Jeremiah 34:1-22
34 Bábilan dineʼé aláahgo binanitʼaʼí Nébukadnézzar áádóó bisiláo dah yinéełii tʼáá ałtso áádóó ałʼąą dineʼé dah deínéehgo bee bóhólníihgo bił nahazʼáanii tʼáá ałtso, áádóó dadineʼé danilíinii tʼáá ałtso éí Jerúsalem áádóó binaagóó kin hadaasʼáhígíí tʼáá átʼé yił daʼahigą́ yę́ędą́ą́ʼ Bóhólníihii kótʼéego Jeremáíyah yichʼįʼ haadzííʼ,
2 Ízrel dineʼé biDiyin God Bóhólníihii kóní, Nílááh, Júdah dineʼé aláahgo binanitʼaʼí Zedekáíyah bichʼįʼ handziihgo kóbidiní, Bóhólníihii kóní, Díí kin haalʼáhígíí Bábilan dineʼé aláahgo binanitʼaʼí baa dideeshʼáałgo yihodidooniłgo iididoołkʼą́ą́ł,
3 áádóó éí doo bílákʼee hadíínáał da, nidi tʼáá aaníí nił nidadoodiłgo yaa dandidooʼááł. Bábilan dineʼé aláahgo binanitʼaʼí bił ahinínílʼı̨́įgo bił ahił hodíílnih áádóó Bábilangóó díínááł.
4 Júdah dineʼé aláahgo binanitʼaʼí nílíinii, Zedekáíyah nidiʼníinii, Bóhólníihii bizaad tʼah yíníłtsʼą́ą́ʼ, Diltłish bee doo dadíítsaał da, níigo Bóhólníihii naa haadzííʼ;
5 hashtʼedíínítʼéego dadíítsaał, áádóó danizhéʼé tʼáá nítséedi aláahgo naatʼáanii daazlı̨́ı̨́ʼ yę́ę éí łikání dahalchinii bá dadoodlidígi átʼéego ni ałdóʼ łikání dahalchinii ná deididoołił, áádóó naa yínííł danilı̨́įgo atínídadindleehgo kódaaníi doo, Kʼad índa lą́ą bóhólníihii, díí lá saad bee haasdzíiʼ ni, ní Bóhólníihii.
6 Áádóó Jerúsalemgi Jeremáíyah éí Júdah dineʼé aláahgo yinanitʼaʼí Zedekáíyah díí saad tʼáá átʼé yee yichʼįʼ haadzíiʼgo,
7 Bábilan dineʼé aláahgo binanitʼaʼí bisiláo dah yinéłígíí éí Jerúsalem áádóó Júdah kéyahgi kin hadaasʼá, tʼáá éí Léíkish áádóó Azííkah kin hadaasʼá ditą́ągo binaa ahéédaʼastłʼinii daadziihígíí yił daʼahoogą́ą́ʼ.
Hííbrew dineʼé naalteʼ danilíinii bibee ahaʼdeetʼą́ kʼétiʼ
8 Áko aláahgo naatʼáanii Zedekáíyah éí diné Jerúsalemgi kéédahatʼínígíí nihéédadidoochił, yididooniił biniyé yił ahaʼdeetʼą́ą́dóó bikʼijįʼ Bóhólníihii éí Jeremáíyah yichʼįʼ haadzííʼ.
9 Íídą́ą́ʼ tʼááłáʼí jinítínígo Hííbrew diné hanaalteʼ índa Hííbrew asdzání hanaalteʼ danilíinii béédazhdidoochił, ákótʼéego hakʼis Jew dineʼé nilíinii doo hanaalteʼ ázhdoolíił da.
10 Áko tʼááłáʼí jinítínígo diné hanaalteʼ índa asdzání hanaalteʼ béédazhdidoochiłgo bee ahaʼdeetʼáanii hoł tʼáá daʼákohígíí naatʼáanii dajílíinii áádóó diné tʼáá ałtso akʼeh dahojííłʼįįd.
11 Áádóó bikʼijįʼ łahgo átʼéego tsíńdadeezkéezgo diné naalteʼ índa asdzání naalteʼ danilı̨́įgo béédazhdeezhchidii naalteʼ ánáádajiidlaa, áádóó hanaalteʼ danilı̨́įgo hakʼeh dahółʼı̨́įgo ánáádajiidlaa.
