Jeremiah 3:1-25
3 Diné łaʼ beʼasdzą́ą́ yóóʼayííłtʼeʼgo áádóó asdzání bitsʼáníyáádóó náánáłaʼ diné yeʼasdzą́ą́ náánásdlı̨́įʼgo ákoósh yaa nídoodááł?* Ákódahóótʼįįdgo éí kéyah tʼáá náhwiistʼą́ą́ nítʼééʼ dooládóʼ hóóchxǫʼ da doo. Bił ałchʼįʼ dah danilwoʼii tʼóó ahayóí bił ahił daʼdíínílyá, áko shichʼįʼ dah nánídááh, ní Bóhólníihii.
2 Honoojítahgi wódahgo nahazʼánígóó nanighalgo haaʼí shı̨́ı̨́ tʼáadoo ił nínítéézh yę́ęgóó díníʼı̨́ı̨́ʼ. Aréíbiyadę́ę́ʼ dineʼé łaʼ honoojíidi sidáhígi átʼéego atiin bąąhgóó edaʼalyaii bibaʼ sínídáa łeh nítʼééʼ; íłjiłgo tsiʼnanináhígíí índa doo yáʼáshónígi ááníłígíí éí bee kéyah tʼáá náhwiistʼą́ą́ nítʼééʼ tʼóó baaʼihgo áhwiinilaa.
3 Díí lá biniinaa níłtsą́ nihitsʼą́ą́ʼ dahaastłʼǫ́ ni índa dąągo nááháłtı̨́ı̨́h yę́ę nihitsʼą́ą́ʼ tʼą́ą́ʼ kóolzin ni; ałjiłnii yíníltááʼ, áko doo nidi tʼáá kʼad ádaa yáninidzı̨́įʼ da.
4 Tʼáá aaníí, kʼad kódíníigo shichʼįʼ sodílzin, ShiTaaʼ, tʼah ániid naasháhídą́ą́ʼ shił yíʼash.
5 Hoolʼáágóósh tʼáá báháchįʼ doo? Nihoníyáajįʼísh tʼáá ákótʼée doo? Jó, bee háínídzííʼ tʼáá baa nideeshaał nínízin shı̨́ı̨́ tʼáá ni nínízinjįʼ doo yáʼáshóonii baa nisíníyá.
Ízrel dineʼé áádóó Júdah dineʼé łahgo átʼéego tsíńdadookosgo náyookąąh
6 Josáíyah aláahgo naatʼáanii nilı̨́įgo bíyoołkááł yę́ędą́ą́ʼ Bóhólníihii áshidííniid, Ízrel dineʼé tʼą́ą́ʼ anáhátłíishii áátʼįįdígíísh yiniłtsą́? Dził aghánídahazʼáágóó tʼáá átʼé yąąh híiyáago tsin dootłʼizh naazkaadii tʼáá átʼé dabiyaagóó ałjiłnii silı̨́ı̨́ʼ.
7 Áko díí tʼáá ałtso yaa naayáago, Shaa nídoodááł, dííniid. Nidi tʼáadoo nádzáa da áádóó hádí Júdah dineʼé doo bazhʼdíʼnóodlíí átʼéii hoołtsą́.
8 Áko Ízrel dineʼé tʼą́ą́ʼ anáhátłíishii yiniyé adiléii silı̨́ʼígíí tʼáá ałtso biniinaa nahjįʼ kóhooshłaago naaltsoos bikʼehgo ałtsʼáʼdootʼashígíí hadilyaago haa níłtsooz, nidi hádí Júdah dineʼé doo bazhʼdíʼnóodlíí átʼéii tʼáadoo yítiid da, nidi éí ałdóʼ ałjiłnii nilı̨́įgo tádííyáhígíí yiiłtsą́.
9 Ałjiłnii nilínígíí doo sihgo yaa nitsíkeesígíí biniinaa tsin índa tsé yił daʼahidilyéhígíí bee kéyah tʼáá náhwiistʼą́ą́ nítʼééʼ hóółchǫʼ.
10 Azhą́ díí tʼáá ałtso kódahóótʼįįd lá nidi, hádí Júdah dineʼé doo bazhʼdíʼnóodlíí átʼéii tʼóó áhoʼdilʼı̨́įgo doo bijéí tʼáá átʼé yee shichʼįʼ naanásdzáa da, ní Bóhólníihii.
11 Bóhólníihii áshíłní, Ízrel dineʼé tʼą́ą́ʼ anáhátłíishii éí Júdah dineʼé doo bazhʼdíʼnóodlíí átʼéii yiláahgo tʼáá ákogi átʼéego íʼdiilyaa.
12 Náhookǫsjigo díí saad baa hólneʼ: Bóhólníihii áníłní, Ízrel dineʼé tʼą́ą́ʼ anáhítłíishii, nánídááh; doo sháháchįʼgo niníshʼı̨́į da, háálá naa aʼááh nisin; hoolʼáágóó doo sháháchįʼ da doo, ní Bóhólníihii.
13 Díí tʼéiyá Bóhólníihii niDiyin God bichʼįʼ doo ákwii íínítʼįįdii índa tsin dootłʼizh naazkaadii tʼáá átʼé dabiyaagóó déʼéyóní danilíinii bee ánítʼéii baa dííníʼáanii áádóó ádíshnínígíí tʼáadoo bikʼehgo íinidzaaígíí tʼáá ałtso bee ádéédiʼnítįįhgo baa hólneʼ, ní Bóhólníihii.
