Jeremiah 30:1-24
30 Bóhólníihii éí Jeremáíyah yichʼįʼ haadzíiʼgo kóní,
2 Ízrel dineʼé biDiyin God Bóhólníihii kóní, Saad bee nichʼįʼ hahásdzíiʼii tʼáá ałtso naaltsoos bikááʼ ánílééh.
3 Bóhólníihii ání, Shoo, beiníłką́ągo shidineʼé daasnáanii Ízrel dineʼé áádóó Júdah dineʼé nídeeshʼish, áádóó dabizhéʼé yę́ę kéyah baa diníʼáanii nahwéʼéshniihgo biih nídahizhdooʼnééł, áádóó éí kéyah náádaahó doo, ní Bóhólníihii.
4 Áko Bóhólníihii díí saad yee Ízrel dineʼé áádóó Júdah dineʼé yaa halneʼgo haadzííʼ.
5 Jó, Bóhólníihii kóní, Diné nitsinákahgo áádóó nídaaldzidgo dasidiitsʼą́ą́ʼ, áko doo hodéezyéel da.
6 Kʼad naʼídíłkid, áádóó nił bééhoozı̨́ı̨́ʼ, Dinéésh tʼáá adoołchííł? Ákoshąʼ haʼátʼíí biniyé asdzání éí awééʼ bídiiʼnaʼ nahalingo diné tʼááłáʼí nítínígo binííʼ gónaa yikʼi dadéesniiʼ? Áádóó haʼátʼéegoshąʼ tʼáá ádzíłtso haniiʼ deitsxoii?
7 Kʼad índa lą́ą tʼáá íiyisí bikʼeʼíyéeʼgo hoolzhish doo. Hádą́ąʼda tʼah doo ákótʼéego hodilzhíish da nítʼééʼ. Jéíkab bichʼįʼ nahwiiʼnáago hoolzhish doo, nidi bitsʼą́ą́dóó yisdábidiʼdooltééł.
8 Tʼáá ałtsoní bee Bóhólníihii ání, Éí baa hoolzhiizhdi hazéédadéetání há dahideeshtihgo bee dah dadziistłʼóonii há dahideeshnish, áádóó déʼéyóní doo bá nináádajilʼaʼ da doo,
9 nidi Bóhólníihii haDiyin God áádóó aláahgo honanitʼaʼí David há nábiideesįįłgo bá nidajilʼaʼ doo.
10 Bóhólníihii ání, Éí bąą shá naalʼaʼí nílíinii Jéíkab, tʼáadoo náníldzidí, índa Ízrel dineʼé nohłíinii, tʼáadoo nitsidaohkaí, háálá doo deeghánídę́ę́ʼ yisdánánihideeshʼnił, áádóó nihaʼáłchíní éí kéyah yiiʼ yisnááh danilı̨́ı̨́dę́ę́ʼ yisdádeeshnił, áádóó Jéíkab nídoodáałgo bił hodéezyéelgo hanályı̨́įh doo, índa łaʼda doo bił yééʼ ánáhodoodlíił da, jóʼakon.
11 Bóhólníihii ání, Jó, yisdánídeeshtééł biniyé nił honishłǫ́. Ałʼąą dineʼé bitahgóó adanihinííłkaadii éí ałtso ádeeshdįįł, nidi doo ałtso ánihideeshdįįł da: doo haada yitʼéii bee hashtʼéénihideeshdlííł, áádóó tʼáá ánóhtʼé atínánihiishʼįįh doo.
12 Bóhólníihii kóní, Shíníltłishígi doo náodziihígi átʼée da; tʼáadoo asohodoobézhígóó tídéínínáá lá.
13 Bee nąąh dahazʼánígíí biniyé tʼáadoo ná náʼookąąhí da. Tídinidzaaígíí azeeʼ bá ádin, áko bee nídíídzihii ádin.
14 Diné bił ałchʼįʼ ádantʼíinii tʼáá ałtso naa dayooznah; doo há dandéezʼı̨́įʼ da. Ádił niʼiyílzíhígíí tʼóó ahayóí silı̨́ı̨́ʼ biniinaa áádóó tʼáá íiyisí doo ákwii ánítʼínígíí biniinaa anaʼí doo yitsʼíidii nánineestsasgo tídinidzaago ániilaaígi átʼéego tídéínínáago ániishłaa.
