Jeremiah 29:1-32
29 Nébukadnézzar éí hastóí aląąjįʼ naazíinii daadziihígíí áádóó náádaʼiiłniihii áádóó áhodoonííł yaa dahalneʼii índa diné tʼáá ałtso yisnáago Jerúsalem kin haalʼáádóó Bábilan kéyahgóó iinííłkaadii éí Diyin God yá halneʼii Jeremáíyah díí saad naaltsoos yikááʼ áyiilaago Jerúsalemdóó ákǫ́ǫ́ yichʼįʼ áyiilaa.
2 (Aláahgo naatʼáanii Jekonáíyah áádóó bimá asdzą́ą́ naatʼááh índa yúnak* danilíinii áádóó Júdah dineʼé áádóó Jerúsalemdi kéédahatʼíinii bindanitʼaʼí áádóó kin ádeiłʼíinii índa daʼatsidii Jerúsalemdóó dah diikaidóó bikʼijįʼ índa díí áhóótʼįįd.)
3 Shéífan biyeʼ Élasah áádóó Hilkáíyah biyeʼ Gemaráíyah éí naaltsoos ályaii bílákʼeeltsoozgo Júdah dineʼé aláahgo binanitʼaʼí Zedekáíyah Bábilangóó Bábilan dineʼé aláahgo binanitʼaʼí Nébukadnézzar yichʼįʼ yił ahóółʼaʼ, áko éí naaltsoos kóníigo bikááʼ,
4 Ízrel dineʼé biDiyin God tʼáá ałtsoní bee Bóhólníihii kóní, Yisnááh danohłı̨́įgo Jerúsalemdóó Bábilangóó anihiʼdoojaaʼgo shá bohoolyaii tʼáá ánółtso,
5 kin nidaohnilgo biiʼgóó kéédahohtʼı̨́į doo; kʼidaʼdohłéego nínádanołtʼı̨́hígíí daohsą́ą doo.
6 Niheʼasdzą́ą́ dooleełii nishódahoołtʼeehgo nihiyeʼké áádóó nihitsiʼké dahóleʼ. Nihiyeʼké áádóó nihitsiʼké dabiyeʼké áádóó dabichʼéʼéké dahodooleeł biniyé beʼasdzą́ą́ dadooleełii bá ádahohłeʼ índa bahastiin dadooleełii baa dahohnííł. Ánółchʼı̨́dí dooleełígíí éí dooda, nidi áadi kʼeeʼąą dínóohtʼı̨́ı̨́ł.
7 Yisnááh danohłı̨́įgo tʼáá kin haalʼáajįʼ anihííłʼaadii ákwii bee achʼįʼ hózhóonii hádaohtʼı̨́į doo, áádóó ákwii kin haalʼáagi diné kéédahatʼínígíí bá Bóhólníihii bichʼįʼ sodadoołzin, áko ákwii bee achʼįʼ hózhóonii bee nihichʼįʼ hózhǫ́ǫ doo.
8 Háálá Ízrel dineʼé biDiyin God, tʼáá ałtsoní bee Bóhólníihii ání, Áhodoonííł yaa dahalneʼii índa nihá nidaʼídíłkidii nihitahgóó nidaakaígíí nihidaʼdóleeh lágo índa yaa nideizyeelii yee nihił dahalneʼgo tʼáadoo bá deísółtsʼą́ʼí.
9 Háálá shízhiʼ dayózhíigo tʼáá ádzaii nihił dahalneʼ. Doo dahóółʼaad da, ní Bóhólníihii.
10 Jó, Bóhólníihii kóní, Bábilan kéyahdi tsostsʼidiin nihéédááhaigo índa nihaa deesháałgo yáʼátʼéehii nihaa diníʼáanii nihá biʼdeeshłíiłgo kojįʼ anánihideeshʼish.
11 Háálá nihá baa nitsískeesii éí shił bééhózin; kʼadę́ę bíighah daʼohłeehgo bee nihił chodahooʼı̨́į dooleeł biniyé doo yáʼátʼéehii doo nihá baa nitsískees da, nidi bee achʼįʼ hózhóonii nihá baa nitsískees, ní Bóhólníihii.
