Jeremiah 43:1-13
43 HaDiyin God Bóhólníihii éí Jeremáíyah haneʼ yił hainíłʼaʼígíí tʼáá átʼé diné tʼáá ałtso yee yichʼįʼ haadzíiʼgo,
2 Hosháíyah biyeʼ Azaráíyah áádóó Karíyah biyeʼ Johéínan áádóó diné ádaa dadzódlíii tʼáá ałtso Jeremáíyah ádeidííniid, Niyoochʼííd. Ííjip kéyahgóó doo doohnéeł da áádóó áadi doo kéédahohtʼı̨́į da doo, nihididííniił biniyé Bóhólníihii nihiDiyin God doo nihaa niníłʼaʼ da.
3 Nidi Niiráíyah biyeʼ Bérak éí Kaldíya dineʼé yaa nihididooʼáałgo nidanihidoołtsił, éí doodaiiʼ, yisnááh daniidlı̨́įgo Bábilan kéyahgóó anihidínóołkałgo biniyé nihikʼijįʼ nilı̨́įgo níniʼ ná áháłʼı̨́.
4 Áko Karíyah biyeʼ Johéínan áádóó siláo binanitʼaʼí danilíinii tʼáá ałtso índa diné tʼáá ałtso tʼáá Júdah kéyahgi kéédahojitʼı̨́į dooleełgo Bóhólníihii hachʼįʼ yee haadzíʼígíí tʼáadoo yikʼeh dahóółʼįįd da.
5 Nidi Karíyah biyeʼ Johéínan áádóó siláo binanitʼaʼí danilíinii tʼáá ałtso éí Júdah dineʼé daadziihgo ałʼąą dineʼé bitahgóó tabidiʼnooskaadę́ę́ʼ nináhaaskaígíí Júdah kéyahgi kéédahatʼı̨́į dooleełgo yił dah diiná.
6 Diné áádóó asdzání áádóó áłchíní índa aláahgo naatʼáanii bitsiʼké danilíinii éí Shéífan biyeʼ Aháíkam biyeʼ Gedaláíyah éí siláo binanitʼaʼí nilíinii Nébuzarʼéídan éí diné tʼáá ałtso yił nihonínil yę́ę áádóó Diyin God yá halneʼii Jeremáíyah índa Niiráíyah biyeʼ Bérak yił dah diiná.
7 Ííjip kéyahdi jiníná, áko Bóhólníihii áníinii tʼáadoo bikʼeh dahojííłʼįįd da, áádóó Tahápaniiz kin haalʼáadi jiníná.
8 Ákohgo Tahápaniizdi Bóhólníihii éí Jeremáíyah yichʼįʼ haadzíiʼgo ání,
9 Tsé dantsaaígíí nídiiníiłgo Júdah dineʼé danilíinii binááł Tahápaniizdi Féro bighan bichʼįʼ yah eʼetiinígi hashtłʼish taoʼnihígi hashtłʼish biiʼ nídíłʼįįhgo
10 kóbidiní, Ízrel dineʼé biDiyin God tʼáá ałtsoní bee Bóhólníihii kóní, Bábilan dineʼé aláahgo binanitʼaʼí Nébukadnézzar shá naalʼaʼí deeshʼaałgo díí tsé nídéłʼı̨́ʼígíí bikáaʼgi bibikááʼdóó nahatʼáii niidooʼááł áádóó aláahgo naatʼáanii níbaal dah néíłbałígíí yikáaʼdi dah yidoołbał.
11 Áádóó doonéełgo Ííjip kéyahgi kééhojitʼíinii atíhodoolíiłgo dazhdínóonéełii dazhdínóonéełjįʼ áádóó yisnááh dajílı̨́į dooleełii yisnááh dajílı̨́į dooleełjįʼ índa diltłish bee nidahodiʼdootsiłii éí diltłish bee nidahodiʼdootsiłjįʼ nidahodidooʼááł.
12 Ííjip dineʼé bidiyin dabidiʼníinii dabikin naaznilii biih dahodideeshniłgo adadidookʼą́ą́ł, áko bí éí adeididoołkʼą́ąłgo edaʼalyaii deidoołnéełgo dah yididoojih. Naʼniłkaadii biʼééʼ yiih yigháhígi átʼéego Ííjip kéyah ákʼíidooltihgo bił hashtʼehodítʼéego dah didoogááł.
13 Ííjipdi Beth-shíímesh kin haalʼáagi edaʼalyaii niidiyootih índa Ííjip dineʼé bidiyin dabidiʼníinii bikin naaznilii iidiyoołkʼą́ą́ł.
