Jeremiah 33:1-26
33 Awáalyaa bichʼéédą́ą́ʼ góneʼ Jeremáíyah tʼah bidáʼdeelkaalgo naakidi aleeh góneʼ Bóhólníihii bichʼįʼ hanáánáádzíiʼgo kóní,
2 Bóhólníihii éí nahasdzáán hashtʼeʼnayíʼníniiʼii áádóó bohoníłdzilgo dah siʼą́ągo áyiilaii, éí Bóhólníihii wolyéii kóní,
3 Shichʼįʼ sodílzin, áko nichʼįʼ ééhodeesįįłgo ayóó ádaatʼéii índa ayóó ádabóodziilii doo nił béédahózinii nichʼįʼ yitʼíní ádadeeshłííł.
4 Jó, Ízrel dineʼé biDiyin God Bóhólníihii éí díí kin haalʼáagi bee hídeilkʼidii áádóó diltłish bikʼijįʼ nidazdooldził biniyé kin yę́ę áádóó Júdah dineʼé aláahgo bindanitʼaʼí dabikin yę́ę naaʼadadziiskaadii yaa haadzíiʼgo kóní,
5 Kaldíya dineʼé bił ałkʼi jiijeeh áádóó díí kin haalʼáhígíí biiʼ atsʼíís daneeznáago hadeididoołbı̨́ı̨́ł yiniyé aadę́ę́ʼ yijah. Éí sháhóóchįįdígíí bee índa tʼóó báhádzidígi átʼéego hashké niisdzı̨́ʼígíí bee hoł jidideeshxał; jó, díí kin haalʼáagi tʼáá íiyisí doo yáʼáshónígi ádajíítʼįįdii tʼáá átʼé biniinaa hatsʼą́ąjigo díníshʼı̨́įʼ doo.
6 Doo hąąh daatééhgóó áńdahodeeshdlííł, áádóó nídahodeesdzih. Tʼáá aaníí nídahodeesdzih, áádóó bee achʼįʼ hózhóonii índa tʼáá aaníinii tʼóó ahayóí hólǫ́ǫgo hoł ííshjání ádadeeshłííł, jóʼakon.
7 Áádóó Júdah dineʼé áádóó Ízrel dineʼé yisnááh danilíinii nahjįʼ kódeeshłíiłgo daabííʼ yę́ę bííʼ nídadoodleełgo ádeeshłííł índa átséédą́ą́ʼ kʼeeʼąą hodiníłtʼą́ yę́ęgi átʼéego kʼeeʼąą náhodínéeshtʼı̨́ı̨́ł.
8 Doo ákwii ádajitʼı̨́ı̨́góó shichʼįʼ ádił nidadziisíiʼii éí tʼáá ałtso hąąh dadeeshdah. Doo ákwii ádajitʼı̨́ı̨́góó ádił nidadziisíiʼgo shibee hazʼáanii kʼídadziztiʼii éí tʼáá ałtso há kʼéédaʼdeeshchxǫǫł.
9 Kin haalʼáa dooleełígíí éí nihokááʼgóó ałʼąą dineʼé danilíinii yaa dahaniih doo, áádóó ayóó átʼéego yaa nitsídaakees doo, áko éí bee biʼdójíhígíí tʼáá íiyisí bąą shił hózhǫ́ǫ doo. Yáʼátʼéehii bá baa naasháhígíí tʼáá átʼé ałʼąą dineʼé yaa dahodiitsʼaʼ doo. Yáʼátʼéehii bá baa naasháhígíí índa tʼáá ałtsoní bee ádaʼazįįdgo bá íínísinígíí éí tʼáá ałtso biniinaa ałʼąą dineʼé nídaaldzid doo, áádóó bitah dahoditłid doo.
10 Bóhólníihii kóní, Ádadohníigo Júdah kéyahgi kin hadaasʼáágóó áádóó Jerúsalem kintaa daʼaztiingóó éí ákǫ́ǫ́ doo naagháhí da. Diné nidi, doo łaʼ naagháa da, índa doo łaʼ kéédahojitʼı̨́į da, áádóó naaldlooshii nidi ádin. Tʼáadoo biniyéhígóó hazʼą́. Diné índa naaldlooshii łáʼí nidi ádin, dadohnínígíí ákweʼé díí náádadiitsʼaʼ doo;
11 ił náhooshǫǫł iinééʼ áádóó ił hózhǫ́ǫ́jí iinééʼ áádóó iiyehii biinééʼ índa báʼiigehii biinééʼ náádadiitsʼaʼ doo. Ahééh hasinjí nááhániihii éí Bóhólníihii bikin biiʼ sohodizinjįʼ dayíjáahgo dahataałgo kódaaníi doo, Tʼáá ałtsoní bee Bóhólníihii bichʼįʼ ahééh danohsin, háálá Bóhólníihii yee aa aʼááh nízinii tʼáá yitʼéhí yitʼéii hoolʼáágóó hólǫ́. Háálá yisnááh dajílíinii nahjįʼ kódeeshłíiłgo áłtséédą́ą́ʼ hakéyah átʼé yę́ęgi átʼéego daahóóʼ yę́ę hwííʼ nídadoodleełgo ádeeshłííł.
