Jeremiah 26:1-24
26 Josáíyah biyeʼ Jiihóíyakim éí Júdah dineʼé aláahgo binanitʼaʼí nilı̨́įgo tʼóó hodeesá yę́ędą́ą́ʼ Bóhólníihii kóníigo haadzííʼ,
2 Bóhólníihii kóní, Bóhólníihii bikin biiʼ sohodizingi binaagóó hazʼánígi yiizįįhgo Júdah kéyahgi kin hadaasʼáágóó diné kéédahatʼíinii tʼáá ałtso kweʼé Bóhólníihii bikin biiʼ sohodizin siʼą́ągi nídaakahgo nidahałáhígíí bichʼįʼ handziih. Saad tʼááłáʼí nidi tʼáadoo tʼą́ą́ʼ kwíínísiní; saad bee hadíídzih, nidííniidii tsʼídá tʼáá ałtso bee hadíídzih.
3 Dadiʼdootsʼı̨́įłgoda diné tʼááłáʼí nítínígo doo yáʼátʼéehii yaa nidaakaii yitsʼáhidookahgo daʼátʼé, áko doo yáʼáshónígi ádajíítʼįįdii biniinaa doo yáʼáshónígi áhodeeshłííł, niizı̨́įʼii łahgo átʼéego baa tsíńdeeskos.
4 Áko ábididííniił, Bóhólníihii kóní, Doo dashíínółtsʼą́ą́ʼgóó shibee hazʼáanii bee nihił hweeshneʼígíí doo bikʼehgóó deínóhkááhgóogo,
5 áko tʼah abínídą́ą́ʼ náádiishʼnahgo Diyin God yá dahalneʼii shá nidaalʼaʼí danilíinii bá deínółtsʼą́ąʼ dooleeł biniyé nihichʼįʼ ahéłʼaʼ, nidi tʼáadoo bá dasidootsʼą́ąʼ da,
6 ákohgo Sháílohdi kin haalʼá atéshłaa yę́ęgi átʼéego díí kin biiʼ sohodizin atídeeshłííł, áádóó nihokááʼgóó ałʼąą dineʼé danilíinii tʼáá ałtso díí kin haalʼáá nítʼéʼígíí tʼóó báhádzidgo yá yádaałtiʼ dooleeł.
7 Áko nááʼiiłniihii danilíinii áádóó áhodoonííł yaa dahalneʼii índa diné tʼáá ałtso Bóhólníihii bikin biiʼ sohodizingi Jeremáíyah díí saad yee yáłtiʼgo deidiiztsʼą́ą́ʼ.
8 Áádóó Jeremáíyah éí, Diné tʼáá ałtso bichʼįʼ díí bee hadíídzih, Bóhólníihii áhodííniidii ałtso bee hadzoodzíiʼgo náádaʼiiłniihii índa áhodoonííł yaa dahalneʼii áádóó diné tʼáá ałtso, Tʼáá aaníí dadíítsaał, dahałníigo dahasił.
9 Haash yitʼéego Bóhólníihii bízhiʼ binahjįʼ háínídzííʼ, Díí kin Sháílohdi kin yę́ę nahalin dooleeł, índa díí kin haalʼáhígíí ałtso ahiih nídahidoolkał áádóó diné doo łaʼ ákwii kééhatʼı̨́į da doo, índa kintsʼiil tʼéiyá naazhjaaʼ dooleeł, dííníniid? Áádóó diné tʼáá ałtso Jeremáíyah yikʼijįʼ danilı̨́įgo Bóhólníihii bikin biiʼ sohodizingi áłah silı̨́ı̨́ʼ.
10 Áádóó Júdah dineʼé bindanitʼaʼí danilíinii díí deidiiztsʼą́ąʼgo aláahgo naatʼáanii bighandóó dah diikaigo Bóhólníihii bikin biiʼ sohodizin siʼą́ądi yíkai, áádóó Bóhólníihii bikin biiʼ sohodizin bidáńʼdítı̨́ı̨́h ániidíii bíighahgi dineezbin.
11 Ákohgo náádaʼiiłniihii índa áhodoonííł yaa dahalneʼii éí naatʼáanii danilíinii áádóó diné tʼáá ałtso ádeidííniid, Díí hastiin díí kin haalʼáhígíí yikʼijįʼ nilı̨́įgo haadzíiʼgo tʼáá nihí dasidootsʼą́ą́ʼ, áko éí biniinaa dadootsaałígíí yą́ą́h nilı̨́.
12 Áádóó Jeremáíyah éí naatʼáanii danilíinii tʼáá ałtso, índa diné tʼáá ałtso yichʼįʼ haadzíiʼgo kóní, Díí saad dasidootsʼą́ʼígíí tʼáá ałtso díí kin siʼánígíí áádóó díí kin haalʼáhígíí bee bikʼijįʼ hadíídzih, shiłníigo Bóhólníihii shiníłʼaʼ.
