Jeremiah 4:1-31
4 Ízrel dineʼé nílíinii, naa nítsínídzáago shaa nídíídááł, ní Bóhólníihii. Áádóó doo bee níldinii honishłǫ́ǫ́dóó nahjįʼ kwíinilaago áádóó doo shichʼįʼ niʼnílı̨́ı̨́góogo,
2 tʼáá aaníí ádíníigo áádóó doo haadeitʼéii nidííníʼą́ągo índa tʼáá ákogi átʼéii bee nitsíníkeesgo, Bóhólníihii hiná, diníigo bee ádee hadíínídzíiʼgo, áko lá índa hanahjįʼ ałʼąą dineʼé bił nidahoozhǫǫh doo, áádóó hanahjįʼ haa dahaniih doo.
3 Háálá Júdah kéyahgi índa Jerúsalem kin haalʼáagi diné kéédahatʼínígíí Bóhólníihii kwáháłní, Doo nihwiisdládígóó nidahoyołdlaadgo hosh ádaadingóó kʼidaʼdohłé.
4 Tʼóó báhádzidgo shibee atíʼélʼíinii doo hadidoonołgo adidoołił da, áádóó łaʼda doo chʼééh yiniłtsées da dooleełígíí biniyé Júdah dineʼé nohłíinii índa Jerúsalemgi kééhohtʼíinii, Bóhólníihii binááł ádąąh nídahinołgishgo nihijéí bąąhdóó nahjįʼ ádaahłééh, háálá doo yáʼátʼéhígíí ádaohnííł.
Júdah dineʼé éí anaʼí baatįįh yinéhígíí bee bił yééʼ áhoolyaa
5 Júdah kéyahgi baa dahołneʼ, áádóó Jerúsalem kin haalʼáagi bee nidadołghaash, Kéyahgi deenástsʼaaʼ bideeʼ bee ídaʼdohsooł. Ahóokáahgo, tįʼ kin hadaasʼá ditą́ągo binídaʼastłʼinígóó dadiikah, diníigo tsʼídá yéego bee nidílghaash.
6 Dził Záíyan bichʼįʼgo dah naʼatʼaʼgo ánílééh, háálá náhookǫsdę́ęʼgo ayóó átʼéego atíʼoolíiłii biʼdeeshnih. Ákǫ́ǫ́ dadohjeehgo tʼáadoo tʼáá kǫ́ǫ́ nidaahkaí.
7 Nihikéyahgi doo siláhígóó íidoolííł, áádóó nihikin hadaasʼáii naaʼiidiyoołkałgo ákǫ́ǫ́ doo nidaagháhí da doo biniyé náshdóítsoh bitsiijįʼ ditłʼooígíí bighandóó hodíłchʼildę́ę́ʼ chʼíníyá; ałʼąą dineʼé atíyoolíiłii* aadę́ę́ʼ yigááł.
8 Díí biniinaa tłʼoh azis bee áká daałzis, áádóó Bóhólníihii tʼóó báhádzidgo báhóóchįįdígíí doo nihitsʼą́ąjįʼ kónáyiidlaa da. Díí biniinaa dadinohʼníigo daohchxa.
9 Áko éí yoołkáałdi aláahgo naatʼáanii índa naatʼáanii danilíinii bijéí nitsidadooltłił, áádóó náádaʼiiłniihii tsídadidoolyis, índa náás áhodooníiłii yaa dahalneʼii tʼóó bił ałtaa dahaʼaah doo, ní Bóhólníihii.
10 Áko ádííniid, Haʼátʼíí lá ahayóí lá, Bóhólníihii, díí dineʼé índa Jerúsalemgi kééhatʼíinii nihichʼįʼ hózhǫ́ǫgo kééhohtʼı̨́į dooleeł, bidííníniidgo tʼáá íiyisí binisíníloʼ; jó, diltłishda bee atídanihidiʼdoolnííł.
11 Éí hoolzhishdi díí dineʼé índa Jerúsalemgi kéédahatʼíinii bee bichʼįʼ haʼdoodzih, Doo bee ąąh doolchʼih da índa chin doo ąąh dooldah da biniyé honoojítahgi wódahgo nahazʼánígóó shidineʼé bitsiʼ bichʼįʼ tʼáá íiyisí hadoh bił dooyoł.
12 Díí ąąh doolchʼih áádóó ąąh dooldah biniyé yéego bichʼįʼ dooyołgo ádeeshłííł; kʼad há nihodeeshʼááł.
13 Shoo, kʼos hadahalzhood nahalingo yinééł; bitsindaabąąs bijáád naakiígíí éí náátsʼóʼoołdísii nidahalin; atsá naatʼaʼígíí bilááh átʼéego bilı̨́ı̨́ʼ dadilwoʼ. Hatihíláaneʼęę! Kʼad lą́ą danihiʼdoolchxǫʼ!
14 Jerúsalemgi kéédahohtʼíinii, yisdánihiʼdidooʼniłígíí biniyé doo yáʼáshóonii nihijéí bąąh táádaohgis. Tʼáadoo biniyéhígóó nitsídaahkeesígíishąʼ haa nízáágóó nihiiʼ hólǫ́ǫ doo?
15 Dan dineʼé bikéyahdę́ę́ʼ iinééʼ łaʼ halneʼ; Dził Íífreiyim bighą́ą́ʼdę́ę́ʼ doo yáʼáshónígi ádahodooníłígíí yaa halneʼ.
16 Ałʼąą dineʼé bił dahólneʼgo nízaadi kéyahdę́ę́ʼ niʼanaʼí hadanisíidii nidahaaznáago ninídoolzhish; Júdah kéyahgi kin hadaasʼáii yikʼijįʼ danilı̨́įgo yitʼááh nájahgo nidadilghaash doo, diníigo Jerúsalem kin haalʼá bikʼijįʼ nílı̨́įgo hólneʼ, jóʼakon.
