Jeremiah 42:1-22
42 Ákohgo siláo binanitʼaʼí danilíinii tʼáá ałtso áádóó Karíyah biyeʼ Johéínan áádóó Hosháíyah biyeʼ Jezanáíyah áádóó diné aʼohgo ádaatʼéédóó ayóó ádaatʼéejįʼ diné tʼáá ałtso hánídóó niikaigo
2 Jeremáíyah ádeidííniid, Haaʼíyeeʼ baa nídaniikąąhígíí nihá yísíníłtsʼą́ą́ʼ; díí diné deidziihígíí nihá Bóhólníihii niDiyin God bichʼįʼ sodílzin, tʼáá shǫǫdí, háálá tʼóó ahoniiʼyóí nítʼééʼ, nidi kʼad aadę́ę́ʼ nihiníníłʼı̨́įgo tʼáá díkwíniiltʼéhé yeeʼ.
3 Áko Bóhólníihii niDiyin God éí deíníikáah dooleełgóó índa baa nideiikai dooleełígíí nihił yitʼíní íidoolííł.
4 Áádóó Diyin God yá halneʼii Jeremáíyah áhodííniid, Nihidisétsʼą́ą́ʼ. Jó, deínóokeedígi átʼéego Bóhólníihii nihiDiyin God nihá bichʼįʼ sodideeszįįł áádóó índa Bóhólníihii yee nihichʼįʼ haadzíʼígíí éí bee nihił náhodeeshnih; haʼátʼíhída doo nihitsʼąą dínéeshʼı̨́įł da.
5 Áádóó Jeremáíyah ádeidííniid, Bóhólníihii niDiyin God haneʼ yił nihichʼįʼ adeesʼaʼígíí tʼáá átʼé tʼáadoo bidaʼiilyaagóó Bóhólníihii tʼáá bí tʼáá aaníí átʼéego índa baʼahódlíigo ooʼíinii nilı̨́įgo nihaa hodoolnih.
6 Nihił yáʼátʼééh daatsʼí dooleeł, éí doodaiiʼ, doo daatsʼí nihił yáʼátʼéeh da dooleeł, nidi bichʼįʼ dandeelʼaʼígíí Bóhólníihii nihiDiyin God ánínígíí bikʼeh dahoniilʼı̨́į doo, áko Bóhólníihii nihiDiyin God ánínígíí bikʼeh dahoniilʼı̨́įgo nihá yáʼátʼéeh dooleeł.
7 Áádóó bikʼijįʼ neeznáá yiską́ągo Bóhólníihii éí Jeremáíyah yichʼįʼ haadzííʼ.
8 Ákohgo Karíyah biyeʼ Johéínan áádóó siláo binanitʼaʼí danilíinii hoł naakaígíí tʼáá ałtso índa diné aʼohgo ádaatʼéédóó tʼáá níléí ayóó ádaatʼéejįʼ tʼáá ałtso hágo yidííniidgo
9 áyidííniid, Ízrel dineʼé biDiyin God Bóhólníihii bídeínóhkeedii éí nihá bííkeedígíí kóní,
10 Díí kéyah tʼáá biiʼ kééhohtʼı̨́įgo áko lá índa nihidziilgo ánihideeshłíił ni áádóó índa doo ánihideeshdįįł da; kʼinihidideeshłééł áádóó doo hanihidiyeeshnish da, háálá doo yáʼáshǫʼ ánihiishłaaígíí łahgo átʼéego bąąh tsíńdíkééz.
11 Bóhólníihii ání, Bábilan dineʼé aláahgo binanitʼaʼí béédaołdzidígíí tʼáadoo béédaołdzidí. Tʼáadoo béédaołdzidí, háálá biyaa hanihideeshniłgo yisdánihideeshnił biniyé nihił honishłǫ́.
