Jeremiah 35:1-19
35 Josáíyah biyeʼ Jiihóíyakim éí Júdah dineʼé aláahgo yinantʼáago bíyoołkááłdą́ą́ʼ Bóhólníihii éí Jeremáíyah yichʼįʼ hanáánáádzíiʼgo kóní,
2 Nílááh, Rííkab dineʼé bichʼįʼ dínáahgo bichʼįʼ handziih, áádóó nídííʼishgo Bóhólníihii bikin biiʼ sohodizin góneʼ éí łahgo dahooghanígíí biyiʼ góneʼ yah adííʼish, áádóó wáin bitaadííkaałgo deidoodlı̨́ı̨́ł.
3 Áko Habazináíyah biyeʼ Jeremáíyah biyeʼ Jeiyazanáíyah áádóó Habazináíyah bikʼisóó danilíinii áádóó éí biyeʼké danilíinii índa Rííkab dineʼé danilíinii tʼáá átʼé dah diiʼeezh,
4 áádóó Bóhólníihii bikin biiʼ sohodizin góneʼ yah ííʼeezhgo Diyin God yá naalʼaʼí Igdaláíyah biyeʼ Héínan biyeʼké danilíinii bighan góneʼ yah ííʼeezh. Éí dáádéesdáhí Shálam biyeʼ Méíyasíyah bighanígíí bikáaʼdi naatʼáanii danilíinii bighanígíí bíighahgóó hooghango ákóneʼ yah ííʼeezh,
5 áko Rííkab dineʼé bidááhgóó wáin tóshjeeh yázhí biiʼ hadadeezbingo áádóó bee adlání ninínilgo, Wáin daohdlą́, bidííniid.
6 Nidi hadaasdzíiʼgo ádadííniid, Wáin éí tsʼídá doo dadiidlı̨́įł da, háálá Rííkab biyeʼ Jónadab nihizhéʼé yę́ę éí, Hoolʼáágóó wáin tsʼídá doo dadoohdlı̨́įł da; nihí áádóó nihadaʼáłchíní hoolʼáágóó doo deidoodlı̨́įł da, nihiłníigo yee nihichʼįʼ haadzííʼ,
7 índa kin doo łaʼ ádadoohłíił da, áádóó álástsiiʼ doo łaʼ adadoohjih da, índa chʼil naʼatłʼoʼii doo kʼidadidoohłéeł da, doo nidi łaʼ nihee hólǫ́ǫ da doo, nidi kéyah biiʼ tʼóó átsééd kéédahohtʼínígíí éí biiʼ nízaadgóó dahinohnáa dooleeł biniyé níbaal biiʼ danihighan doo.
8 Nihí áádóó niheʼasdzą́ą́ áádóó nihiyeʼké índa nihitsiʼké éí Rííkab biyeʼ Jánadab nihizhéʼé yę́ę, Anihídayiiską́ąjįʼ wáin tsʼídá doo łaʼ doohdlı̨́įł da, níigo yee nihichʼįʼ haadzíiʼii bikʼeh dahosiilʼįįd.
9 Nihikin biiʼ kéédahwiitʼı̨́į dooleełígíí nidi ádin. Nihichʼil naʼatłʼoʼii doo deílʼáa da. Nihikéyah áádóó álástsiiʼ adoojihígíí nidi nihee ádin.
10 Jánadab nihizhéʼé yę́ę, Díí bidaʼdoohłííł, nihiłníigo yee nihichʼįʼ haadzíiʼii tʼáá átʼé bikʼeh dahosiilʼįįdgo tʼáá ákǫ́ǫ́ ádeiidzaa; níbaal tʼéí biiʼ kéédahwiitʼı̨́.
11 Nidi Bábilan dineʼé aláahgo binanitʼaʼí Nébukadnézzar kéyah yaatįįh yínáago ádadiiʼní, Sołtįʼ, Kaldíya dineʼé bisiláo yinééł, áádóó Síriya dineʼé bisiláo yinééł, yíiyá łą́ą. Jerúsalemgóó kįįh dah hidiiʼnééł, dadiiʼniidgo díí bąą Jerúsalemgi kéédahwiitʼı̨́.
