Jeremiah 32:1-44
32 Nébukadnézzar éí Bábilan dineʼé aláahgo yinantʼáago tseebíítsʼáadah náhááh góneʼ áádóó Zedekáíyah éí Júdah dineʼé aláahgo yinantʼáago neeznáá náhááh góneʼ Jeremáíyah éí Bóhólníihii bichʼįʼ hanáánáádzííʼ.
2 Áko íídą́ą́ʼ Bábilan dineʼé aláahgo yinanitʼaʼí nilíinii bisiláo Jerúsalem kin haalʼá yináshzhiizhgo tʼáá ákǫ́ǫ́ nidahaazná, áádóó Júdah dineʼé aláahgo yinanitʼaʼí nilíinii bighangi awáalyaa bichʼéédą́ą́ʼ góneʼ Jeremáíyah bidáʼdeelkaal.
3 Háálá Júdah dineʼé aláahgo yinanitʼaʼí Zedekáíyah hadádiʼníłkaalgo kóní, Haʼátʼíishąʼ biniyé kódíníigo díí hólneʼ? Bóhólníihii kóní, Shoo, Bábilan dineʼé aláahgo yinanitʼaʼí díí kin haalʼáhígíí baa dideeshʼáałgo yidoołnééł,
4 áko Zedekáíyah éí Kaldíya dineʼé tsʼídá doo bílákʼee hazhdoogáał da, nidi Bábilan dineʼé aláahgo yinanitʼaʼí tsʼídá tʼáá aaníí baa hodiʼdootʼááł, áádóó éí ahizhnílʼı̨́įgo saad ałchʼįʼ ahizhdooʼnił,
5 áádóó Zedekáíyah éí Bábilan kéyahgóó iidoolóós, áádóó haa nanítą́ąʼjįʼ áadi dzizdáa doo. Azhą́ Kaldíya dineʼé bił daʼahohgą́ą nidi, doo bikʼeh dadidoohdleeł da, ní Bóhólníihii.
6 Ákohgo Jeremáíyah ánáádooʼniid, Bóhólníihii shichʼįʼ hanáánáádzíiʼgo kóní,
7 Jó, nidáʼí Shálam éí biyeʼ Hanámiyel, Ánathath kin haalʼáadi shikéyahígíí shaa nahíłniih, háálá ni nahidííłnihgo áłtsé bee ná hazʼą́, níigo naa doogááł.
8 Nítʼééʼ shidáʼí biyeʼ Hanámiyel éí Bóhólníihii bizaad kʼehgo awáalyaa bichʼéédą́ąʼgi shaa níyá, áádóó áshidííniid, Bénjamin bikéyahdi Ánathath hoolyéedi shikéyahígíí shaa nahíłniih, háálá nahidííłnihgo nííʼ dooleełígíí bee ná hazʼą́, áko ádá nahíłniih. Áadi índa díí Bóhólníihii ádííniidii shił bééhoozin.
9 Áko Ánathathdi kéyahígíí shidáʼí biyeʼ Hanámiyel baa naháłniiʼ. Áko béésh łigaii shékel wolyéii tsostsʼidtsʼáadah bíighahgo bá dah dahidiiloʼgo baa nínil.
10 Áádóó kéyah nahaazniiʼgo bee bééhózinii bee dah dzoołtsos dooleełígíí éí shízhiʼ bikááʼ áshłaa, áádóó bídiiłjééʼ índa ooʼíinii hágo dabidííniidgo bee dah nídiidlohí bee béeso há dah dahidiiloʼ.
11 Índa naʼiizniiʼgo bee bééhózinii bee hazʼáanii biʼéʼélʼįʼ bikʼehgo dáʼdeeljéʼígíí áádóó łaʼ doo dáʼdeeljéʼígíí dah diijaaʼgo
12 shidáʼí biyeʼ Hanámiyel áádóó ooʼíinii éí naʼiizniiʼgo bízhiʼ yikááʼ ádayiilaii índa Jew dineʼé tʼáá ałtso éí awáalyaa bichʼéédą́ą́ʼ góneʼ naháaztą́ągo dabinááł Méíyasíyah biyeʼ Niiráíyah biyeʼ Bérak éí kéyah nahaazniiʼgo naaltsoos bee dahiltsos dooleełii baa nínil.