12 Nihaa aʼááh dínóozįįłígíí biniyé nihaa aʼááh dínéesįįł, áko tʼáá nihí danihikéyahgóó nihééʼdoołnih.
13 Nidi, Díí kéyah doo biiʼ kéédahwiitʼı̨́į da dooleeł, dadooniidgo, áko nihiDiyin God Bóhólníihii ánínígíí tʼáadoo bikʼeh dahosoołʼįįdgóogo
14 áádóó, Dooda, Ííjip kéyah góyaa diiʼnééł; áadi doo anaaʼ hólǫ́ǫ da doo áádóó anaaʼjí deenástsʼaaʼ bideeʼ bee íʼdílzoołí doo dadiitsʼaʼ da doo índa doo hodichin da doo; áadi kééhwiitʼı̨́į doo, dadooniidgo,
15 áko índa Júdah dineʼé danohłíinii daohdziihígíí, Bóhólníihii ánínígíí deísínółtsʼą́ą́ʼ: Ízrel dineʼé biDiyin God tʼáá ałtsoní bee Bóhólníihii kóní, Ííjip góyaa diiʼnéełgo áadi kéédahwiitʼı̨́į dooleeł, danohsingo áádóó ákóyaa noonáago
16 diltłish béédaołdzid yę́ę Ííjipdi bee nihikʼeh hodidoodleeł, áko dichin nihaa níłniiʼgo béédaołdzid yę́ę Ííjip góyaa nihikééʼ doołnihgo áadi dadínóohnééł.
17 Áko diné tʼáá ałtso Ííjipgóó dadiiʼnéełgo áadi kéédahwiitʼı̨́į dooleeł, danízingo yee hashtʼeʼnitsídaazkézígíí éí diltłish áádóó dichin índa naałniih yikʼee dínóonééł, áko doo yáʼátʼéehii hakʼijįʼ bidííchidígíí bitsʼą́ą́dóó doo łaʼ jidoodzih da, índa doo łaʼ yisdázhdooltéeł da.
18 Ízrel dineʼé biDiyin God tʼáá ałtsoní bee Bóhólníihii kóní, Jerúsalem kin haalʼáagi kééhatʼı̨́ı̨́ nítʼééʼ yę́ę bichʼįʼ sháhóóchįįdgo tʼóó báhádzidgo atéshłaaígíigi átʼéego, Ííjip kéyah biih woonáago tʼáá ákótʼéego tʼóó báhádzidgo atínihideeshłíiłgo danihiʼdódziih doo áádóó nihikʼee tʼóó bił adahayói doo áádóó doo yáʼáshǫ́ǫ́góó nihá yátiʼ doo índa tʼóó nihá nahatʼiʼ doo; kweʼé tsʼídá doo nídahwiidoołtséeł da.
19 Bóhólníihii nihá haadzíiʼgo ání, Júdah dineʼé daohdziihígíí Ííjip kéyahgóó dohnééh lágo. Díí jı̨́ tʼáá bééhózínígo tsʼídá tʼáá aaníí átʼéegi bee nihił hweeshneʼgo nihił béédahoozı̨́ı̨́ʼ.
20 Ádindaʼsohdloʼgo Bóhólníihii nihiDiyin God bichʼįʼ nidasisoołʼaʼ yę́ędą́ą́ʼ kódadohníigo, Bóhólníihii nihiDiyin God bichʼįʼ nihá sodílzin, áko Bóhólníihii nihiDiyin God tʼáá ádííniidígíí bee nihił hodíílnihgo bidaʼdiilnííł, dadooniid niʼ.
21 Díí jı̨́ bee nihił hweeshneʼ, nidi Bóhólníihii nihiDiyin God haadzíʼígíí éí yił nihaa shiníłʼaʼígíí tʼáadoo bikʼeh dahosoołʼįįd da.
22 Éí bąą kʼad tʼáá aaníí nihił béédahodoozįįł: ákǫ́ǫ́ diiʼnéełgo áadi kéédahwiitʼı̨́į dooleeł, danohsinídi diltłish áádóó dichin índa naałniih bikʼee dadínóohnééł.