12 Áko índa nídashiidoohkąął, áádóó shichʼįʼ sodadidoołzįįłgo nihidideestsʼı̨́ı̨́ł.
13 Nihijéí tʼáá átʼé bee shíká ádaohtʼı̨́įgo hádashídóhʼı̨́ı̨́ʼ índa shikʼídadoohkah.
14 Nihí shikʼídahidoohkah, ní Bóhólníihii áádóó yisnááh danohłı̨́ yę́ędóó nahjįʼ kódeeshłíiłgo danihííʼ yę́ę nihííʼ nídadoodleełgo ádeeshłííł áádóó ałʼąą dineʼé bitahgóó índa bił dah nahazʼą́ą́góó yisnááh danohłı̨́į dooleeł biniyé dah danihidíníiłkaadídóó áajįʼ áłah ánánihideeshdlííł, ní Bóhólníihii.
15 Bóhólníihii éí Bábilan kéyahdi Diyin God yá dahalneʼii nihá niinínil, dadooniidígíí biniinaa,
16 (Jó, aláahgo naatʼáanii David bibikááʼdóó nahatʼáii yikááʼ dah sidáii áádóó diné tʼáá ałtso díí kin haalʼáagi kéédahatʼíinii índa nihikʼisóó danilíinii nihidisnáágóó tʼáadoo nihił nidaaskaii Bóhólníihii baa haadzííʼ.)
17 Tʼáá ałtsoní bee Bóhólníihii kóní, Éí diltłish bił haaʼdoonéełgo áádóó dichin índa naałniih haa doołnihgo ádeeshłííł, índa fig sikaadii bineestʼąʼ tʼóó badaaʼihii daniłchxonii áádóó doo jóyą́ʼígi ádaatʼéii nidahojílin doo, jóʼakon.
18 Diltłish bee, dichin bee, naałniih bee atíháshʼı̨́į doo, áádóó hóyéeʼgo bá hadaʼiisdzíiʼii dajílı̨́į doo, áádóó diné hakʼee tʼóó bił adahayói doo, áádóó honiinaa diné, Tłehee yéiʼ, daaníi doo índa há nidahałtʼiʼgo hą́ą́h nídadikah doo biniyé nihokááʼgóó bee ídahólnííh nahazʼą́ą́góó tʼáá átʼé bitahjįʼ adahonííłkaadígóó diné hakʼee áńdaadįįhgo ádeeshłííł,
19 háálá shizaad tʼáadoo dazdiiztsʼą́ąʼ da, ní Bóhólníihii; shá nidaalʼaʼí Diyin God yá dahalneʼii hachʼįʼ tʼáá ahą́ą́h ałnáádaashʼaah nítʼééʼ, nidi tʼáadoo deísóołtsʼą́ąʼ da, ní Bóhólníihii.
20 Jerúsalem kin haalʼáádóó Bábilan kéyahgóó yisnááh danohłı̨́į dooleełgo anihinííłkaadii tʼáá ánółtso Bóhólníihii áníinii dadohtsʼı̨́ı̨́h,
21 Koláíyah biyeʼ Éíhab áádóó Méíyasíyah biyeʼ Zedekáíyah díí diné nidiltʼéego shízhiʼ yózhíigo áádóó biyoochʼíidgo nihił halneʼii éí Ízrel dineʼé biDiyin God tʼáá ałtsoní bee Bóhólníihii haa haadzíiʼgo kóní, Jó, Bábilan dineʼé aláahgo binanitʼaʼí Nébukadnézzar baa hodideeshʼáałgo nihinááł nahodoołtsił.
22 Hó honiinaa Júdah dineʼé tʼáá ałtso dabidisnáanii hóyéeʼgo hanáádaasdzíiʼgo, Bábilan dineʼé aláahgo binanitʼaʼí Nébukadnézzar éí Zedekáíyah áádóó Éíhab tsídzayíínilgo yistʼé yę́ęgi átʼéego Bóhólníihii ákónóleʼ, daaníi doo.
