Jeremiah 27:1-22
27 Josáíyah biyeʼ Jiihóíyakim éí Júdah dineʼé aláahgo yinantʼáago tʼóó hodeeshzhiizh yę́ędą́ą́ʼ Bóhólníihii kótʼéego Jeremáíyah yichʼįʼ haadzííʼ,
2 Bóhólníihii kóshíłní, Azéédéetání índa bee béédaʼatłʼóhígíí ádanileʼgo azéédéeʼnííł,
3 áádóó ádaa didííʼniłgo Júdah dineʼé aláahgo binanitʼaʼí Zedekáíyah éí haneʼ nideiʼáii Jerúsalem kin haalʼáadi baa yíkaígíí bitaadíínih, áádóó éí dah deididoojihgo Íídam dineʼé aláahgo binanitʼaʼí áádóó Móʼab dineʼé aláahgo binanitʼaʼí áádóó Áman dineʼé aláahgo binanitʼaʼí áádóó Táir dineʼé aláahgo binanitʼaʼí índa Sáídan dineʼé aláahgo binanitʼaʼí yitaadeidoonih,
4 áádóó kódíníigo díí bee haasdzíʼígíí yídahółníihii yee yił dahodoolnih, Ízrel dineʼé biDiyin God, tʼáá ałtsoní bee Bóhólníihii kóní, Díí bídahwíínółníihii kódabididohniił,
5 Shibee adziil ayóó átʼéii bee áádóó kʼídíshniiʼgo nahasdzáán áádóó bílaʼ ashdlaʼii índa naaldlooshii nihokááʼgóó naaldeehii áshłaa, áko tʼáá shí nisinígíí baa hidishʼaah.
6 Áko kʼad díí kédaayah éí Bábilan dineʼé aláahgo binanitʼaʼí Nébukadnézzar shá naalʼaʼí nilíinii baa diníʼą́, áádóó naaldlooshii nihokááʼ naaldeehii ałdóʼ bá nidaalnish dooleeł biniyé baa diníʼą́.
7 Áádóó bikéyah biyaa haatʼą́ąjįʼ ałʼąą dineʼé tʼáá ałtso bá nidaalʼaʼ doo, áádóó hayeʼ índa hanálí ałdóʼ yá nidaalʼaʼ doo, áádóó índa ałʼąą dineʼé tʼóó ahayóí áádóó aláahgo naatʼáanii ayóó ádaatʼéii binaalteʼ ádahodoolííł.*
8 Áko baa hoolzhiizhgo díí áhodoonííł: łaʼ dineʼé, doodaiiʼ bee óhólníihgo bił hazʼą́ą́dóó éí Bábilan dineʼé aláahgo binanitʼaʼí nilíinii Nébukadnézzar tʼáá éí doo bá nidajilʼaʼii áádóó Bábilan dineʼé aláahgo binanitʼaʼí bee azéédéetání doo ázéédazhdéetįįhgóó bee bidziilii bee áhosíłdįįdjįʼ éí dineʼé diltłish bee áádóó dichin bee índa naałniih bee atíhodeeshłííł, ní Bóhólníihii.
9 Nidi nihí éí nihá áhodoonííł yaa dahalneʼii áádóó nidaʼídíłkidii áádóó tʼáá nihí nideisooyeelii áádóó iiníziin nihá yee dahaniihii índa nihá daʼdiłgąshii éí Bábilan dineʼé aláahgo binanitʼaʼí doo bá nidaałʼaʼ da doo, danihiłníigo tʼáadoo deísółtsʼą́ʼí,
10 háálá nihikéyahdóó doo shónízáágóó anihiʼdidooʼniłígíí biniyé woochʼííd yee nihił dahalneʼ, áko chʼínihidínéeshkałgo ádoohdįįł.
11 Nidi ałʼąą dineʼé danilíinii Bábilan dineʼé aláahgo binanitʼaʼí bee azéédéetání ázéédazhdéetą́ągo bá nidajilʼaʼii éí tʼáá dahakéyah biiʼ kéédahojitʼı̨́į dooleełgo haa dideeshʼááł, áko tʼáá ákǫ́ǫ́ kéédahojitʼı̨́įgo ninádahojiiłdlaʼgo kʼéédazhdidléeh dooleeł, ní Bóhólníihii.
12 Díí saad tʼáá ałtso Júdah dineʼé aláahgo binanitʼaʼí Zedekáíyah bee bichʼįʼ haasdzíiʼgo kódíshní, Bábilan dineʼé aláahgo binanitʼaʼí bee azéédéetání ázéédadóohtįįhgo bí áádóó bidineʼé bá nidaałʼaʼ, áko dahinohnáa doo.