17 Dooda bee shichʼįʼ nidadzisteʼígíí biniinaa dáʼákʼeh yaa ádahalyáanii nahalingo hakʼi dinaadę́ę́ʼ hadaʼasíidgo yinídoolzhish, ní Bóhólníihii.
18 Bee ánítʼéii índa áánííł yę́ę éí bee díí nikʼi néitʼiʼ. Díí lą́ą doo yáʼáshǫ́ǫ́góó íínítʼįįdii áádóó tʼáá íiyisí díchʼíiʼii nijéí bínéésʼąąd.
19 Shiiʼ sizíinii nílíinii, deenástsʼaaʼ bideeʼ bee íʼdílzoołí dadiitsʼaʼgo índa ałtʼááh jííjéeʼgo disínítsʼą́ʼígíí biniinaa nitsináshtłiʼii bee nitsináshtłiʼ, áádóó shijéí diniih, shijéí doo hashtʼeditʼeehgóó doo dííníshxéel da.
20 Doo asohodoobéézhgóó atíʼoolnííł. Kéyah tʼáá náhwiistʼą́ą́ nítʼééʼ doo siláhígóó ályaa. Tʼáá haʼooʼnihee shiníbaal naaznilii daalchxǫʼ áádóó dáádadeezbaalii nidayiisdláád.
21 Haa lá nízáágóó dah naʼatʼaʼígíí níshʼı̨́į doo? Índa haa lá nízáágóó deenástsʼaaʼ bideeʼ bee íʼdílzoołí dadiitsʼaʼgo diistsʼaʼ doo?
22 Jó, shidineʼé doo ádahalyą́ą da; doo shéédahósin da; tʼóó ádahodiilgis; doo akʼidaʼdiitįįh da. Doo yáʼáshǫʼ ádeidoolíłígíí yaa dahóyą́; yáʼátʼéehii yaa nidadookahígíí doo bił béédahózin da.
23 Nahasdzáán bikáaʼjįʼ dééʼı̨́ı̨́ʼ nítʼééʼ, shoo, tʼáadoo ánoolniní da áádóó tʼáadoo bikááʼ siláhí da. Yótʼááh góde dééʼı̨́ı̨́ʼ nítʼééʼ, doo dadiʼnídíin da.
24 Daadziłgóó dééʼı̨́ı̨́ʼ nítʼééʼ, shoo, daditłid, áádóó dah daaskʼidii tʼáá átʼé ałnáádaalkiʼgo nidahaʼná.
25 Náádééshtʼı̨́ı̨́ʼ nítʼééʼ, shoo, doo naagháhí da, tsídii nidi tʼáá ałtso yóóʼadahaastʼaʼ lá.
26 Náádééshtʼı̨́ı̨́ʼ nítʼééʼ, shoo, kéyahgi ląʼí naʼntʼąʼígi honoojí tʼéiyá haazlı̨́ı̨́ʼ lágo yiiłtsą́, áádóó ákwii kin hadaasʼáii Bóhólníihii binááł índa tʼóó báhádzidígi átʼéego báhóóchįįdígíí bidáahjįʼ ałtso atídaalyaago nihidadílʼáago yiiłtsą́.
27 Jó, Bóhólníihii kóní, Kéyah tʼáá náhwiistʼą́ą́ nítʼééʼ hóóchxǫʼgo hazʼą́ą doo, nidi doo tʼáá átʼé hodeeshchxǫǫł da.
28 Díí biniinaa nihokááʼ dineʼé atínídadindleeh doo, índa yádiłhił éí yidoojı̨́ı̨́ł, háálá kótʼéego bikʼeh ádahooshłaa, áádóó bee haasdzííʼ; tʼáadoo tʼą́ą́ʼ hónéisdzaa da, índa tʼáadoo łahgo átʼéego tsíńdíkéez da.
29 Łı̨́ı̨́ʼ bikétłʼin áádóó ałtı̨́ı̨́ʼ anídahataʼgo dadiistsʼą́ąʼgo kin haalʼáagi diné kééhatʼínígíí tʼáá átʼé dadínóodzoł, áko hodíłchʼil góneʼ adahidoolwoł, áadi tséghą́ą́ʼ hadahidooʼnah. Kin hadaasʼáii tʼáá átʼé yitsʼádínóodzoł; ákwii diné doo łaʼ kééhatʼı̨́į da doo.
30 Áko kin haalʼáii doo naagháhígóó hazʼáanii, haashąʼ díínííł? Azhą́ naaʼatʼą́hí łichxíiʼii niʼééʼ íinilaa nidi, índa óola bee naʼádíníchʼąąʼ nidi, áádóó ninákʼeegi hoshínídléezhgo nináátsohgo íinilaa nidi, tʼáadoo biniyéhígóó ayóó áníínílningo íʼdinilyaa. Bił ałchʼįʼ dah danilwoʼii daniʼı̨́; dandiyoołhéełgo naa nidahaakai.
31 Asdzání iʼniiłchíihgo bił hodiniihígi átʼéego yichago awééʼ tsʼídá áłtsé yidoołchíiłii kʼadę́ę yiłchí nahalingo Záíyan bichʼéʼé bíká iʼdoolwołígíí yiniyé dah doolnihgo chʼééh didziihgo índa yichago daʼagháanii bąąh nanííłnaʼ biniinaa dooládóʼ hojoobaʼ ádíshníi da! níigo disétsʼą́ą́ʼ.
Footnotes
^ Bábilan dineʼé aláahgo binanitʼaʼí ááhyiłní.