12 Ákohgo Bóhólníihii éí Jeremáíyah yichʼįʼ hanáánáádzíiʼgo kóní,
13 Ízrel dineʼé biDiyin God tʼáá ałtsoní bee Bóhólníihii kóní, Nílááh, Júdah dineʼé áádóó Jerúsalemgi kéédahatʼíinii ábidiní, Shizaad deísółtsʼą́ąʼgo nanihiʼdintinígíísh doo danohsin da? ní Bóhólníihii.
14 Rííkab biyeʼ Jánadab éí baʼáłchíní ahoolchíiłii wáin tsʼídá doo dadoohdlı̨́įł da, yidííniidii yidaʼiilaa, áko éí díí jı̨́įjįʼ tʼah doo łaʼ deiidlą́ą da, háálá bizhéʼé yę́ę hachʼįʼ yee haadzíiʼii yidaʼiilaa. Ákondi nihí éí tʼáá ahą́ą́h nihichʼįʼ yáshtiʼ, nidi tʼáadoo dashíísóołtsʼą́ąʼ da.
15 Shá dahalneʼé tʼáá ałtso shá nidaalʼaʼgo tʼáá ahą́ą́h nihichʼįʼ ałnáádaashʼaahgo ałtso nihichʼįʼ yíłʼaadgo kódíshní, Tʼááłáʼí nohtínígo doo yáʼátʼéehii baa nidaahkaígíí bitsʼą́ąjįʼ dah nídahidoohkáahgo nánóhkááh, áádóó doo yáʼáshónígi ádaohtʼínígíí niʼ kódaohłééh, áádóó diyin dabidiʼníinii bá nidaołʼaʼ dooleełgo tʼáadoo bikééʼ naanánohjahí. Díí bidaʼoohłaago kéyah nihí dooleełgo índa danihizhéʼé yę́ę daabííʼ dooleełgo nihaa diníʼáanii biiʼ kééhohtʼı̨́į doo. Nidi dashididoohtsʼı̨́ı̨́ł biniyé nihijaaʼ tʼáadoo shichʼįʼgo dadootsi da.
16 Rííkab biyeʼ Jánadab éí baʼáłchíní ahoolchíiłii bizhéʼé yę́ę bee bichʼįʼ hadzoodzíiʼii yidaʼiilaa, nidi díí dineʼé tʼáadoo dashíistsʼą́ąʼ da.
17 Éí bąą Ízrel dineʼé biDiyin God, tʼáá ałtsoní bee Bóhólníihii Diyin God éí kóní, Jó, Júdah dineʼé índa Jerúsalemgi kéédahatʼíinii doo yáʼáshǫʼ bee bikʼijįʼ haasdzíiʼii tʼáá átʼé baa hodideeshʼááł, háálá bichʼįʼ haasdzíiʼ nidi, tʼáadoo dashíistsʼą́ąʼ da; bichʼįʼ ádííniid nidi, tʼáadoo shichʼįʼ éédahoosįįd da.
18 Ákohgo Jeremáíyah éí Rííkab dineʼé kóyidííniid, Ízrel dineʼé biDiyin God tʼáá ałtsoní bee Bóhólníihii kóní, Nihizhéʼé yę́ę Jánadab yee nihichʼįʼ haadzíiʼii áádóó bikʼehgo iináanii nihá ałkééʼ nideiznilii índa yee nihichʼįʼ hahaasdzíiʼii tʼáá ałtso bidaʼoohłaa,
19 éí bąą Ízrel dineʼé biDiyin God tʼáá ałtsoní bee Bóhólníihii kóní, Rííkab biyeʼ Jánadab éí bitsʼą́ą́dóó náás oochíiłii shidááhdóó nídeidzįįh dooleełii tsʼídá doo bídin hóyéeʼ da doo.