13 Éí bąą kʼad hashtʼeʼninánóhkáahgo kʼéhézdon atiin góneʼ dah nídahidoohkááh, áádóó nihiDiyin God Bóhólníihii áníinii bikʼeh dahonołʼı̨́, áko Bóhólníihii doo yáʼátʼéhígi ánihiʼdidoolnííł dííniidii łahgo átʼéego yaa tsíńdookos.
14 Nidi shí sízíinii tʼéiyá shee ádídahwíínółnííh. Díí bá yáʼátʼééh índa díí tʼáá ákóneʼ bá ádoolnííł dashíínóhʼnínígi ádashohłééh.
15 Dashisoołhı̨́įgo nihí áádóó díí kin haalʼáhígíí índa ákwii kéédahatʼínígíí doo ádihodiiltʼiʼii bidił biniinaa ádanihidiʼdooldįįłgo tsʼídá nihił béédahodoozįįł, háálá tʼáá aaníí díí saad tʼáá ałtso bee nihichʼįʼ hadeesdzih biniyé Bóhólníihii nihichʼįʼ shííłʼaad.
16 Ákohgo naatʼáanii danilíinii índa diné tʼáá ałtso éí náádaʼiiłniihii índa áhodoonííł yaa dahalneʼii ádeidííniid, Díí hastiin dadootsaałígíí doo yą́ą́h nilı̨́į da, háálá nihiDiyin God Bóhólníihii bízhiʼígíí binahjįʼ nihichʼįʼ haadzííʼ.
17 Áádóó éí kéyahdóó hastóí aląąjįʼ naazíinii nídahidiiʼnaʼgo diné ákwii áłah silı̨́įʼii tʼáá átʼé kódaaníigo yichʼįʼ hadahaasdzííʼ,
18 Móreshethdóó diné nilíinii Máíkah éí Heziikáíyah Júdah dineʼé aláahgo yinantʼáago bíyoołkááł yę́ędą́ą́ʼ Júdah dineʼé tʼáá ałtso yichʼįʼ haadzíiʼgo ání, Tʼáá ałtsoní bee Bóhólníihii kóní, Dáʼákʼehgóó nihwiildlaadígíí nahalingo Záíyan hoolyéegi nihodiyooldlał, áádóó Jerúsalem kin haalʼáhígíí éiyá tʼóó yáádaaʼáa dooleeł, áádóó Diyin God bikin biiʼ sohodizin bił hazʼánígi dził éí tsin bee hodíłchʼilgi ninádahałaah doo biniyé wódah nahazʼą́ągo ályaaígíí nahalin dooleeł.
19 Daʼ ákoósh Heziikáíyah áádóó Júdah dineʼé tʼáá ałtso Máíkah dayiisxı̨́? Heziikáíyah éí tsʼídá Bóhólníihii yidósin áádóó há náʼooskango Bóhólníihii doo yáʼátʼéhígi áhodeeshłííł dííniidii łahgo átʼéego yąąh tsíńdeezkééz. Nidi nihí éí kʼadę́ę doo yáʼátʼéehii ádił yaa nidaniiltʼeʼ.
20 Łah ałdóʼ diné léiʼ Kírjath-jíyarim kin haalʼáádóó Shiiméíyah biyeʼ Yuráíjah éí Jeremáíyah saad yee hahaasdzíʼígi átʼéego Bóhólníihii bízhiʼ yinahjįʼ díí kin haalʼáhígíí índa díí kéyahígíí yikʼijįʼ hahaasdzííʼ,
21 ákohgo aláahgo naatʼáanii Jiihóíyakim áádóó diné ayóó ádaatʼéii índa naatʼáanii danilíinii hazaad deidiiztsʼą́ąʼgo aláahgo naatʼáanii hodiyeeshxééł niizı̨́ı̨́ʼ, nidi Yuráíjah díí yidiiztsʼą́ąʼgo násdzííd, áádóó dah diníichą́ąʼgo Ííjip kéyah góyaa ííyá.
22 Ákohgo aláahgo naatʼáanii Jiihóíyakim diné łaʼ Ííjip kéyah góyaa dayííłʼaad: éí Ákbor biyeʼ Elnéíthan índa náánáłaʼ ałdóʼ bidiiʼnilgo
23 áádóó Yuráíjah deisiłgo Ííjip kéyahdę́ę́ʼ nídeizlóozgo aláahgo naatʼáanii Jiihóíyakim yichʼįʼ nideizlóóz éí diltłish yee hwiisxı̨́įgo diné tʼáá azlı̨́ʼígi ádaatʼéii yóóʼádaalyaagi łeeh hoyííłhan.
24 Nidi Shéífan biyeʼ Aháíkam éí Jeremáíyah doo diyoolyéłígíí biniyé yee ádíhólníihgo diné tʼáadoo baa hodeetʼą́ą da.
