgo, áádóó há nidahałtʼiʼgo, áádóó hwee ałdlodadilchíigo, áádóó hwee niyáʼádahodiltiʼgo, índa dahódziihgo áhodeeshłííł.
10 Hó áádóó dahazhéʼé yę́ę kéyah baa diníʼáanii bikááʼdóó áhosíłdįįdjįʼ hatahgóó diltłish bee nidahodiʼdootsiłii áádóó dichin nidahodoołtsiłii índa naałniih bikʼee ázhdoodįįłii baa hodideeshʼááł.
Footnotes
^ Jekonáíyah éí Jehóíyakin ałdóʼ wolyé.
