Jeremiah 25:1-38
25 Josáíyah biyeʼ Jiihóíyakim éí Júdah dineʼé aláahgo yinantʼáago dı̨́ı̨́ʼ náhááh góneʼ áádóó ałdóʼ Nebukadnézzar éí Bábilan dineʼé aláahgo yinantʼáago tsʼídá áłtsé náhááh góneʼ Jeremáíyah éí Júdah dineʼé tʼáá ałtso baa yátiʼgo bił hóóneʼ yę́ędą́ą́ʼ,
2 Diyin God yá halneʼii Jeremáíyah éí Júdah dineʼé tʼáá ałtso índa Jerúsalem kin haalʼáagi kéédahatʼíinii tʼáá ałtso yee yichʼįʼ haadzíiʼgo kóní,
3 Éíman biyeʼ Josáíyah éí Júdah dineʼé aláahgo yinantʼáago tááʼtsʼáadah náhááh góneʼ áádóó wóshdę́ę́ʼ díí jı̨́įjįʼ Bóhólníihii shichʼįʼ hanádzihgo naadiin tááʼ nááhai, áko tʼah abíínídą́ą́ʼ náádiishʼnahgo nihichʼįʼ yáshtiʼgo tʼáadoo dasidootsʼą́ąʼ da.
4 Bóhólníihii bá nidaalʼaʼii tʼáá ałtso Diyin God yá dahalneʼii danilíinii nihichʼįʼ ałnááyiisʼaad, nidi tʼáadoo daʼíísóołtsʼą́ąʼ da, índa daʼíídóołtsʼįįł biniyé tʼáadoo bíká dah dadínóohtʼą́ą da.
5 Éí ádaaní, Tsʼídá tʼááłáʼí nootínígo doo yáʼáshǫ́ǫ́góó deínóhkáahii índa doo yáʼáshǫʼ baa nidaahkaii bitsʼánóhkááh. Áádóó Bóhólníihii éí kéyah ałkʼidą́ą́ʼ danihizhéʼé yę́ę índa nihí ałdóʼ kéyah hoolʼáágóó biiʼ kééhohtʼı̨́į dooleeł biniyé nihaidiníʼáanii biiʼ kééhohtʼı̨́.
6 Áádóó diyin dabidiʼníinii bá nidaałʼaʼ dooleeł biniyé índa bichʼįʼ nidahohłáa dooleeł biniyé tʼáadoo bichʼįʼ dah nídoohjahí, áádóó baa nidaahkaígíí bee tʼáadoo shá nídahołchįįhí, áko doo atínihideeshłíił da.
7 Nidi tʼáadoo dashíísóołtsʼą́ąʼ da, áko tʼáá nihí baa nidaahkaígíí bee atíʼádadołnéehgo shá dahodoołchįįł, ní Bóhólníihii.
8 Éí bąą tʼáá ałtsoní bee Bóhólníihii kóní, Shizaad tʼáadoo shá dasidootsʼą́ʼígíí biniinaa
9 náhookǫs biyaají dahooghandóó dah daʼíldéehii tʼáá ałtso náhideeshłahgo shá naalʼaʼí Bábilan dineʼé aláahgo binanitʼaʼí Nébukadnézzar éí díí kéyahígíí yaatįįh dooʼish biniyé bichʼįʼ deeshʼaał, índa yikááʼ kééhatʼíinii áádóó bikʼi dinaago ałʼąą dineʼé kééhatʼínígíí tsʼídá tʼáá ałtso yaatįįh dookah, áádóó tsʼídá ałtso atíhodeeshłííł, áádóó hakʼee tʼóó bił adahayóigo, Tłehee yéiʼ, daaníigo hą́ą́h nídadikah doo, índa hoolʼáágóó doo naagháhígóó hazʼą́ągo áhodeeshłííł, jóʼakon, ní Bóhólníihii.
10 Áádóó ałdóʼ diné yee ahił dahólzhóonii, áádóó diné yaa bił nidahoozhǫǫhii, áádóó iiyehii baa bił hózhóonii, áádóó báʼdoogehii baa bił hózhóonii, áádóó tsé daashjééʼ bikáaʼgi tsé daashchʼíní bee daʼjikʼáago dadiitsʼaʼii, índa bee hoolʼiní bee adinídíinii hatsʼą́ą́ʼ nahjįʼ kódeeshłííł.
11 Áko díí kéyah tʼáá náhwiistʼą́ą́ nítʼééʼ doo naagháhí da doo, áádóó tʼóó bikʼee ayói doo, índa díí dineʼé dajílíinii tsostsʼidiin nááhaijįʼ Bábilan dineʼé bá nidajilʼaʼ doo.
12 Áko tsostsʼidiin nááhai bíighah azlı̨́įʼjįʼ Bábilan dineʼé aláahgo binanitʼaʼí índa diné yinantʼáhígíí tʼáá kééhatʼı̨́ı̨́ nítʼééʼ tʼáá bił doo ákǫ́ǫ́ ádajitʼínígíí biniinaa atíhodeeshłííł, áko Kaldíya dineʼé bikéyah tʼáá náhwiistʼą́ą́ nítʼééʼ atídeeshłíiłgo doo naagháhígóó ahoolʼáa doo.