12 Ákohgo índa Bóhólníihii éí Jeremáíyah yichʼį hanáánáádzíiʼgo kóní,
13 Ízrel dineʼé biDiyin God Bóhólníihii kóní, Danihizhéʼé yę́ę Ííjip kéyahdę́ę́ʼ chʼééníshʼnilgo naalteʼ danilı̨́įgo kééhatʼı̨́ı̨́ nítʼééʼ yę́ędę́ę́ʼ chʼééníshʼnilgo bił ahadaʼdinishtʼą́ągo kódíshní,
14 Ííshją́ą́ tsostsʼid nááhaigo tʼááłáʼí nootínígo Hííbrew diné nihinaalteʼ nilı̨́į dooleeł biniyé nihichʼįʼ nidahaazniiʼii éí nihá nidaalnishgo hastą́ą́h nááhaigo béédadidoohchił. Danihizhéʼé yę́ę tʼáadoo shá deidiiztsʼą́ąʼ da, índa tʼáadoo nidi yíká daʼíistsʼą́ąʼ da.
15 Áko łahgo átʼéego tsíńdadookéezgo tʼááłáʼí nootínígo nihił kééhatʼíinii doo nihinaalteʼ nilı̨́į da dooleeł, dadohníigo shinááł tʼáá ákogi ádaotʼįįd áádóó ałdóʼ kin shízhiʼ bee wójíigo siʼánígíí biiʼ góneʼ shił ahadaʼdinoohtʼą́,
16 nidi tʼááłáʼí nootínígo diné nihinaalteʼ índa asdzání nihinaalteʼ danilı̨́ı̨́ nítʼééʼ yę́ę shónídeisołtʼeʼgo nihinaalteʼ áńdaohdlaago shitsʼą́ąjįʼ noojéeʼgo shízhiʼ doo ílı̨́ı̨́góó ádaohłaa. Éí ádeinízinígíí bikʼehgo béédadoochid nítʼééʼ, nidi kʼad éí nihikʼeh náádahółʼı̨́į dooleeł biniyé nihinaalteʼ ánáádaohdlaa.
17 Éí bąą Bóhólníihii kóní, Diné tʼááłáʼí nootínígo nihikʼis índa nihił kééhatʼíinii kʼad doo naalteʼ danohłı̨́į da, dadohníigo tʼáadoo dashíísóołtsʼą́ąʼ da. Jó, kʼad diltłish áádóó naałniih índa dichin nihichʼįʼ badahonídleeʼgo ánihideeshłíiłgo bee nihił hashneʼ. Nihookááʼgóó ałʼąą dineʼé kéédahatʼı̨́ı̨́góó aláahgo binanitʼaʼí dahólǫ́ǫ́góó nihikʼee tʼóó bił adahayóigo ánihideeshłííł.
18 Bee ahaʼdeetʼáanii shinááł baa nidziskai yę́ę tʼáadoo bidaʼjiilaagóó béégashii yáázh ahádajishgizhgo bitaʼ gónaa chʼídadziiskai yę́ędą́ą́ʼ shibee ahaʼdeetáanii kʼídadziztiʼígíí kóhodeeshłííł:
19 éí Júdah dineʼé bindanitʼaʼí danilíinii áádóó Jerúsalem kin haalʼáádóó naatʼáanii danilíinii áádóó yúnak* danilíinii áádóó nááʼiiłniihii danilíinii índa kéyah tʼáá náhwiistʼą́ą́ nítʼééʼ diné kéédahatʼíinii éí béégashii yáázh aháálgizhgo bitaʼ góneʼ chʼídadziiskaígíí
20 éí hweʼanaʼí danilíinii áádóó hazééʼdeidootʼįįłgo hádaatʼíinii bílákʼee hodideeshʼááł, áko hatsʼíís daneeznáanii éí tsídii índa nihokááʼgóó naaldlooshii dabichʼiyąʼ doo.
21 Áádóó Júdah dineʼé aláahgo binanitʼaʼí Zedekáíyah índa naatʼáanii danilíinii éí anaʼí danilíinii áádóó hazééʼdeidootʼįįłgo hádaatʼíinii índa Bábilan dineʼé aláahgo binanitʼaʼí bisiláo bikéyahgóó anídahaasʼnáanii baa hodideeshʼááł.
22 Bóhólníihii kóní, Díí kin haalʼáajįʼ nídooʼnéełgo bee bichʼįʼ hadeesdzih. Náʼnáago kin haalʼáagi hoł daʼahidoogą́ą́ł áádóó deidoołnééł índa yidahodidooniłgo adeididoołkʼą́ą́ł, áko Júdah kéyahgi kintsʼiil tʼéí dah naazhjaaʼgo doo naagháhígóó áhodeeshłííł, jóʼakon.
Footnotes
^ Saad Łaʼ Ááhdeiłníinii bee bééhózinígi yíníłtaʼ.
