Jeremiah 40:1-16
40 Siláo binanitʼaʼí Nébuzarʼéídan éí Jerúsalem kin haalʼáádóó áádóó Júdah kéyahdóó deisnáanii Bábilan kéyahgóó adeineeskaadgo Nébuzarʼéídan éí Jeremáíyah béésh daʼahólzhaʼí bąąh sinilgo bił ooldah yę́ę éí Réímah kin haalʼáádóó yéidííchidóó bikʼijįʼ Bóhólníihii kótʼéego bichʼįʼ haadzííʼ.
2 Siláo binanitʼaʼí éí Jeremáíyah yił nídiitʼáazhgo ííłní, NiDiyin God Bóhólníihii kweʼé hazʼánígíí doo yáʼátʼééhgóó yá haadzííʼ.
3 Bóhólníihii átʼı̨́; yee haadzíʼígi átʼéego yiʼiilaa. Bóhólníihii bichʼįʼ ádił daʼsoohsiih áádóó áníinii doo bikʼeh dahosoołʼįįdígíí biniinaa kónihiʼdiilyaa.
4 Díí jı̨́ kʼad béésh daʼahólzhaʼí nílátsíín bináztʼiʼgo bee neʼestłʼóonii nąąh nináʼdiishʼníiłgo néédíshchííd, jóʼakon. Bábilan kéyahgóó shił dííʼashígíí nił yáʼátʼéehgo, tįʼ, áádóó yáʼátʼéehgo nikʼidííníshʼı̨́įʼ doo, nidi Bábilangóó shił dííʼashígíí doo nił aaníígóogo tʼáá kǫ́ǫ́ naniná. Jó, nidááhgóó tʼáá náhwiistʼą́ą́ nítʼééʼ. Haaʼí shı̨́ı̨́ kéyah tʼáá nił yáʼáhootʼéeh dooleełgi náhodiiʼaahgo ákǫ́ǫ́ dínááh.
5 Ákohgo tʼah doo nátʼą́ą́ʼ nihééjídááhgóó Nébuzarʼéídan áháłní, Shéífan biyeʼ Aháíkam biyeʼ Gedaláíyah éí Júdah kéyahdi kin hadaasʼáhígíí yinantʼáa doo biniyé Bábilan dineʼé aláahgo binanitʼaʼí nibiníłtíinii éí Gedaláíyah bichʼįʼ nídídáahgo bił diné bitahgi kééhótʼı̨́; éí doodaiiʼ, tʼáá nił yáʼáhootʼéhígóó dínáahgo ákwii kééhótʼı̨́. Áko siláo binanitʼaʼí éí chʼiyáán áádóó béeso łaʼ hainínilgo hoʼníłniiʼ.
6 Áko índa Jeremáíyah dah diiyáago Mízpah kin haalʼáagi Aháíkam biyeʼ Gedaláíyah yaa níyáago kéyahgi diné daadziihígíí tʼáá ákǫ́ǫ́ kéédahatʼíinii bitahgi yił kééhatʼı̨́ı̨́ nítʼééʼ.
7 Íídą́ą́ʼ daʼníłtsʼą́ą́ʼgóó diné dah naazhjaaʼígíí yindantʼáhígíí tʼáá ałtso tʼáá bił Bábilan dineʼé aláahgo binanitʼaʼí éí Aháíkam biyeʼ Gedaláíyah kéyahgi nantʼáago áyiilaago diné áádóó asdzání índa áłchíní kéyahgi tʼáá íiyisí badahojoobáʼíii Bábilan kéyahgóó tʼáadoo anoolkaadii yinantʼáa doo biniyé yeidiníʼą́ągo dayííniiʼ.
8 Nethanáíyah biyeʼ Íshmeiyel áádóó Karíyah biyeʼké Johéínan áádóó Jánathan áádóó Tanhúmeth biyeʼ Siiréíyah áádóó Niitófa kin shijaaʼdę́ę́ʼ Íífai biyeʼké áádóó Méíyakahdę́ę́ʼ diné léiʼ biyeʼ Jezanáíyah bí áádóó bidineʼé yił Mízpah kin haalʼáadi Gedaláíyah yaa yíkai.