14 Tʼą́ą́ʼ anáhátłíishii dineʼé, nihahastiin nishłínígíí bąą naanákáahgo łah dinołtʼéego kin haalʼáádóó bitsʼánihideeshtééł, áádóó nidinołtʼéego éí łahgo hooghandóó bitsʼánihideeshniłgo Záíyandi* nihideeshʼish, ní Bóhólníihii.
15 Áko aa ádahalyáanii nihaa dadideeshʼáałgo ił ééhózin índa akʼidiʼyiitįįh yíndanihiniłtin doo.
16 Éí yoołkáałdi kéyah tʼáá náhwiistʼą́ą́ nítʼééʼ biiʼ kʼeeʼąą dínóohtʼą́ągo tʼóó ahayóí soolı̨́įʼgo, Bóhólníihii bitsitsʼaaʼ bee ahaʼdeetʼáanii,* doo daaníi da doo. Éí doo bąą tsínáhodookos da, doo bééhodoonih da, doo baa nináhodínóotaał da, doo ánáádoolníił da, ní Bóhólníihii.
17 Éí hoolzhishdi, Jerúsalem kin haalʼáádóó Bóhólníihii nantʼá, daaníi doo, áádóó ałʼąą dineʼé tʼáá ałtso Jerúsalemgi Bóhólníihii bízhiʼ yichʼįʼ áłah náádleeł doo, índa dabijéí biyiʼdę́ę́ʼ doo yáʼátʼééhgóó nitsídaakeesígíí doo yikʼehgo deíkáah da doo.
18 Éí yoołkáałdi Júdah dineʼé éí Ízrel dineʼé yił ahiih doonéełgo yił yildah doo, áádóó náhookǫsdi kéyah siʼą́ą́dę́ę́ʼ chʼídoonéełgo danihizhéʼé yę́ę kéyah bííʼ dooleeł biniyé baa diníʼáanii yiih doonééł.
19 Nidi ádíshní, Haaléitʼéego shaʼáłchíní danilíinii bitahgi áádóó kéyah hózhónígi ałʼąą dineʼé ayóó ánoolningo daabíhígíí nihííʼ dooleeł biniyé haaléitʼéego ákwii ni nihideeshnił lá? dííniid. ShiTaaʼ, dashidohníi doo, áádóó doo shitsʼáhidoohkah da, dííniid.
20 Tʼáá aaníí, eʼasdzą́ą́ nilíinii doo bazhʼdíʼnóodlíʼígi átʼéii bahastiin yóóʼiidííʼánígi átʼéego Ízrel dineʼé nohłíinii tʼáá ákótʼéego doo nihaa diʼnóshdlíʼígi átʼéégóó yóóʼadashidooʼą́, ní Bóhólníihii.
21 Honoojítahgi wódahgo nahazʼánígóó Ízrel dineʼé atíndadindleehgo índa nídaʼookąąhgo iinééʼ diistsʼą́ą́ʼ, háálá Ízrel dineʼé doo ákǫ́ǫ́ dahideeznaad índa biDiyin God Bóhólníihii yaa dayooznah.
22 Tʼą́ą́ʼ anáhátłíishii dineʼé, nánóhkááh; nánoohkaigo tʼą́ą́ʼ nináhóhtłíshígíí hashtʼéédanihideeshdlííł. Bóhólníihii nílı̨́įgo nihiDiyin God nílínígíí bąą akǫ́ǫ́ naa nániikááh, jóʼakon.
23 Tʼáá aaníí, dah daaskʼidgóó índa daadziłgóó hahóóʼáago nidahwiidláii tʼáadoo nídandlíní da, nidi, tʼáá aaníí, Ízrel dineʼé yisdádookahii Bóhólníihii nihiDiyin God bee hólǫ́.
24 Tʼáá ániid nideiikaidą́ą́ʼ danihizhéʼé yę́ę yiniyé nidaashnishgo nishódayoostʼeʼgo dibé índa béégashii baa ádahayą́ą́ nítʼééʼ yę́ę áádóó biyeʼké índa bitsiʼké danilı̨́ı̨́ nítʼéʼígíí éí yáhásinii ałtso baa nahodeeskai.
25 Tʼóó nihaa yádahóósįįdgo doo daʼniidlı̨́ı̨́góó ídaʼdiilyaaígíí nihichʼą́ąhgi hazlı̨́ı̨́ʼ. Danihizhéʼé yę́ę áádóó nihí tʼáá ániid nideikaidą́ą́ʼ díí jı̨́įjįʼ Bóhólníihii nihiDiyin God bichʼįʼ ádił nidaʼayeelzííʼ; Bóhólníihii nihiDiyin God tsʼídá tʼáadoo bikʼehgóó ádeiidzaa da.
Footnotes
^ Bee hazʼáanii bikʼehgo doo bee hazʼą́ą da, ní.
^ Dził Záíyandi ákwii Jerúsalem kin haalʼá.
^ Diyin God bidineʼé yił hólǫ́ǫgo bee ééhózinii átʼé. Ex. 37:1-9.
