Jeremiah 38:1-28
38 Ákohgo Mátan biyeʼ Shefatáíyah áádóó Pásher biyeʼ Gedaláíyah áádóó Shelemáíyah biyeʼ Júkal índa Malkáíyah biyeʼ Pásher éí Jeremáíyah diné tʼáá ałtso saad bee bichʼįʼ hadziisdzíʼígíí deidiiztsʼą́ą́ʼ.
2 Bóhólníihii kóní, Díí kin haalʼáagi tʼáá ákǫ́ǫ́ nidajikaígíí éí diltłish áádóó dichin áádóó naałniih nidahodoołtsił, nidi Kaldíya dineʼé bichʼįʼ chʼíjiiskaii éí dajiináa doo, háálá bąąh oogą́ąʼii jílı̨́įgo dajiináa doo.
3 Bóhólníihii kóní, Díí kin haalʼáhígíí éí Bábilan dineʼé aláahgo binanitʼaʼí bisiláo dah yinéłígíí éí tsʼídá tʼáá aaníí baa didootʼáałgo yidoołnééł.
4 Ákohgo naatʼáanii danilíinii éí aláahgo naatʼáanii ádeidííniid, Baa nídaniikąąh, bíniʼdii díí hastiin diyoolyééł, háálá díí kin haalʼáagi siláo daadziihígíí áádóó diné kéédahatʼínígíí tʼáá ałtso saad bee bichʼįʼ yájíłtiʼígíí bee bitah doo dahojiiłnaʼ da, háálá díí hastiin bidineʼé bá yáʼátʼéeh dooleełii doo yá hátʼı̨́į da; atídoolnííł tʼéiyá yá hátʼı̨́.
5 Áko aláahgo naatʼáanii Zedekáíyah ádííniid, Nihílákʼee sitı̨́, jóʼakon. Shí doo nihikʼijįʼ nishłı̨́į da doo.
6 Ákohgo Jeremáíyah dah deidiilóozgo aláahgo naatʼáanii biyeʼ Malkáíyah bitó bá azʼą́ą́ góyaa adayiisxan. Éí awáalyaa bichʼéédą́ąʼgi tó bá azʼą́ą́ góyaa tłʼóół bee Jeremáíyah hadadeizloʼ. Tó bá azʼą́ą́ góyaa éí tó ádin, tʼáá hazhóʼó hashtłʼish ditsʼidí tʼéiyá hólǫ́, áko Jeremáíyah nahoditsʼǫʼ íígoʼ.
7 Nítʼééʼ aláahgo naatʼáanii éí Bénjamin bidáńʼdítı̨́įhgi sidáago Iithiyópiya dineʼé nilíinii Ííbed-míílek, yúnak* nilı̨́įgo éí tó bá azʼą́ą́ góyaa Jeremáíyah adeistʼeʼgo yiyííniiʼgo
8 Ííbed-míílek éí aláahgo naatʼáanii bighandóó chʼíníyáago aláahgo naatʼáanii yaa níyáago áyidííniid,
9 Bóhonishníihii, aláahgo naatʼáanii nílíinii, díí diné éí Diyin God yá halneʼii Jeremáíyah tó bá azʼą́ą́ góyaa adahwiisxanígíí éí ádahóółʼįįdígíí tʼáá átʼé yee doo yáʼáshǫʼ tʼéiyá yaa naaskai, áko díí kin haalʼáagi bááh ásdįįdígíí biniinaa Jeremáíyah tʼáá ákóyaa dadootsaał.
10 Ákohgo aláahgo naatʼáanii éí Iithiyópiya dineʼé nilíinii Ííbed-míílek yichʼįʼ haadzíiʼgo kóní, Kodóó diné tádiin yiltʼéego nídiiníiłgo Jeremáíyah tʼah doo daatsaahdą́ą́ʼ tó bá azʼą́ą́dę́ę́ʼ háádaołteeh.
11 Áko Ííbed-míílek éí diné yił dah diikaigo aláahgo naatʼáanii bikin siʼą́ą́góó yíkai; áadi yódí bá hooghan biyaadi hazʼą́ą́ góneʼ ąą ádayiilaago áádę́ę́ʼ anilí áádóó ééʼ nidahaazhaazhígíí łaʼ hadeiznilgo tłʼóół yee tó bá azʼą́ą́ góyaa Jeremáíyah yichʼįʼ hadadeizloʼ.
12 Ákohgo Iithiyópiya dineʼé Ííbed-míílek éí Jeremáíyah áyidííniid, Anilí áádóó ééʼ nidahaazhaazhígíí nichʼáyah góneʼ tʼáá ałchʼishjí abíhíyííł áádóó łaʼ niyid gónaa tłʼóół tʼáá bił ádináníltʼih. Áko Jeremáíyah ákódzaa.
13 Áádóó índa tłʼóół bee tó bá azʼą́ą́dę́ę́ʼ Jeremáíyah háádeizloʼ áádóó Jeremáíyah éí awáalyaa bichʼéédą́ąʼgi dzizdáá nítʼééʼ.
Zedekáíyah éí Jeremáíyah kótʼée doo bididooniiłígíí yíyííkeed
14 Áko aláahgo naatʼáanii Zedekáíyah éí Diyin God yá halneʼii Jeremáíyah yíká iʼííłʼaʼgo Bóhólníihii bikin biiʼ sohodizin siʼánígíí tááʼ góneʼ dáńʼdítı̨́įhgi hoł yah ííyá. Áádóó aláahgo naatʼáanii éí Jeremáíyah áyidííniid, Nanídídéeshkił, haʼátʼíida doo shitsʼąą dínííłʼı̨́įł da.