23 Háálá Ízrel dineʼé bitahgóó doo ákwii éʼétʼéii ałtah áátʼeełii baa nidadziskai áádóó bił kéédahojitʼíinii bidaʼasdzą́ą́ bił ahidazhdoolyá índa saad tʼáadoo bee hachʼįʼ hahásdzíiʼii shízhiʼ binahjįʼ dahayoochʼíidgo nidahodzisneʼ, áko shíyeeʼ shił ééhózin áádóó shí ooʼíinii nishłı̨́, ní Bóhólníihii.
24 Niihélam hoolyéédóó Shiiméíyah ałdóʼ kóbididííniił,
25 Ízrel dineʼé biDiyin God tʼáá ałtsoní bee Bóhólníihii kóní, Jerúsalemgi diné kéédahatʼíinii tʼáá ałtso áádóó Méíyasíyah biyeʼ nááʼiiłniihii nilíinii Zefanáíyah índa náádaʼiiłniihii tʼáá ałtso kódíníigo nízhiʼ naaltsoos dabikáaʼgo bichʼįʼ ádeinilaa biniinaa,
26 Bóhólníihii bikin biiʼ sohodizin góneʼ aa ádahalyáanii akʼi dadéezʼı̨́įʼii hólǫ́ǫ dooleeł biniyé nááʼiiłniihii nílı̨́į dooleeł biniyé Jiihóíyada nááʼiiłniihii nilı̨́ı̨́ nítʼééʼ yę́ęjįʼ Bóhólníihii anííłtʼeʼ, áko diné tʼááłáʼí nítínígo doo ákǫ́ǫ́ tsídahidikeesgóó áádóó Diyin God yá halneʼii ádadilneʼgo tsin bąąh naaznilgo áádóó bizéédadéetą́ągo ádanileʼ.
27 Éí bąą haʼátʼéegoshąʼ Ánathathdóó chʼíbikéeʼii Jeremáíyah doo bichʼahoshíníkée da; éí nichʼįʼ Diyin God yá halneʼii nilı̨́įgo ínídiilʼįįh?
28 Háálá éí Bábilanjįʼ nihichʼįʼ íʼiilaago kóní, Nízaadgóó yisnááh danohłı̨́į doo. Kin nidaohnilgo biiʼgóó kéédahohtʼı̨́į doo, índa kʼidaʼdohłéego nínádanołtʼı̨́hígíí daohsą́ą doo.
29 Nááʼiiłniihii nilíinii Zefanáíyah éí Diyin God yá halneʼii Jeremáíyah yichʼįʼ díí naaltsoos yiyííłtaʼ.
30 Ákohgo Bóhólníihii éí Jeremáíyah yichʼįʼ haadzíiʼgo kóní,
31 Yisnááh danilíinii tʼáá ałtso bichʼįʼ íʼííléehgo kóbidiní, Bóhólníihii kóní, Niihélam hoolyéédóó naagháii Shiiméíyah tʼáadoo yíłʼaadgóó nihił hoolneʼígíí biniinaa woochʼííd baa daʼjíísóolííʼ;
32 éí bąą Bóhólníihii kóní, Jó, Niihélamdóó Shiiméíyah áádóó bitsʼą́ą́dóó náás oochíiłii atíhodeeshłíiłgo áhodeeshdįįł. Hatsʼą́ą́dóó naagháii díí dineʼé bitahgóó doo łaʼ kééhatʼı̨́į da doo áádóó shidineʼé yáʼátʼéehgo bíká adeeshwołígíí éí doo yizdoołtséeł da, háálá Bóhólníihii bikʼijįʼ ídlı̨́įgo naʼalteeh bee nazneeztą́ą́ʼ, ní Bóhólníihii.
Footnotes
^ Saad Łaʼ Ááhdeiłníinii bee bééhózinígi yíníłtaʼ.