9 Áádóó Shéífan biyeʼ Aháíkam biyeʼ Gedaláíyah hachʼįʼ ádee haadzíiʼgo kóní, Kaldíya dineʼé bá nidaałʼaʼgo tʼáadoo bikʼee nihił daayéʼí; tʼáá kǫ́ǫ́ kéédahohtʼı̨́įgo Bábilan dineʼé aláahgo binanitʼaʼí bá nidaałʼaʼ, áko nihá yáʼátʼéeh doo.
10 Nidi shí éiyá Kaldíya dineʼé nihaa nínánígíí bá chooshʼı̨́į doo biniyé tʼáá Mízpahdi kééhashtʼı̨́į doo, jóʼakon, nidi nihí éí wáin áádóó shı̨́įgo tsin bineestʼąʼígíí índa akʼah ádá shónídaołtʼeehgo biiʼ hééł áńdaʼoołʼįįhii bee ninádaohʼnił doo, áádóó kin hadaasʼáago ádaa dadoohtʼánígíí ákǫ́ǫ́ kéédahohtʼı̨́.
11 Tʼáá ákótʼéego Móʼab kéyahdi áádóó Áman dineʼé bitahgóó áádóó Íídam kéyahdi índa kédaayahgóó Jew dineʼé kéédahatʼínígíí tʼáá ałtso éí Bábilan dineʼé aláahgo binanitʼaʼí éí Júdah dineʼé daadziihígíí tʼáá ákǫ́ǫ́ kéédahatʼı̨́įgo áyiilaago áádóó Shéífan biyeʼ Aháíkam biyeʼ Gedaláíyah honantʼáa doo biniyé niiníłtı̨́įgo dayííniiʼ.
12 Ákohgo Jew dineʼé tʼáá ałtso adabidiʼniiskaad yę́ęjįʼ áádę́ę́ʼ chʼéheeskaigo Júdah kéyahdi Mízpahjįʼ Gedaláíyah yaa haaskai. Áádóó wáin índa shı̨́įgo tsin bineestʼąʼ dantʼánígíí tʼóó ahayóí áłah ádayiilaa.
Íshmeiyel éí Gedaláíyah yikʼijįʼ nahazʼą́
13 Áádóó ałdóʼ Karíyah biyeʼ Johéínan índa daʼníłtsʼą́ą́ʼgóó diné dah naazhjaaʼígíí yinanitʼaʼí danilíinii tʼáá ałtso Mízpahdi Gedaláíyah yaa yíkaigo
14 ádeidííniid, Áman dineʼé aláahgo binanitʼaʼí Béíyalis éí Nethanáíyah biyeʼ Íshmeiyel nidiyoołhééł biniyé nichʼįʼ ayííłʼaʼígíí doósh nił bééhózin da? Nidi Aháíkam biyeʼ Gedaláíyah tʼáadoo hoosdląąd da.
15 Áko Mízpahdi Karíyah biyeʼ Johéínan éí Gedaláíyah tʼáá nahontʼinee yił ahíiʼáazhgo yichʼįʼ haadzíiʼgo kóní, Baa nánooshkąąh, shaʼdiʼníʼaahgo Nethanáíyah biyeʼ Íshmeiyel bichʼįʼ deesháałgo diyeeshxééł áádóó tsʼídá doo łaʼ hoł bééhózin da doo. Haʼátʼíísh biniyé nijiiłhée doo áádóó Jew dineʼé tʼáá ałtso naa áłah násdlı̨́įʼii tanoolkaad doo índa Júdah kéyahgi diné daadziihii ádįįh doo?
16 Nidi Aháíkam biyeʼ Gedaláíyah éí Karíyah biyeʼ Johéínan áyidííniid, Díí tsʼídá doo kódííníił da, háálá Íshmeiyel tʼáá ádzaagóó bá hahídziih.