13 Shizaad tʼáá ałtso éí kéyah bikʼijįʼ haasdzíiʼii bohodoolnííł. Jeremáíyah éí ałʼąą dineʼé tʼáá ałtso yee yikʼijįʼ haadzíiʼii díí naaltsoos biyiʼ bikʼinídaháasdzooígíí bohodoolnííł.
14 Jó, ałʼąą dineʼé tʼóó ahayóí áádóó aláahgo naatʼáanii danilíinii ayóó ádaatʼéii naalteʼ dajílı̨́įgo ałdóʼ ádahodoolííł, áádóó ádajooníiłii, índa ádajíítʼįįdii bikʼehgo kʼééhodideeshdlííł.
Ałʼąą dineʼé bá tʼóó báhádzidgo bee atíʼélʼíinii bee adlání bee dah yikáałii
15 Kótʼéego Ízrel dineʼé biDiyin God Bóhólníihii shichʼįʼ haadzíiʼgo kóní, Wáin tʼóó báhádzidgo bee atíʼélʼíinii átʼéego díí bee adlání bee dah yishkáłígíí nídiikaah áádóó ałʼąą dineʼé tʼáá ałtso bitahgóó díkaahgo dabidiyííłdlı̨́ı̨́ł.
16 Áádóó diltłish hatah góneʼ bił adoonéełgo ádeeshłíłígíí biniinaa dazhʼdoodlı̨́įłgo nidazhnitʼigo tʼóó ádahozdiilgis doo.
17 Áko Bóhólníihii éí bee adlání yee dah ookáałii nídiiką́ągo ałʼąą dineʼé tʼáá ałtso bichʼįʼ shidoolʼaadii dabiyííłdlą́ą́ʼ.
18 Jerúsalemgi kéédahatʼíinii áádóó Júdah kéyahgi kin hadaasʼáágóó kéédahatʼíinii índa kǫ́ǫ́ aláahgo naatʼáanii danilíinii índa naatʼáanii danilíinii kéédahojitʼínígóó tʼáá díí jı̨́įdi átʼéhígi átʼéego hóyéeʼgo há haʼoodzíiʼii ałtso áhoʼdisdįįd doo, áádóó diné bikʼee tʼóó bił adahayóigo, Tłehee yéiʼ, daaníigo yą́ą́h nidadikah doo, índa doo naagháhígóó hwiidooʼaał biniyé dahodiyeeshdlı̨́ı̨́ł,
19 áádóó Ííjip dineʼé aláahgo binanitʼaʼí Féro, índa bá nidaalʼaʼii tʼáá ałtso, áádóó naatʼáanii dah yooʼishígíí tʼáá ałtso, índa bidineʼé tʼáá ałtso,
20 áádóó déʼéyóní danilíinii tʼáá ałtso áádóó Uz kéyahdóó aláahgo naatʼáanii danilíinii tʼáá ałtso índa Filístiya dineʼé aláahgo binanitʼaʼí danilíinii tʼáá ałtso áádóó Áshkelan dineʼé índa Géíza dineʼé áádóó Ékran dineʼé índa Áshdad dineʼé daadzíʼígíí,
21 áádóó Íídam dineʼé índa Móʼab dineʼé áádóó Áman dineʼé,
22 Táir dineʼé aláahgo bindanitʼaʼí tʼáá ałtso, índa Sáídan dineʼé aláahgo bindanitʼaʼí tʼáá ałtso, áádóó tónteel bibąąhgóó kédaayahdóó aláahgo naatʼáanii danilíinii tʼáá ałtso,
23 Díídan áádóó Tííma índa Baz kédaayahgóó kéédahatʼíinii tʼáá ałtso áádóó dabitsiiʼ bibąąhgóó nídeishihii tʼáá ałtso,*
24 índa Aréíbiya dineʼé aláahgo bindanitʼaʼí tʼáá ałtso, áádóó déʼéyóní dineʼé honoojíidi kéédahatʼíinii aláahgo bindanitʼaʼí tʼáá ałtso,
25 Zímrai dineʼé aláahgo bindanitʼaʼí tʼáá ałtso, Íílam dineʼé aláahgo bindanitʼaʼí tʼáá ałtso, áádóó Míídiya dineʼé aláahgo bindanitʼaʼí tʼáá ałtso,
26 áádóó náhookǫsjí nízaadi aláahgo naatʼáanii danilíinii índa tʼáá áyídígóó aláahgo naatʼáanii danilíinii éí tʼáá ałkééʼ dah nídahidinoobįįłii éí tʼáá ałtso, áádóó nahasdzáán tʼáá nahazʼą́ą́ nítʼééʼ bikááʼgóó kéyah naaznilii éí bikáaʼgi diné kéédahatʼı̨́ı̨́góó aláahgo binanitʼaʼí dahólóonii tʼáá ałtso bee adlání yiiʼdóó daʼdoodlı̨́ı̨́ł, áádóó bikʼijįʼ Shííshak* dineʼé aláahgo binanitʼaʼí bee adlání yiiʼdóó adoodlı̨́ı̨́ł.