13 Bóhólníihii kóníigo haadzííʼ, Tʼáá háiida dineʼé éí Bábilan dineʼé aláahgo binanitʼaʼí doo yá nidaalʼaʼii éí diltłish bee, dichin bee, naałniih bee dadínóonééł. Haʼátʼíísh biniyé ni áádóó nidineʼé ákótʼéego dadínóohnééł?
14 Éí bąą áhodoonííł yaa dahalneʼii, Bábilan dineʼé aláahgo binanitʼaʼí doo bá nidadoołnish da, danihiłníigo éí bizaad tʼáadoo bá deísółtsʼą́ʼí, háálá dabiyoochʼíidgo nihił dahalneʼ.
15 Háálá éí doo dááłʼaad da, nidi shízhiʼ dayózhíigo tʼáá áhoodzaagóó nihił dahalneʼ, áko nihí áádóó áhodoonííł yaa dahalneʼii tʼáá bił chʼínihidínéeshkał áádóó ádadoohdįįł.
16 Náádaʼiiłniihii índa díí diné tʼáá ałtso ałdóʼ bichʼįʼ haasdzíiʼgo kódíshní, Bóhólníihii kóní, Áhodoonííł yaa dahalneʼii nihił dahalneʼgo, Bóhólníihii bikin biiʼ sohodizindóó łeetsʼaaʼ tʼóó hodíínaʼgo Bábilan kéyahdę́ę́ʼ nídoojih, jóʼakon, danihiłníigo tʼáadoo bá deísółtsʼą́ʼí, háálá dabiyoochʼíidgo nihił dahalneʼ.
17 Tʼáadoo bá deísółtsʼą́ʼí; Bábilan dineʼé aláahgo binanitʼaʼí bá nidaołʼaʼ, áko dahinohnáa doo. Haʼátʼíísh biniyé díí kin haalʼáhígíí kintsʼiil tʼéiyá naazhjaaʼgo álnéeh doo?
18 Nidi tʼáá aaníí, Diyin God yá halneʼii dajílı̨́įgo áádóó Bóhólníihii bizaad hoł dahólǫ́ǫ́ ládą́ą́ʼ Bóhólníihii bikin biiʼ sohodizin góneʼ łeetsʼaaʼ sinilígíí áádóó Júdah dineʼé aláahgo binanitʼaʼí bikin góneʼ łeetsʼaaʼ sinilígíí índa Jerúsalem kin haalʼáagi łeetsʼaaʼ sinilígíí doo Bábilangóó doojih da, dajiníigo tʼáá ałtsoní bee Bóhólníihii nídeizhdookąął.
19 Háálá áyah niiʼáii, áádóó biiʼ táʼádígisí nitsaaígíí, áádóó biiʼ táʼádadigisí bá naaznilígíí, índa kin haalʼáagi łeetsʼaaʼ tʼáá ákǫ́ǫ́ nidahaasʼnilii tʼáá ałtsoní bee Bóhólníihii éí kótʼéego yaa haadzííʼ.
20 Éí Bábilan dineʼé aláahgo binanitʼaʼí Nébukadnézzar éí Júdah dineʼé aláahgo binanitʼaʼí Jiihóíyakim biyeʼ Jekonáíyah* yisnáago áádóó Júdah kéyahdóó bídahólníihii índa Jerúsalemgi bídahólníihii tʼáá ałtso Jerúsalemdóó Bábilangóó iinííłkaad yę́ędą́ą́ʼ łeetsʼaaʼ daadzíʼígíí tʼáadoo dahidiijaaʼ da.
21 Tʼáá aaníí, Ízrel dineʼé biDiyin God tʼáá ałtsoní bee Bóhólníihii éí Bóhólníihii bikin biiʼ sohodizin góneʼ áádóó Júdah dineʼé aláahgo binanitʼaʼí bighan góneʼ índa Jerúsalem kin haalʼáagi łeetsʼaaʼ tʼáá ákǫ́ǫ́ nidahaasʼnilii kótʼéego yaa haadzíiʼgo kóní,
22 Éí łeetsʼaaʼ Bábilangóó doojih baa nanítą́ąʼjįʼ áadi sinil doo, áádóó índa áádę́ę́ʼ chʼéédeeshjihgo kweʼé ninádeeshʼnił.
Footnotes
^ Pérzha dineʼé bisiláo dah yinéełii bikʼeh deesdlı̨́ı̨́ʼ. 2Chr. 36:22.
^ Jekonáíyah éí Jehóíyakin ałdóʼ wolyé.