15 Haʼátʼíísh biniyé nínígaígíí biniinaa nicha? Nił honeezgaígíí doo náodziihígi átʼée da. Doo ákwii ánítʼínígíí índa ádił niʼiyínílzíʼígíí tʼóó ahayóí silı̨́ı̨́ʼ biniinaa kóniishłaa.
16 Éí bąą danihoolghalii éí tʼáá ałtso dabidiʼdoolghał. Niʼanaʼí tʼáá ałtso tʼááłáʼí nítínígo yisnááh dadooleeł; nihighadaʼiisdláii éí bigháádahidooʼnił. Dandoolghał biniyé nidaniniłchéii éí dadíílghał biniyé naa dideeshʼááł.
17 Bóhólníihii kóní, Záíyan* łaʼda doo biniizı̨́įʼii átʼı̨́, daaníigo tʼóó chʼéheelghanii yee daníizhiʼígíí biniinaa doo nąąh tééhgóó ánándeeshdlííł áádóó tídadinilyaa yę́ęgóó nánídadeesdzih.
18 Bóhólníihii kóní, Jó, Jéíkab yisnááh nilíinii nahjįʼ kódeeshłíiłgo biníbaal yiiʼ kééhatʼı̨́ı̨́ nítʼééʼ yę́ęgóó bił nídeeshtʼashgo baa aʼááh dínéesįįł áádóó tʼáá bikintsʼiil yanáaʼáá nítʼééʼ yę́ęgi kin haalʼáago áńdoolnííł índa aláahgo naatʼáanii bikin tʼáá siʼą́ą́ nítʼééʼ yę́ęgi siʼą́ą doo.
19 Éí biiʼdę́ę́ʼ ahééh hasinjí sin áádóó bił dahózhǫ́ǫgo dahataałii biinééʼ dadiitsʼaʼ doo. Ízrel dineʼé kʼeeʼąą nootʼı̨́įłgo ádeeshłííł áádóó doo tʼáá díkwíí da doo índa diné bił dajílı̨́įgo áhodeeshłíiłgo doo aʼohgo ádajítʼée da doo.
20 Baʼáłchíní éí ałkʼidą́ą́ʼ badaʼáłchíní yę́ęgi ádaatʼée doo. Ahínéikahígíí éí shinááł bidziilgo ádoolnííł. Bide ádahósinii tʼáá ałtso atídaashʼı̨́į doo.
21 Bitahdóó éí łaʼ naatʼáanii nilı̨́į doo. Bitahdóó éí bá nantʼáago binanitʼaʼí nilı̨́į dooleełii nídidoodááł. Shą́ą́h níhánígóó ninájídáahgo áháshʼı̨́į doo áádóó shaa jiigháah doo. Háishąʼ éí nináʼídidootʼáałgo shaa doogááł? ní Bóhólníihii.
22 Áádóó nihiDiyin God nishłı̨́įgo shidineʼé nohłı̨́į doo.
23 Shoo, níyoltsoh tʼáá íiyisí tʼóó bikʼeʼíyéʼígi átʼéego éí Bóhólníihii tʼóó báhádzidgo báhóóchįįdígíí niheeldoh. Éí náátsʼóʼoołdísiitsoh tʼáá íiyisí tʼóó bikʼeʼíyéʼígi átʼéego diné doo yáʼájíshóonii hakʼi chʼídoogááł.
24 Bóhólníihii bijéí biiʼdi yaa nitsíkeesii ałtso yiʼiilaago áádóó yinaashnishjįʼ, índa tʼáá íiyisí bikʼeʼíyéeʼgo Bóhólníihii báhóóchįįdę́ę baa náhodoodleeł. Akéeʼdi yoołkáałdi índa díí bikʼidadiʼdoohtı̨́ı̨́ł.
Footnotes
^ Jerúsalem kin haalʼáii, doodaiiʼ Júdah kéyah ááhyiłní.