27 Éí kóbididííniił, Ízrel dineʼé biDiyin God, tʼáá ałtsoní bee Bóhólníihii kóní, Diltłish bee nidanihiʼditseedgo ánihideeshłííł biniinaa daohdlą́ áádóó nihił nidahondooh leʼ áádóó nídaohkwih índa danohnéego doo náádidoohjah da.
28 Ákohgo deidoodlı̨́įłii doo deinízingóó nílákʼeedóó tʼáadoo nídeidiiką́ą́góogo áadi ábididííniił, Tʼáá ałtsoní bee Bóhólníihii kóní, Tsʼídá tʼáá dadoohdlı̨́łí.
29 Háálá kin haalʼáii shízhiʼ bee wójíii bikʼijįʼ atíʼdeeshłíiłgo baa nídiisdzá, jóʼakon. Ákoósh nihí doo atínihidiʼdoolníił da? Nihí ałdóʼ atínihidiʼdoolnííł, háálá tʼáá ałtsoní bee Bóhólníihii kóní, Nihokááʼ dineʼé tʼáá ałtso atídoolnííł biniyé diltłish yee atídaʼałʼíinii hágo bidideeshniił.
30 Éí bąą díí saad tʼáá átʼé bee bikʼijįʼ handziihgo ábidiní, Aghánáhóóʼáádę́ę́ʼ Bóhólníihii ayóó íitsʼaʼgo ádidooniił, áádóó hodiyingo kééhatʼı̨́ı̨́dę́ę́ʼ biinééʼ didootsʼı̨́ı̨́ł. Kééhatʼı̨́ bighą́ą́ʼdóó ayóó íitsʼaʼgo ádidooniił. Chʼil naʼatłʼoʼii bitooʼ hayídaʼiiłʼésígíí hayídaʼiiłʼéesgo dadilwoshígi átʼéego nihokááʼ dineʼé tʼáá ałtso yikʼijįʼ nilı̨́įgo hadidoolwosh.
31 Bóhólníihii éí ałʼąą dineʼé yił ałghaʼdaditʼáhígíí biniinaa nahasdzáán nidahoneesʼą́ąjįʼ ahodzooltsʼą́ą́ʼ. Ałʼąą dineʼé tʼáá ałtso yá nihwiiʼaah doo. Diné doo yáʼádajíshóonii éí diltłish bee nidahodidootsiłjįʼ nináhodidooʼááł, ní Bóhólníihii.
32 Tʼáá ałtsoní bee Bóhólníihii kóní, Shoo, ałʼąą dineʼé bitah hoolzhishgo doo yáʼáshǫʼ áhooníił doo, áádóó nahasdzáán nidahoneesʼą́ą́dę́ę́ʼ níyoltsoh néididoołááł.
33 Áádóó éí bijı̨́įdi ałtsʼą́ąhjigo nahasdzáán nineelʼą́ąjįʼ Bóhólníihii éí nihokááʼ dineʼé neistseed doo. Doo baa yínííł hasingo atínídahodindleeh da doo, áádóó doo ahąh ádoolníił da, índa doo yóóʼádadoolníił da. Chąąʼ nahalingo niʼgóó nizdeeztaan doo.
34 Dibé baa ádahołyáanii, dadołwoshgo daohcha índa nidaʼnołkaadii, łeeshchʼiih béédaohmas, háálá nidanihidiʼdootsiłígíí áádóó tanihidínóolkałígíí bíighah azlı̨́ı̨́ʼ índa łeetsʼaaʼ ílíinii naaltsʼidii nidahonohłin.
35 Áádóó dibé baa ádahojilyáanii tʼáadoo yisdádazhnóchéełjįʼ da índa nidaʼniłkaadii tʼáá haʼátʼéhígoda yisdáhizhdoolwoł yę́ę doo há ashjaʼdoolíił da.
36 Bóhólníihii éí hootsogi dibé nidaʼalchoshígi hatsʼą́ą́ʼ yiyííłchǫʼígíí biniinaa dibé yaa ádahalyáanii biinééʼ diitsʼaʼ índa nidaʼniłkaadii atínídadindleehgo dadilwosh.
37 Bóhólníihii tʼóó báhádzidígi átʼéego báhóóchįįdígíí biniinaa hasyéelgo dibé nídanjahígóó dahodiiyeel.
38 Bóhólníihii tʼóó báhádzidígi átʼéego báhóóchįįdígíí biniinaa, áádóó tʼóó báhádzidgo hade áhósinii biniinaa náshdóítsoh bitsiijįʼ ditłʼooígíí nínádítʼı̨́hídóó dah diiyáhígi átʼéego Bóhólníihii nínádítʼı̨́ı̨́hdóó dahodiileʼ, áádóó hakéyah hóóchxǫʼgo doo yiilaʼí da.
Footnotes
^ Hííbrew kʼ ehjí kóní. Lev. 19:27; Jer. 9:25,26.
^ Bábilan dineʼé aláahgo binanitʼaʼí ááhyiłní.