15 Ákohgo Jeremáíyah éí Zedekáíyah áyidííniid, Bee nił hweeshneʼgo tsʼídá shidiyííłhéełgo tʼáá aaníí shił bééhózin. Kótʼéego nidííniidgo doo shíídííłtsʼįįł da.
16 Nidi aláahgo naatʼáanii Zedekáíyah tʼáá nahontʼinee Jeremáíyah yichʼįʼ ádee hadoodzííʼ, Bóhólníihii, hiniiʼnáago ánihiilaii éí tsʼídá tʼáá aaníí hiná; ákótʼéego tsʼídá tʼáá aaníí doo nidiyeeshxéeł da, índa díí diné dandiyoołhééł yiniyé naa niheekaígíí éí doo baa nidideeshʼáał da.
17 Ákohgo Jeremáíyah éí Zedekáíyah áyidííniid, Ízrel dineʼé biDiyin God éí Diyin God tʼáá ałtsoní bee Bóhólníihii kóní, Bábilan dineʼé aláahgo binanitʼaʼí éí naatʼáanii biyaa sinilígíí tʼóó bichʼįʼ dah diniyáago, áko lá índa hinínáa doo biniyé áániʼdiszįįd doo áádóó díí kin haalʼáhígíí doo adidoolkʼą́ął da índa ni áádóó naʼáłchíní dahináa doo,
18 nidi Bábilan dineʼé aláahgo binanitʼaʼí éí naatʼáanii biyaa sinilígíí doo baa ádíínítʼą́ą́góó éí díí kin haalʼáhígíí Kaldíya dineʼé baa didootʼáałgo adeididoołkʼą́ą́ł, áádóó ni éí tsʼídá doo biyaa hadíínáał da.
19 Ákohgo Zedekáíyah éí Jeremáíyah áyidííniid, Jew dineʼé éí Kaldíya dineʼé yichʼįʼ yóóʼaheeswodígíí binásdzid, háálá Kaldíya dineʼé éí áadi Jew dineʼé yaa dashididooʼáałgo shá nidahałtʼiʼ doo.
20 Áádóó Jeremáíyah ádííniid, Doo yaa dandidooʼáał da. Kʼad lą́ą Bóhólníihii áníinii índa áńdishníinii bikʼehgo ánínéehgo ná yáʼátʼéeh dooleeł áádóó tʼáá hinínáa doo.
21 Nidi baa ádidíítʼáłígíí doo ninizı̨́ı̨́ʼgóó éí kótʼée dooleełgo Bóhólníihii shichʼįʼ ánááyiidlaa.
22 Shoo, Júdah dineʼé aláahgo binanitʼaʼí bighangi asdzání daadziihígíí éí Bábilan dineʼé aláahgo binanitʼaʼí naatʼáanii biyaa sinilígíí baa dahidootʼish, áko ádadidooniił, Kʼad nahoditsʼǫʼ íínítłizhgo nikʼisóó baa dzíínílíí nítʼéeʼii nindaʼazloʼgo nikʼeh dadeesdlı̨́ı̨́ʼ áádóó tʼą́ą́ʼ dah nídahidiijééʼ.
23 Naʼákéí danilíinii índa naʼáłchíní danilíinii tʼáá ałtso Kaldíya dineʼé bichʼįʼ chʼídootʼish índa tʼáá ni ałdóʼ tsʼídá doo biyaa hadíínáał da, nidi Bábilan dineʼé aláahgo binanitʼaʼí niidoołtsoł, áádóó niniinaa díí kin haalʼáhígíí adidoolkʼą́ą́ł.
24 Ákohgo Zedekáíyah éí Jeremáíyah áyidííniid, Díí saad bee háínídzíʼígíí tʼááká łaʼ bił bééhoozı̨́ı̨́ʼ yíilaʼ, áko doo dadíítsaał da.
25 Nił ahił hweeshneʼígíí naatʼáanii danilíinii yaa dahodiiztsʼą́ąʼgo áádóó naa yíkaigo, Aláahgo naatʼáanii bee bił hwíínílneʼígíí áádóó yee nił hoolneʼígíí bee nihił hólneʼ; tʼáadoo nihitsʼąą naníłʼiní, áko doo dandiyiilyéeł da, dandííniidgo
26 ábididííniił, Jánathan bighandi doo dadeestsaał da, áko doo ákǫ́ǫ́ náshidííłʼaał da, dishníigo aláahgo naatʼáanii bichʼįʼ ádaa náʼiisiskan.
27 Ákohgo naatʼáanii danilíinii tʼáá ałtso Jeremáíyah yaa yíkaigo nidayídééłkid, áádóó aláahgo naatʼáanii nahoneeztą́ą́ʼ yę́ęgi átʼéego bichʼįʼ hadzoodzííʼ. Áko tʼáadoo yił ahił náádahoolneʼ da, háálá ahił hoolneʼígíí tʼáadoo yiʼniiʼ da.
28 Áádóó Jerúsalem yisnáajįʼ Jeremáíyah éí awáalyaa bichʼéédą́ąʼgi dzizdáá nítʼééʼ.
Footnotes
^ Saad Łaʼ Ááhdeiłníinii bee bééhózinígi yíníłtaʼ.