12 Tʼáá ałtsoní bee Bóhólníihii kóní, Díí kweʼé diné índa naaldlooshiida doo łaʼ naagháágóó tʼóó dzígaigo hazʼánígi áádóó kin hadaasʼáágóó tʼáá ałtso ákǫ́ǫ́ dibé yaa ádahalyáanii bilı̨́ı̨́ʼ háádaalyı̨́įhgo kénáádahatʼı̨́į doo.
13 Daadziłgóó kin hadaasʼáágóó, honíteeldi kin hadaasʼáágóó, shádiʼáahdi kin hadaasʼáágóó, Bénjamin dineʼé bikéyah bikááʼgóó, Jerúsalem kin yílʼáhígíí bikʼi dinaago nidahósʼaʼgóó índa Júdah kéyahdi kin hadaasʼáágóó dibé yółtaʼí ákǫ́ǫ́ dibé nááyółtaʼ doo, ní Bóhólníihii.
14 Jó, Ízrel dineʼé áádóó Júdah dineʼé, Yáʼátʼéehii nihaa dideeshʼááł, bidííniidii bohodoolníiłjįʼ bichʼįʼ yoołkááł, ní Bóhólníihii.
15 Éí yoołkáałdi áádóó éí hoolzhishdi David bitsʼą́ą́dóó náás oochíiłii éí bitahdóó tʼáá ákogi átʼéego atsʼáozʼaʼ łaʼ habidinéesééł, áko éí kéyahgi doo haada yitʼéii índa tʼáá ákogi átʼéii yaa naagháa doo.
16 Éí yoołkáałdi Júdah dineʼé yisdádooʼnił, áádóó Jerúsalemgi kéédahatʼínígíí bił sih hazʼą́ą doo, áko Bóhólníihii, Bee Tʼáá Ákogi Ániitʼéii, éí bízhiʼígíí bee biʼdójíi doo.
17 Háálá Bóhólníihii kóní, David éí Ízrel dineʼé bitahdóó bikááʼ dah asdáhí bikááʼdóó nantʼáii yikááʼ dah dínóodaałígíí éí doo bídin hóyéeʼ da doo.
18 Shinááł Líívai dineʼé bitsʼą́ą́dóó náás oochíiłgo nááʼiiłniihii danilínígíí éí didlidgo nááhániihii áádóó akʼáán nááhániihii índa nááʼiiłniih dooleełii tsʼídá doo bídin hóyéeʼ da doo.
19 Bóhólníihii éí Jeremáíyah yichʼįʼ hanáánáádzíiʼgo kóní,
20 Bóhólníihii kóní, Doo jı̨́ nááhoodleeł da doo, índa doo tłʼééʼ nááhoodleeł da doo biniyé jı̨́ áádóó tłʼééʼ nahjįʼ kóníléehgo bíninilʼą́ą́ ládą́ą́ʼ,
21 áko shá naalʼaʼí David áádóó shá nidaalʼaʼí Líívai dineʼé bitsʼą́ą́dóó náás ahoolchíiłii nááʼiiłniihii danilíinii éí ałdóʼ bił ałhaʼdinishtʼáanii kʼídoodlałgo bíighah áádóó David bibikááʼ dah asdáhí yikááʼdóó nantʼáii David bitsʼą́ą́dóó náás oochíiłii éí biyeʼ doo łaʼ yikááʼdóó dah dínóodaał da.
22 Yótʼááh hiníláii sǫʼ doo jóołtaʼ ánéelą́ą́ʼ yílʼáa da índa tónteel bibąąhgóó séí doo bízhʼneełʼąąhígi ánéelą́ąʼ da; tʼáá ákótʼéego ałdóʼ shá naalʼaʼí David bitsʼą́ą́dóó náás oochíiłii tʼóó ahayóigo ádeeshłííł, áádóó shá nidaalʼaʼí Líívai dineʼé tʼóó ahayóigo ádeeshłííł.
23 Áádóó ałdóʼ Bóhólníihii éí Jeremáíyah yichʼįʼ hanáánáádzíiʼgo kóní,
24 Bóhólníihii éí dineʼé naakigo dah oonééł niidiníʼáanii doo yiniizı̨́įʼ da, díí dineʼé ákódaanínígíísh doo baa ákonínízin da? Ákódajinínígíí shidineʼé dajííʼįįd, áko tʼááłáʼí dineʼé danilı̨́įgo doo baa nitsídadzikees da.
25 Bóhólníihii kóní, Iʼiiʼaah áádóó niyiiłkaah bił ahaʼdinishtʼáanii índa yádiłhił áádóó nahasdzáán bikʼehgo hoogáałii doo áshłaagóogo,
26 áko éí Jéíkab bitsʼą́ą́dóó náás oochíiłii índa shá naalʼaʼí David bitsʼą́ą́dóó náás oochíiłii yóóʼadeeshkał nítʼééʼ, áádóó David bitsʼą́ą́dóó náás oochíiłii doo łaʼ nídideeshtééłgóó éí Éíbraham áádóó Áízak índa Jéíkab bitsʼą́ą́dóó náás oochíiłii doo łaʼ yinantʼáa da doo nítʼééʼ. Nidi yisnááh dajílíinii nahjįʼ kódeeshłíiłgo daahóóʼ yę́ę hwííʼ nídadoodleełgo ádeeshłííł índa haa aʼááh dínéesįįł.