13 Áádóó dabinááł Bérak bichʼįʼ haasdzíiʼgo kódíshní,
14 Ízrel dineʼé biDiyin God tʼáá ałtsoní bee Bóhólníihii kóní, Kéyah nahaazniiʼígíí bee ééhózinii dáʼdeeljéʼígíí áádóó łaʼ doo dáʼdeeljéʼígíí tʼáá áłah nídiinííł, áko nízaadgóó didoonaał biniyé hashtłʼish ásaaʼ biih dííniłgo ákóneʼ sinil doo.
15 Háálá Ízrel dineʼé biDiyin God tʼáá ałtsoní bee Bóhólníihii kóní, Kin áádóó kédaayah índa chʼil naʼatłʼoʼii kʼéédadilyééhgóó éí díí kéyah biiʼ ninádahaniih doo.
16 Kéyah nahaazniiʼgo bee bééhózinii Niiráíyah biyeʼ Bérak baa níłtsoozgo Bóhólníihii bichʼįʼ sodeeszingo kódíshní,
17 Bóhólníihii Diyin God nílíinii! Haʼátʼíí lá ahayóí lá! Ayóó ánóodziilgo índa kʼídíínílniiʼgo yádiłhił índa nahasdzáán íinilaa. Tsʼídá tʼáadoo nániłdzilí da.
18 Éí daashíínéelą́ąʼdi mííl bíighahgo baa aʼááh nínízin, áádóó daʼazhéʼé doo ákwii ádáátʼįįdii bikʼé bikéédę́ę́ʼ badaʼáłchíní hanínáánootʼáanii kʼéédadídlééh. Ayóóʼátʼéii, Diyin God Ayóóʼábóodziilii éí tʼáá ałtsoní bee Bóhólníihii wolyé.
19 Éí tʼáadoo beełtʼéhígóó kótʼéego níinii ayóó átʼé áádóó ayóó átʼéego naalnish. Jó, nihokááʼ dineʼé bee ádajítʼéii yooʼı̨́, áádóó tʼááłáʼí jinítínígo bee ájítʼéii índa baa nijigháii bitsʼą́ą́dóó bineestʼąʼ bikʼehgo hachʼįʼ nidiʼyoolééł.
20 Éí Ííjip kéyahdi áádóó díí jı̨́įjįʼ Ízrel dineʼé bitahgóó índa náánáłaʼ dadineʼé bitahgóó bee éédahózinii áádóó tʼóó bikʼeʼayóigo ádahooníiłii yaa naayá. Áko díí jı̨́ átʼéhígi átʼéego nízhiʼ bee chʼínditʼáahgo íʼdiinilyaa,
21 índa bee éédahózinii bee áádóó tʼóó bikʼeʼayóigo ádahooníiłii bee áádóó ayóó ánóodziilígíí bee áádóó kʼídíínílniiʼígíí bee índa ayóó átʼéego ayahodíníłhizígíí bee nidineʼé Ízrel éí Ííjip kéyahdę́ę́ʼ chʼííníʼeezh,
22 áko díí kéyah éí kéyahgi abeʼ áádóó tsésʼná bitłʼizh bee ádaʼazįįdgo* baa dííníʼą́, éí tʼáá bítséedi dabizhéʼé yę́ę daabííʼ dooleełgo bichʼįʼ ádee hadíínídzííʼ,
23 áádóó kéyah yiih yínáago daabííʼ daazlı̨́ı̨́ʼ, nidi ádíníinii índa nibee hazʼáanii tʼáadoo yikʼeh dahóółʼįįd da. Kótʼéego dahinohná, bidiníigo bee bichʼįʼ hahíínídzíʼígíí éí tʼáadoo yidaʼiilaa da; éí bąą díí doo yáʼáshóonii tʼáá átʼé bikʼi yéinitsih.
24 Shoo, kin haalʼáhígíí deidoołnééł biniyé áajįʼ hídeilkʼidgo ádayiilaa, áko diltłish áádóó hodííchįįdígíí índa naałniih biniinaa Kaldíya dineʼé éí kin haalʼáhígíí anadeiłʼı̨́įgo yikʼeh didoodleełgo baa deetʼą́. Bee hahínídzíiʼii bohoolyaa. Éí yíníʼı̨́, jóʼakon.
25 Áádóó Diyin God Bóhólníihii nílíinii, áshidííníniid, Azhą́ kin haalʼáhígíí Kaldíya dineʼé baa deetʼą́ą nidi, ooʼíinii łaʼ nídiiníiłgo kéyahígíí béeso bikʼé aniníiłgo nahíłniih.
26 Bóhólníihii éí Jeremáíyah yichʼįʼ hanáánáádzíiʼgo kóní,
27 Jó, atsʼíís nináneelʼą́ąjįʼ biDiyin God Bóhólníihii nishłı̨́. Tʼáadoo leʼéésh shá niłdzil?
28 Éí bąą Bóhólníihii kóní, Díí kin haalʼáhígíí éí Kaldíya dineʼé índa Bábilan aláahgo binanitʼaʼí Nébukadnézzar baa dideeshʼáałgo yidoołnééł, jóʼakon.
29 Kaldíya dineʼé díí kin haalʼáhígíí yikʼijįʼ anadeiłʼı̨́įgo áajįʼ dah didoojahgo yidahodidooniłgo deididoołił. Yee shá dahodoołchįįłgo kin bighą́ą́ʼgóó diyin dabidiʼníinii bichʼįʼ yanáadziʼgo nááhániihii yadayiinilii áádóó didlidgo nááhániihii Béíyal yichʼįʼ náádayiiłniihii éí tʼáá bił ałtso deididoołił.
30 Jó, Ízrel dineʼé áádóó Júdah dineʼé tʼáá áłchíní danilı̨́ı̨́dę́ę́ʼ shichʼįʼ doo yáʼáshónígi tʼéí ádáátʼįįd, áko Ízrel dineʼé yaa nidaaskaígíí tʼéiyá yee shánídahałchįįh nítʼééʼ, ní Bóhólníihii.
31 Jó, díí kin haalʼáhígíí tʼóó niiʼnil yę́ędóó díí jı̨́įjįʼ ákwii kéédahatʼínígíí shánídahałchįįhgo tʼóó báhádzidígi átʼéego bee atíʼéshʼíinii hayiyííłtah, áko doo níshʼı̨́į da doo biniyé nahjįʼ kódeeshłííł.
32 Ízrel dineʼé áádóó Júdah dineʼé éí aláahgo bindanitʼaʼí áádóó binaatʼáanii danilíinii áádóó bináádaʼiiłniihii áádóó áhodoonííł yaa dahalneʼii áádóó Júdah dineʼé danilíinii índa Jerúsalemgi kéédahatʼíinii doo yáʼáshónígi ádajíítʼįįdígíí tʼáá átʼé bee shádahojííłchįįdígíí biniinaa nahjįʼ kóhodeeshłííł.
33 Azhą́ abíínídą́ą́ʼ náádiishʼnahgo nináníshtįįh nidi, tʼáadoo deidiiztsʼą́ą́ʼgóó bínabinishtinígíí tʼáadoo nídeidiiláa da, áko shitsʼą́ąjįʼ neezhjéeʼgo doo náádashiníłʼı̨́į da.
34 Nidi kin shízhiʼ bee wójíhígíí biyiʼ góneʼ doo daldinii daabíhígíí dayiisįʼgo yee dahóółchǫʼ.
35 Áádóó biyeʼké índa bitsiʼké éí Mólek beʼelyaii yichʼįʼ kǫʼ biyiʼ góneʼ chʼídayiinííł dooleeł biniyé Hínam biyeʼ* biyíldzisgi Béíyal bá ninádahałaah doo biniyé wódah nahazʼą́ągo ádayiilaa. Júdah dineʼé, Díí doo haldinii yee ádił daʼasiihígíí ádadoohłííł, tʼáadoo bidííniid da áádóó tʼáadoo bikʼísídíkéez da.
36 Éí bąą díí kin haalʼáhígíí baa yáníłtiʼgo ádííníniid yę́ę kʼad Ízrel dineʼé biDiyin God Bóhólníihii yaa yáłtiʼgo kóní, Diltłish bee áádóó hodidoochįįłígíí bee índa naałniih bee éí Bábilan dineʼé aláahgo binanitʼaʼí baa didootʼááł.
37 Jó, sháhóóchįįdgo áádóó tʼáá íiyisí doo shił náhodiizhǫǫdgóó índa tʼóó báhádzidgo sháhóóchįįdgo kéyah biyiʼgóó tahonéłkaadígóó áádę́ę́ʼ áłah ánáhodeeshdlííł, jóʼakon. Kojįʼ áłah ánáhodeeshdlíiłgo hasih hazʼą́ągo kéénáhojitʼı̨́į doo,
38 áko shidineʼé danilı̨́į doo, áádóó biDiyin God nishłı̨́į doo.
39 Há yáʼátʼéeh dooleeł áádóó hakéédę́ę́ʼ haʼáłchíní bá yáʼátʼéeh dooleeł índa dashizdósin dooleeł biniyé tʼááłáʼí nitsáhákees índa tʼááłáʼí honítʼiʼii hoolʼáágóó haa dideeshʼááł,
40 áko éí há yáʼátʼééh ádeeshłííł biniyé doo hatsʼádeesháłígíí hoolʼáágóó bee hoł ahadideeshtʼááł índa doo shitsʼádahizhdookah da biniyé dashizdósin doogo hajéí biih dadeeshłééł.
41 Tʼáá aaníí yáʼátʼéehii há baa naasháago hąąh shił nihoozhǫǫh doo, áádóó shijéí tʼáá átʼé bee índa shiiʼ sizíinii tʼáá átʼé bee tsʼídá tʼáá aaníí díí kéyahgi kʼééhodideeshdlééł.
42 Jó, Bóhólníihii kóní, Díí dineʼé kweʼé kééhatʼínígíí díí ayóó átʼéego doo yáʼáshóonii tʼáá átʼé bikʼi yanáatsiígi átʼéego tʼáá ákótʼéego yáʼádaatʼéehii haa diníʼánígíí éí hakʼi yéideestsih.
43 Kédaayahgi diné índa naaldlooshii doo łaʼ bikááʼ hólǫ́ǫ da, áádóó Kaldíya dineʼé baa deetʼą́, dadohníinii ákweʼé kéyah nináádahaniih doo.
44 Kédaayah béeso bikʼé aheeʼníiłgo nináádahaniih doo. Daʼooʼíinii binááł kéyah nidahaniihgo bee bééhózinii éí hanáádadilneʼgo dánáádaʼdiljeeh doo. Bénjamin bikéyahgi, Jerúsalem kin haalʼá bikʼi dinaago nahósʼaʼgi ákweʼé ákótʼée doo. Júdah kéyahgi kin hadaasʼáágóó áádóó dayílkʼidgóó kin hadaasʼáhígóó ákódaatʼée doo. Honíteelgi kin hadaasʼáágóó áádóó shádiʼáahjigo kin hadaasʼáágóó ałdóʼ, háálá yisnááh dajílíinii nahjįʼ kódeeshłíiłgo daahwííʼ yę́ę hwííʼ nídadoodleełgo ádeeshłííł, ní Bóhólníihii.
Footnotes
^ Kéyahgi chʼiyáán yáʼátʼéehii bee ádaʼazįįdígíí ááhyiłní.
^ Mólek éí Áman dineʼé bidiyin bidiʼníinii átʼé. 2Kgs. 23:10; Jer. 7:31.
